រដ្ឋមន្រ្តីកសិកម្ម ផ្តល់ផ្ទះសំណាញ់ដាំបន្លែសុវត្ថិភាពដល់វិទ្យាល័យ ដើម្បីលើកកម្ពស់ការអប់រំកសិកម្ម

រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា បានផ្តល់ផ្ទះសំណាញ់សម្រាប់ដាំបន្លែសុវត្ថិភាពចំនួន ២ ដែលមានទឹកប្រាក់ប្រមាណ ៥ពាន់ដុល្លារ ជូន វិទ្យាល័យ ពេជ្រចិន្តា ស្ថិតនៅក្នុងខេត្តបាត់ដំបង ដើម្បីលើកកម្ពស់ការអប់រំកសិកម្ម ជំរុញការរស់នៅប្រកបដោយនិរន្តរភាព និងលើកកម្ពស់សន្តិសុខស្បៀង។

ការប្រកាសផ្តល់ផ្ទះសំណាញ់នេះ ស្របពេលដែលរដ្ឋមន្រ្តីកសិកម្ម លោក ឌិត ទីណា បានដឹកនាំមន្រ្តីជំនាញកសិកម្មចុះទស្សនកិច្ចនៅ សហគមន៍កសិកម្ម ពន្លឺពេជ្រចិន្តា ស្ថិតនៅភូមិពេជ្រចិន្តា ឃុំពេជ្រចិន្តា ស្រុកភ្នំព្រឹក ខេត្តបាត់ដំបង កាលពីរសៀលថ្ងៃទី​៧ ខែ ឧសភា ឆ្នាំ ២០២៤។ ជាការកត់សម្គាល់ ការឧបត្ថម្ភផ្ទះសំណាញ់នេះ​ បន្ទាប់ពីសិស្សានុសិស្ស នៅវិទ្យាល័យ ពេជ្រចិន្តា បានលើឡើងនៅក្នុងវេទិកាសាធារណៈថា បច្ចុប្បន្ននេះ ខាងនាយកសាលាបានរៀបចំផ្ទះសំណាញ់ដាំបន្លែសុវត្ថិភាព ចំនួនមួយរោង ដោយក្នុងមួយខែតាមរយៈការដាំបែបទំនើបនេះរកថវិកាបានជាង ១លានរៀល សម្រាប់លក់នៅលើទីផ្សារ និងយកថវិកាមកអភិវឌ្ឍន៍សាលារៀន។

សិស្សានុសិស្សជានារី បានថ្លែងថា៖«សាលាចាប់ផ្តើមដាំបន្លែចាប់ពីខែកម្ភៈ ហើយប្រមូលផលនៅក្នុងខែ មីនា  និងលក់បានលុយ ១លាន ៥០ម៉ឺនរៀល»។

ក្រោយការលើកឡើងបែបនេះ​ លោក ឌិត ទីណា បានប្រកាសផ្តល់ផ្ទះសំណាញ់ភ្លាមៗចំនួនពីរដល់វិទ្យាល័យពេជ្រចិន្តា ដើម្បីពង្រីកការដាំដុះ និងជាផ្នែកមួយផ្តល់ការអប់រំដល់សិស្សានុសិស្សផ្នែកកសិកម្ម ក៏ជាផ្នែកមួយក្នុងការផ្គត់ផ្គងអាហារូបត្ថម្ភដល់សិស្សសាលាផងដែរ។ លោកបានថ្លែងថា៖«តាមរយៈការចូលរួមរបស់សិស្សក្នុងសកម្មភាពថែសួនដោយដៃ ពួកគេអាចរៀនអំពីកសិកម្ម ការលូតលាស់របស់រុក្ខជាតិ និងសារៈសំខាន់នៃការបរិភោគអាហារដែលមានសុខភាពល្អ។ នេះអាចរួមចំណែកដល់ការយល់ដឹងរួមរបស់ពួកគេអំពីប្រព័ន្ធអាហារ និងបរិស្ថាន»។

តាមរយៈការដាំបន្លែក្នុងបរិវេណសាលា សាលារៀនអាចកាត់បន្ថយការពឹងផ្អែកលើប្រភពខាងក្រៅសម្រាប់ផលិតផលស្រស់ ការណ៍នេះអាចរួមចំណែកដល់ការកែលម្អសន្តិសុខស្បៀង ជាពិសេសក្នុងគ្រាខ្វះខាត ឬការប្រែប្រួលតម្លៃ។  
ជារួម ការផ្តល់ផ្ទះសំណាញ់ដល់សាលារៀនអាចមានឥទ្ធិពលយ៉ាងសំខាន់លើការអប់រំកសិកម្ម សុខភាព ការចូលរួមរបស់សហគមន៍ និរន្តរភាព និងសន្តិសុខស្បៀង។

ស្រដៀងគ្នានេះដែរ លោក ហ៊ុន វុត្ថា ប្រធានសហគមន៍កសិកម្ម ពន្លឺពេជ្រចិន្តា  ស្នើឱ្យប្រជាកសិករប្លាស់ប្តូរផ្នត់ការដាំបន្លែតៗគ្នាតាមរដូវកាល ដោយងាកមកដាំបន្លែសុវត្ថិភាពដែលកំពុងឆ្លើយតបទៅនឹងតម្រូវការទីផ្សារ។

លោកបន្ថែមថា ដើម្បីបណ្តុះផ្នត់គំនិតជំនាន់ថ្មី លោកបានអញ្ជើញសិស្ស និងយុវជន ធ្វើទស្សនកិច្ចរោងបន្លែធ្វើពីផ្ទះសំណាញ់ដែលផ្តល់ផលចំណេញដល់ការដាំដុះ និងការបន្ថយហានិភ័យផ្សេងៗ។ លោកថ្លែងយ៉ាងដូច្នេះថា៖«ដោយសារតែពួកគាត់ជាអ្នកស្នងតំណែងយើងនៅថ្ងៃក្រោយ ហើយយើងចង់ប្លាស់ប្តូរផ្នត់គំនិតគាត់ ឱ្យចាប់ផ្តើមពីអ្វីដែលគាត់មាន ឧទាហរណ៍ បើគាត់មានដីហើយមិនចាំបាច់ធ្វើចំណាកស្រុកឬទៅធ្វើអ្វីផ្សេងនោះទេ បើគាត់មានចំណូលចិត្តខាងកសិកម្មគាត់អាចធ្វើបាន នៅដីរបស់ខ្លួន ហើយអាចរកចំណូលបានសមរម្យតាមរយៈការដាំដុះបែបទំនើបនេះ»៕

អត្ថបទ៖ ឡាយ សាមាន