សភាសម្ព័ន្ធសហជីពជាតិកម្ពុជា ទទូចឱ្យសង់ត្រាល់​កែតម្រូវរបាយការណ៍ ដោយមិនទទួលយកការបំភ្លឺ

សភាសម្ព័ន្ធសហជីពជាតិកម្ពុជា NACC ដែលតំណាងកម្មករនិយោជិតជាង ៣២០ ០០០នាក់ បានរក្សាជំហររបស់ខ្លួន ដោយនៅតែទទូចឱ្យមជ្ឈមណ្ឌល​សម្ព័ន្ធ​ភាព​ការងារ​ និង​សិទ្ធិ​មនុស្ស ហៅកាត់ «សង់ត្រាល់» កែតម្រូវរបាយការណ៍ឡើងវិញ ដោយ NACC មិនទទួលយកការបកស្រាយ ឬសេចក្ដីបំភ្លឺណាមួយរបស់សង់ត្រាល់ឡើយ។

បើសិនជាមិនមានការកែតម្រូវតាមការស្នើសុំនោះទេ សភាសម្ព័ន្ធសហជីពជាតិកម្ពុជា NACC នឹងមិនបញ្ឈប់ត្រឹមហ្នឹងឡើយ។ នេះជាការប្រកាសរបស់ប្រធានសភាសម្ព័ន្ធសហជីពជាតិកម្ពុជា លោក សួង ហួត ក្នុងសន្និសីទសារព័ត៌មាន នាព្រឹកថ្ងៃទី២៧ ខែមិថុនា ឆ្នាំ២០២៤ នៅស្នាក់ការកណ្ដាលសភាសម្ព័ន្ធសហជីពជាតិកម្ពុជា។

លោក សួង ហួត បានលើកឡើងដូច្នេះថា៖ «សូម្បីខ្លួនឯង (សង់ត្រាល់) ដែលចេញរបាយការណ៍ខ្លួនឯង ក៏ខ្លួនឯងទទួលស្គាល់ថា វាមិនបានឆ្លុះបញ្ចាំងទៅលើស្ថានភាពទូទៅដែរ។ អញ្ចឹងទេ NACC ក៏ដូចជាសហជីពនៅកម្ពុជាទាំងអស់ នៅតែទទូចឱ្យសង់ត្រាល់កែតម្រូវរបាយការណ៍របស់ខ្លួនឡើងវិញ ព្រោះខ្លួនឯង (សង់ត្រាល់) ក៏ទទួលស្គាល់ដែរ កាលមុនថា យើងចោទគាត់ ថា អត់តម្លាភាព មានភាពលម្អៀង ជាដើម ប៉ុន្តែឥលូវគាត់ចេញមកទទួលស្គាល់ខ្លួនឯងទៀត អញ្ចឹង វិធីអត់មានអីក្រៅពីកែតម្រូវឡើងវិញទេ»។

ជាការកត់សម្គាល់ កាលពីថ្ងៃទី២៦ ខែមិថុនា ឆ្នាំ២០២៤ អង្គការសង់ត្រាល់ ដែលសហជីពនៅកម្ពុជាកំពុងសម្រុកប្តឹងជាបន្តបន្ទាប់នោះ បានចេញមកទទួលស្គាល់ថា របាយការណ៍របស់ខ្លួនដែលរិះគន់ទៅលើស្ថានភាពសិទ្ធិសេរីភាពសហជីពនៅកម្ពុជា គឺវិធីសាស្ត្រនៃការប្រមូលព័ត៌មាន និងរបាយការណ៍មានវិសាលភាពតូច ដែលគ្មានលក្ខណៈវិទ្យាសាស្ត្រ និងគ្មានវិជ្ជាជីវៈ ទើបជាហេតុធ្វើឱ្យមានការតវ៉ា។

ការបកស្រាយបំភ្លឺរបស់សង់ត្រាល់បែបនេះ ត្រូវបានលោក សួង ហួត ប្រធានសភាសម្ព័ន្ធសហជីពជាតិកម្ពុជា NACC ប្រកាសច្រានចោល មិនទទួលយកត្រឹមការបំភ្លឺ ឬបកស្រាយណាមួយនេះទេ។ លោក បញ្ជាក់ថា គោលបំណងរបស់ NACC គឺស្នើសុំឱ្យសង់ត្រាល់កែតម្រូវខ្លឹមសារនៃរបាយការណ៍ ដែលបានចេញកាលពីថ្ងៃទី៤ ខែមិថុនា ឆ្នាំ២០២៤។

កាល​ពី​ថ្ងៃ​ទី​៤​ ខែ​មិថុនា ​ឆ្នាំ​២០២៤ មជ្ឈមណ្ឌល​សម្ព័ន្ធ​ភាព​ការងារ​ និង​សិទ្ធិ​មនុស្ស​ ហៅ​កាត់ ​«សង់ត្រាល់»​ បានចេញរបាយ​ការណ៍​​ស្តីពី​ស្ថានភាព​សេរីភាព​​សហជីពកម្ពុជា និងការ​វាយ​តម្លៃ​ពី​ស្ថានភាព​កម្មករ​នៅ​ក្នុង​រោងចក្រ​ចំនួន១៤ ​ដែលរបាយការណ៍នេះ ថា ​សហជីព​នៅកម្ពុជានៅតែ​រង​ការ​បំភិត​បំភ័យ​ដោយ​ផ្ទាល់​មាត់​ ការ​គំរាម​កំហែង និង​ការ​បៀតបៀនយ៉ាងធ្ងន់ធ្ងរដល់​ការ​បំពេញ​ការងារ​របស់​ពួក​គេ។

ដោយពិនិត្យឃើញបែបនេះ សភាសម្ព័ន្ធសហជីពជាតិកម្ពុជា ក៏ដូចជាសហជីពធំៗជាច្រើននៅកម្ពុជា បានដាក់ញត្តិនៅស្នាក់ការសង់ត្រាល់ ស្នើសុំឱ្យមានការកែតម្រូវរបាយការណ៍នេះឡើងវិញ។ ទន្ទឹមនេះ សភាសម្ព័ន្ធសហជីពជាតិកម្ពុជា ក៏បានដាក់លិខិតទៅកាន់ក្រសួងមហាផ្ទៃ ដើម្បីស្នើសុំក្រសួងពិនិត្យលើសកម្មភាព និងការប្រើប្រាស់កញ្ចប់ថវិកាជំនួយបរទេសរបស់សង់ត្រាល់ តើអនុលោមច្បាប់ និងលក្ខខន្តិកៈដែរឬទេ? ខណៈសភាសម្ព័ន្ធសហជីពជាតិ ក៏បានដាក់លិខិតទៅកាន់ USAID ដែលជាម្ចាស់ជំនួយសង់ត្រាល់ឱ្យជួយពិនិត្យលើសកម្មភាពសង់ត្រាល់ផងដែរ។

ការផ្ទុះការតវ៉ារបស់សហជីពនៅកម្ពុជាទៅលើរបាយការណ៍សង់ត្រាល់ពេលនេះ ដោយខ្លឹមសារនៃរបាយការណ៍មិនបានឆ្លុះបញ្ចាំងពីការពិត និងមិនមានមូលដ្ឋានច្បាស់លាស់ ដែលធ្វើឱ្យប៉ះពាល់ដល់កិត្តិយសជាតិ ប៉ះពាល់ស្ថិរភាពការងារនិងផលប្រយោជន៍រួមរបស់កម្មករនិយោជិតនៅកម្ពុជាទាំងមូល។ ផ្ទុយទៅវិញ សេរីភាពសហជីពនៅកម្ពុជា ត្រូវបានបើកទូលាយ គ្មានរឹតត្បិតដូចរបាយការណ៍សង់ត្រាល់លើកឡើងឡើយ។ នេះជាការលើកឡើងបន្ថែមរបស់លោក សួង ហួត ប្រធានសភាសម្ព័ន្ធសហជីពជាតិកម្ពុជា៕