ឈ្មួញកណ្តាល​​ឲ្យ​តម្លៃដំឡូងមី​ដល់ ៧៨០ រៀល ក្នុង ១ គីឡូក្រាម កសិករសប្បាយចិត្តប្រមូលផល

កសិករនៅស្រុកភ្នំព្រឹក រីករាយក្នុងការប្រមូលផលដំឡូងមី ខណះទីផ្សារបច្ចុប្បន្នបានប្រសើរជាងឆ្នាំកន្លងទៅ ដែល​ជំរុញឲ្យកសិករបង្កើនការដាំបន្តហើយកសិករបានរំពឹងថា ឆ្នាំខាងមុខនឹងល្អលើសឆ្នាំនេះ។

នៅលើទំហំដី ២០ ហិកតា ស្ថិតក្នុង ភូមិចំការស្រូវ ឃុំបារាំងធ្លាក់ ស្រុកភ្នំព្រឹក ខេត្តបាត់ដំបង លោក រិន ដា អាយុ ៤៣ ឆ្នាំ កំពុងចាប់ផ្តើមប្រមូលផលទិន្នផលដំឡូងមី។

បើទោះបីនៅលើទំហំ​ដីទាំង ២០ ហិកតា ទិន្នផលបានខូចខាតប្រហែល ១៥ ភាគរយក្តី ក៏​ទិន្នផលទាំងអស់មានកម្រិត​ខ្ពស់គួរសមដែរ។ តាមលោក រិន ដា ការខូចខាត ១៥ ភាគរយ ដោយសារស្ថានភាព​ដី​តំបន់នោះ​ជាដីទំនាបទើបបង្កើតជា​មេរោគ​ផ្សិតរលួយខូចតែម្តង។

ទិន្នផលដំឡូងមានឈ្មួញកណ្តាលមកទិញដល់ចម្ការ ហើយដឹកលក់បន្តទៅថៃ​ដោយ​មិន​ចាំបាច់​មក​ដឹកទៅដោយខ្លួនឯងនោះទេ។ លោក រិន ដា បាន​បង្ហាញ​​ពី​តម្លៃ​ដំឡូងមី ខណៈ​ដែល​ឈ្មួញកណ្តាលបានឲ្យតម្លៃ ៧៨០ រៀល ក្នុង ១ គីឡូក្រាម សម្រាប់ដំឡូង​ស្ងួត និងដំឡូងស្រស់បាន ៤០០ រៀល ក្នុង ១ គីឡូក្រាម បើធៀបឆ្នាំមុនបានកើនឡើងចន្លោះពី ១០០ រៀលដល់ ១៥០ រៀល ក្នុង១គីឡូក្រាម។

ការប្រមូលផលឆ្នាំនេះក៏ដូចឆ្នាំមុនៗដែរ លោក រិន ដា ត្រូវការ​កម្លាំងពលកម្មក្នុងស្រុកយ៉ាងច្រើន​ដែល​អាច​ផ្តល់​ប្រាក់កម្រៃប្រចាំថ្ងៃផ្គត់ផ្គង់ដល់​គ្រួសារកម្មករ​ប្រសើរជាងផ្សងព្រេងធ្វើចំណាកស្រុក ខណះលោក​មាន​ដាំដុះ​ដំណាំ​កសិកម្ម​ច្រើន​មុខ​មាន​​ដូចជា ដំឡូង មៀន ពោត ជាដើម ។

មន្ត្រីកសិកម្មខេត្ត​បាត់ដំបងបាន​ប្រាប់​ថា ការ​ដាំ​ដំណាំដំឡូងមីឲ្យតែកសិករតាំងចិត្តអត់ធ្មត់មិនខាតបង់នោះទេ ព្រោះតម្រូវការទីផ្សារមិនអាចខ្វះបានឡើយ បើទោះបីក្នុងកាល:ទេស:ខ្លះចុះថ្លៃបន្តិចក៏ដោយ។ ទិន្នផលដំឡូងអាចនឹង​ហក់​ឡើង​ជា​បន្តបន្ទាប់ ឲ្យតែទិន្នផលដំឡូងនោះកសិករចេះថែទាំបានល្អតាម​ស្តង់ដា​តម្រូវតាមទីផ្សារក្រុមហ៊ុនគេនឹងសប្បាយចិត្តក្នុង​ការទិញចូល។

មន្ត្រីរូបនេះក៏បានកោតសសើរដល់កសិករខាងលើ ដែលប្រកបរបរកសិកម្មឈានមុខគេក្នុងស្រុកភ្នំព្រឹក្ស។ លោកអះអាង​ថា តាមរយ:​ការសិក្សាផ្នែកកសិកម្មបានច្បាស់លាស់ ទាំងរបៀបថែទាំដំណាំ ទាំងការវេចខ្ចប់ តាមតម្រូវការទីផ្សារ និង​យល់​ដឹង​ថា តម្លៃរាល់កសិផលដែលបានប្រែប្រួលខ្លះៗ តើមកពីក្តាអ្វី? គឺមកពីកត្តាទិន្នផល និងការវេចខ្ចប់មិនបានល្អតាម​តម្រូវការ​ទីផ្សារ មិនមែនមកពីមន្ទីរណា ឬ ក្រសួងណាទម្លាក់តម្លៃកសិផលរបស់ប្រជាកសិករក្នុងស្រុកនោះទ៕

អត្ថបទ៖ សៅ សារិទ្ធ