កម្ពុជា-អាមេរិក ប្តេជ្ញាលើកកម្ពស់កិច្ចសហការប្រយុទ្ធប្រឆាំងបទល្មើសឆបោកតាមប្រព័ន្ធអនឡាញ

កម្ពុជា​ និងសហរដ្ឋអាមេរិក បង្ហាញជំហរក្នុងការបន្តលើកកម្ពស់កិច្ចសហប្រតិបត្តិការក្នុងការប្រយុទ្ធប្រឆាំងបទល្មើសឆបោកតាមប្រព័ន្ធអនឡាញ តាមរយៈការផ្លាស់ប្តូរព័ត៌មាន និងបណ្តុះបណ្តាលដល់មន្រ្តីនគរបាលកម្ពុជា ដើម្បីឈានទៅធ្វើការទប់ស្កាត់ និងបង្ក្រាបបទល្មើសឱ្យកាន់តែប្រសិទ្ធភាព។

ការឯកភាពនេះ ត្រូវបានលើកឡើងនៅជំនួបពិភាក្សាការងាររវាងលោក ស ថេត អគ្គស្នងការនគរបាលជាតិ និងលោក ផាទ្រីក មើហ្វី (W. Patrick Murphy) ឯកអគ្គរដ្ឋទូតអាមេរិកប្រចាំកម្ពុជាដែលចប់អាណត្តិ ដើម្បីសម្តែងការគួរសម និងជម្រាបលា កាលពីថ្ងៃទី​១០ ខែឧសភា ឆ្នាំ ២០២៤ នៅទីស្តីការក្រសួងមហាផ្ទៃ។ លោក Patrick Murphy ត្រូវបានតែងតាំងជា​ឯកអគ្គរដ្ឋទូតប្រចាំ​នៅប្រទេសកម្ពុជា នៅថ្ងៃទី៨ ខែសីហា ឆ្នាំ​២០១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងជំនួបនោះ ភាគីទាំងពីរបានវាយតម្លៃខ្ពស់ចំពោះកិច្ចសហប្រតិបត្តិការនាពេលកន្លងមក ហើយបានឯកភាពគ្នាក្នុងការលើកកម្ពស់កិច្ចសហប្រតិបត្តិការក្នុងការប្រយុទ្ធប្រឆាំងបទល្មើសឆបោកតាមប្រព័ន្ធអនឡាញ តាមរយៈកិច្ចសហប្រតិបត្តិការផ្លាស់ប្តូរព័ត៌មានឲ្យបានជាក់លាក់ និងច្បាស់លាស់ដើម្បីឈានទៅធ្វើការទប់ស្កាត់ និងបង្ក្រាប ពិសេសធ្វើការកាត់ទោសខ្សែរយៈបណ្តាញដែលនៅពីក្រោយបទល្មើសទាំងអស់នេះផងដែរ។
ប្រភពពីក្រសួងមហាផ្ទៃគូសបញ្ជាក់ថា៖«ភាគីទាំងពីរបានឯកភាពគ្នាពាក់ព័ន្ធនឹងការបង្កើតកិច្ចសហប្រតិបត្តិការប្រយុទ្ធប្រឆាំងបទល្មើសដោយផ្តោតទៅលើការបណ្តុះបណ្តាលពង្រឹងសមត្ថភាពលើជំនាញដែលពាក់ព័ន្ធដល់មន្ត្រីនគរបាលជាតិកម្ពុជាដោយចំណុចនេះភាគីអាមេរិកនៅតែបន្តជួយគាំទ្របណ្តុះបណ្តាលដល់មន្ត្រីនគរបាលជាតិកម្ពុជា ទាំងវគ្គបណ្តុះបណ្តាលក្នុងប្រទេស និងក្រៅប្រទេស ដែលផ្តួចផ្តើមឡើងដោយរដ្ឋាភិបាលសហរដ្ឋអាមេរិកផងដែរ»។

លោក ផាទ្រីក មើហ្វី ក៏បានសម្តែងនូវការកោតសរសើរ និងថ្លែងអំណរគុណដល់នគរបាលជាតិកម្ពុជា ដែលបានផ្តល់កិច្ចសហការជាមួយកងកម្លាំងអនុវត្តច្បាប់របស់អាមេរិក ក្នុងការប្រយុទ្ធប្រឆាំងបទល្មើសគ្រប់ប្រភេទ ដែលមានក្រុមការងារ Task Force ជាយន្តការដឹកនាំ​ សម្រេចបានលទ្ធផលជាច្រើនគួរឱ្យកត់សម្គាល់។ លោកបានលើកឡើងថា៖‍« ទន្ទឹមនោះក៏សូមថ្លែងអំណរគុណដល់នគរបាលជាតិកម្ពុជា ដែលបានផ្តល់កិច្ចការពារសន្តិសុខ និងសុវត្ថិភាព ដល់បុគ្គលិកស្ថានទូត ក៏ដូចជានិវេសនដ្ឋានទូត ព្រមទាំងពលរដ្ឋអាមេរិក ដែលមានវត្តមានក្នុងប្រទេសកម្ពុជា»។

ជាការឆ្លើយតប លោក ស ថេត បានធ្វើការវាយតម្លៃខ្ពស់ចំពោះវត្តមានឯកអគ្គរដ្ឋទូតអាមេរិកប្រចាំកម្ពុជា គណៈប្រតិភូ និងបានថ្លែងអំណរគុណចំពោះស្ថានទូតអាមេរិក ដែលបានមើលឃើញពីភាពជាក់ស្តែង នៃកិច្ចខិតខំប្រឹងប្រែងរបស់នគរបាលជាតិកម្ពុជា ក្នុងកិច្ចសហប្រតិបត្តិការប្រយុទ្ធប្រឆាំងបទល្មើសគ្រប់ប្រភេទ។

សូមជម្រាបថា ក្រុមការងារ « TASK FORCE» ត្រូវបានបង្កើតឡើងក្រោមអនុស្សារណៈ នៃការយោគយល់គ្នារវាង កម្ពុជា-អាមេរិក ស្តីពី កិច្ចសហប្រតិបត្តិការក្នុងការពង្រឹងប្រតិបត្តិការប្រឆាំងនឹងឧក្រិដ្ឋកម្មឆ្លងដែន កាលពីថ្ងៃទី៥ ខែមេសា ឆ្នាំ២០១៩ ៕