លោក កើត ឆែ៖ ការដោះស្រាយវិវាទក្រៅប្រព័ន្ធតុលាការ មន្ត្រីត្រូវយកមរតកមហាសាលរបស់សម្តេចតេជោ «នយោបាយឈ្នះឈ្នះ»មកដោះស្រាយ

លោក កើត ឆែ អភិបាលរងរាជធានីភ្នំពេញ បានលើកឡើងថា ការដោះស្រាយវិវាទក្រៅប្រពន្ធ័តុលាការជារឿងល្អបំផុត មិនខាតពេលវេលា និងទទួលបានផលប្រយោជន៍ច្រើនសម្រាប់ភាគីទាំង២ ដូច្នេះសូមអោយមន្ត្រីនៅថ្នាក់រាជធានី និងមន្ត្រីនៅថ្នាក់ខណ្ឌ ត្រូវយកមរតកមហាសាលរបស់សម្តេចអគ្គមហាសេនាបតីតេជោ ហ៊ុន សែន មកអនុវត្ត នោះគឺ​«នយោបាយឈ្នះ ឈ្នះ»។

ការលើកឡើងបែបនេះរបស់លោក កើត ឆែ បានធ្វើឡើងខណៈលោកអញ្ជើញជាតំណាងលោក ឃួង ស្រេង អភិបាលនៃគណៈអភិបាលរាជធានីភ្នំពេញ ក្នុងឱកាសបើកវគ្គបណ្តុះបណ្តាលបន្តស្តីពីដំណាក់កាលនៃការសម្របសម្រួលដោះស្រាយវិវាទជំនាញទន់ និងក្រមសីលធម៌ របស់មន្ត្រីសម្រុះសម្រួលដោះស្រាយវិវាទ នាព្រឹកថ្ងៃទី១៧កក្កដា ឆ្នាំ២០២៤ នៅសាលារាជធានីភ្នំពេញ ហើយវគ្គបណ្តុះបណ្តាលនេះ ក៏មានការអញ្ជើញចូលរួមពីលោក ចាយ ចាន់តារាវណ្ណ សមាជិកឧត្តមក្រុមប្រឹក្សានៃអង្គចៅក្រមផងដែរ។

លោក កើត ឆែ បានគូសបញ្ជាក់ថា មេរៀនថ្ងៃនេះជាទុនដ៏ធំ ជាមរតកមហាសាលនៃនយោបាយឈ្នះៗរបស់សម្តេចអគ្គ មហាសេនាបតីតេជោ ហ៊ុន សែន គឺចាក់ចំបេះដូង។ អាជ្ញាធរមូលដ្ឋានមានភារកិច្ចដោះស្រាយវិវាទក្រៅប្រពន្ធ័តុលាការឈរលើអព្យាក្រឹតភាព និងមិនត្រូវក្បត់មនសិការរបស់ខ្លួនឡើយ។

លោកអភិបាលរងបានថ្លែងថា ការដោះស្រាយវិវាទក្រៅប្រពន្ធ័តុលាការដែលកើតមាននៅថ្នាក់មូលដ្ឋាន គឺកុំអោយគេឈ្លោះគ្នាផង និងបានបុណ្យកុសលផងដោយប្រជាពលរដ្ឋទទួលបាននូវភាពសុខដុមក្នុងសង្គម។ លោកបន្តថា ជាមន្ត្រីដោះស្រាយវិវាទកុំបង្កផលលំបាកដល់ប្រជាពលរដ្ឋត្រូវយល់ថា យើងប្រៀបបានជាទូក ចំណែកប្រជាពលរដ្ឋជាទឹក ទឹកភ្នែករាស្ត្រអាចក្លាយជាទឹកស្ទឹង ទឹកទន្លេអាចពន្លិចទូកបាន។ មន្ត្រីត្រូវប្រកាន់ក្រមសីលធម៍ បើដោះស្រាយវិវាទប៉ះសាច់ញាតិខ្លួនឯងត្រូវដកខ្លួនថយទុកឲ្យអ្នកផ្សេងគេដោះស្រាយវិញ។ ពាក្យស្មើភាពគ្មានទេក្នុងសង្គម ពាក្យស្មើភាពគ្រាន់តែជាទ្រឹស្តីប៉ុណ្ណោះ មានតែពាក្យសមភាព៕

អត្ថបទ៖ ស្រីរ័ត្ន