សម្ដេច ហ៊ុន ម៉ាណែត ស្នើក្រសួង-ស្ថាប័នទាំងអស់ កុំចាត់ទុកការងារអធិការកិច្ច ជាការងារចុះចាប់

ពីវេទិកាបិទសន្និបាតលទ្ធផលការងាររបស់ក្រសួងអធិការកិច្ច នាព្រឹកថ្ងៃទី ១៣ ខែកុម្ភៈនេះ សម្ដេចធិបតី ហ៊ុន ម៉ាណែត នាយករដ្ឋមន្ត្រី បានបញ្ជាក់ថា ការងារអធិការកិច្ច មិនមែនជាការងារចុះចាប់នោះទេ តែជាការងារពិនិត្យ និងផ្ដល់យោបល់ ជួយដល់ក្រសួង-ស្ថាប័ននានា អាចឆ្លុះកញ្ចក់ខ្លួនឯងបាន។  

សម្ដេចនាយករដ្ឋមន្ត្រី មានប្រសាសន៍ថា តាមក្រសួង-ស្ថាប័នមួយចំនួន ឲ្យតែលឺពាក្យថា អធិការកិច្ច គឺដឹងចុះមកចាប់។ ដូច្នេះ នៅពេលដែលក្រុមការងារអធិការកិច្ច ចុះទៅត្រួតពិនិត្យមានកន្លែងខ្លះ គេចមិនសហការ។

«ខ្ញុំសូមបញ្ជាក់ថា អភិក្រមយើងទាំង ៥ ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់ ការងារអធិការកិច្ចនេះ គឺជួយអភិក្រម ៤ខាងដើម»។ នេះជាការលើកឡើងរបស់ប្រមុខរាជរដ្ឋាភិបាល ដោយបានបន្ថែមថា ការងារពិនិត្យ និងផ្ដល់យោបល់ នៃការងារអធិការកិច្ច គឺជួយដល់ក្រសួង-ស្ថាប័ននានា អាចឆ្លុះកញ្ចក់ខ្លួនឯងបាន។

ដូច្នេះហើយ សម្ដេចធិបតី ហ៊ុន ម៉ាណែត បានស្នើដល់ក្រសួង-ស្ថាប័ន បញ្ឈប់ការយល់ច្រឡំថា ការ​ងារអធិការកិច្ច ជាការចុះចាប់។ «អញ្ចឹងខ្ញុំសុំឲ្យអង្គភាព-ស្ថាប័នទាំងអស់ កុំចាត់ទុកការងារអធិការកិច្ច គឺការងារចុះចាប់…គឺអភិក្រម ៤ ដើម្បីឆ្លុះបញ្ចាំងនៅគុណសម្បត្តិ គុណវិបត្តិ ជួយគ្នា»។ នេះការបញ្ជាក់បន្ថែមរបស់សម្ដេចនាយករដ្ឋមន្ត្រី ហ៊ុន ម៉ាណែត៕​