ព័ត៌មានជាតិ

ត្រៀមសម្រួលដល់ពលករកម្ពុជា មានបំណងមកស្រុកកំណើត អំឡុងចូលឆ្នាំខ្មែរ តាមច្រកទ្វារអន្តរជាតិកម្ពុជា-ថៃ

បានផុស

២ years មុន

នៅ

ថ្ងៃចន្ទ ២៥ មីនា ២០២៤

ដោយ

ក្រសួងការងារ និងបណ្ដុះបណ្ដាលវិជ្ជាជីវៈ និងក្រសួងមហាផ្ទៃ បានបើកកិច្ចប្រជុំរួមគ្នា ដើម្បីត្រៀមសម្របសម្រួលដល់ពលករកម្ពុជា ដែលមានបំណងវិលត្រលប់មកស្រុកកំណើត ក្នុងអំឡុងពេលចូលឆ្នាំខ្មែរ ឆ្នាំថ្មី ខាងមុខនេះ នៅតាមបណ្ដាច្រកទ្វារអន្តរជាតិកម្ពុជា-ថៃ។

កាលពីព្រឹកថ្ងៃទី ២៤ ខែមីនា ឆ្នាំ ២០២៤ ម្សិលមិញនេះ នៅប៉ុស្តិ៍ច្រកទ្វារអន្តរជាតិប៉ោយប៉ែត លោក សេង សក្ដា ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានការងារ តំណាងដ៏ខ្ពង់ខ្ពស់ លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោកឧត្ដមសេនីយ៍ឯក សុខ វាសនា អគ្គនាយក នៃអគ្គនាយកដ្ឋានអន្តោប្រវេសន៍ តំណាងដ៏ខ្ពង់ខ្ពស់ លោកសន្តិអភិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និង លោក ង៉ោ ម៉េងជ្រួន អភិបាលរង នៃគណៈអភិបាលខេត្ត តំណាងលោក អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ បានដឹកនាំកិច្ចប្រជុំរួមគ្នា ដើម្បីត្រៀមសម្របសម្រួលដល់ពលករកម្ពុជា ដែលមានបំណងវិលត្រលប់មកស្រុកកំណើត ក្នុងអំឡុងពេលចូលឆ្នាំខ្មែរ ឆ្នាំថ្មី ខាងមុខនេះ នៅតាមបណ្ដាច្រកទ្វារអន្តរជាតិកម្ពុជា-ថៃ។

កិច្ចប្រជុំនោះដែរ ក៏មានការអញ្ជើញចូលរួមពីថ្នាក់ដឹកនាំ និងមន្ត្រីជំនាញរបស់អគ្គនាយកដ្ឋានការងារ ថ្នាក់ដឹកនាំ និងមន្ត្រីជំនាញអគ្គនាយកដ្ឋានអន្តោប្រវេសន៍ អនុព័ន្ធអមស្ថានទូតកម្ពុជាប្រចាំប្រទេសថៃ អគ្គកុងស៊ុលកម្ពុជាប្រចាំខេត្តសៈកែវ មន្ទីរការងារ និងបណ្ដុះបណ្ដាលវិជ្ជាជីវៈ ខេត្តបន្ទាយមានជ័យ និងការិយាល័យ និងប៉ុស្តិ៍ចំណុះការិយាល័យច្រកទ្វារអន្តរជាតិប៉ោយប៉ែត ចាំយាម ព្រំ ដូង ភ្នំដី ស្ទឹងបត់ អូរស្មាច់ និងជាំ ផងដែរ។

ជាមួយនោះ បន្ទាប់ពីកិច្ចប្រជុំ ប្រតិភូ បានចុះពិនិត្យទីតាំងច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ និងច្រកទ្វារអន្តរជាតិខេត្តបាត់ដំបង ដើម្បីរៀបចំលំហូរទទួលពលករ រួមទាំងពិនិត្យទីតាំងសង់រោងសម្រាប់ចែកទឹកដល់ពួកគាត់ និងសម្រាករង់ចាំជិះឡានត្រឡប់ទៅប្រទេសកម្ពុជា៕