ព័ត៌មានជាតិ

ក្រុមហ៊ុនជប៉ុនដាក់ទុនថែមជាង ៦០០ លានដុល្លារ បង្កើតរោងចក្រទីពីរនៅខេត្តពោធិ៍សាត់

បានផុស

២ years មុន

នៅ

ថ្ងៃចន្ទ ២៦ កុម្ភៈ ២០២៤

ដោយ

ក្រុមហ៊ុនដ៏ធំរបស់ជប៉ុនមីនីបៀ នឹងពង្រីកការវិនិយោគបង្កើតរោងចក្រទីពីរនៅខេត្តពោធិ៍សាត់ក្នុងទុនវិនិយោគជាង ៦០០ លានដុល្លារ។

ក្រុមហ៊ុនឧស្សាហកម្មខ្នាតយក្សរបស់ជប៉ុន ដែលកំពុងវិនិយោគនៅតំបន់សេដ្ឋកិច្ចពិសេសភ្នំពេញ បានប្រកាសនឹងបង្កើតរោងចក្រទីពីរនៅខេត្តពោធិ៍សាត់ក្នុងផែនការជំរុញការពង្រីកខ្សែសង្វាក់ផលិតកម្មរបស់ក្រុមហ៊ុនក្នុងប្រទេសកម្ពុជា។ នេះបើតាមលោកស៊ុន ចាន់ថុល ដែលបានផ្តល់បទសម្ភាសន៍ដល់អ្នកសារព័ត៌មាន ក្នុងពេលចុះពិនិត្យមើលអំពីវឌ្ឍនភាពនៃគម្រោងសាងសង់ច្រកទ្វារអន្តរជាតិស្ទឹងបត់-បានណងអៀន និងវឌ្ឍនភាពនៃការអភិវឌ្ឍតំបន់សេដ្ឋកិច្ចពិសេសក្នុងខេត្តបន្ទាយមានជ័យ កាលពីថ្ងៃទី២៤ ខែកុម្ភៈ ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៊ុន ចាន់ថុល ឧបនាយករដ្ឋមន្រ្តី អនុប្រធានក្រុមប្រឹក្សាអភិវឌ្ឍន៍កម្ពុជាបានគូសបញ្ជាក់ថា ការពង្រីកខ្សែសង្វាក់ផលិតកម្មរបស់ក្រុមហ៊ុនមីនីបៀនៅខេត្តពោធិ៍សាត់គ្រោងអភិវឌ្ឍនៅលើផ្ទៃដីទំហំ ៥០ ហិកតា ជាមួយការដាក់ទុនរហូតដល់ ៦៥០ លានដុល្លារអាមេរិកដែលបង្កើតការងារបានជាង ៨ ពាន់កន្លែង។

លោកថា ខេត្តពោធិ៍សាត់មានសក្ដានុពលដោយសារមានប្រភពថាមពលស្អាត មានកសិដ្ឋានផលិតថាមពលពន្លឺព្រះអាទិត្យ មានវារីអគ្គិសនី ណាមួយក៏ជាច្រកសំខាន់ងាយស្រួលដឹកជញ្ជូនទំនិញទៅប្រទេសថៃតាមរយៈផ្លូវជាតិលេខ ៥ ដែលទើបត្រូវបានស្តារនិងពង្រីកពី ២ គន្លងទៅ ៤ គន្លង។

រដ្ឋាភិបាលបានចាត់ទុកក្រុមហ៊ុនមីនីបៀជាក្រុមហ៊ុនគំរូមួយសម្រាប់ការទាក់ទាញក្រុមហ៊ុនជប៉ុនមកវិនិយោគនៅកម្ពុជា។

ក្រុមហ៊ុនក្រុមហ៊ុនមីនីបៀ ជាក្រុមហ៊ុនដ៏ធំមួយរបស់ជប៉ុន ដែលបានវិនិយោគនៅក្នុងប្រទេសកម្ពុជាក្នុងឆ្នាំ២០១០ ដោយផលិតជាម៉ូទ័រសម្រាប់នាំចេញទៅលក់នៅក្រៅប្រទេស។ បច្ចុប្បន្នក្រុមហ៊ុនក៏មានផលិតអំពូល LED និងសម្ភារៈក្មេងលេងផងដែរ។

ក្រុមហ៊ុនបានបង្កើតរោងចក្រទីមួយនៅតំបន់សេដ្ឋកិច្ចពិសេសភ្នំពេញជាមួយទុនវិនិយោគជាង ៦០០ លានដុល្លារអាមេរិក និងផ្តល់ការងារជូនពលរដ្ឋខ្មែរបានជាង ៦ ពាន់នាក់៕