គណៈប្រតិភូ ៨ ប្រទេស​ បំពេញទស្សនកិច្ចឈ្វេងយល់សកម្មភាពមីននៅកម្ពុជា

គណៈប្រតិភូនាយទាហានជាន់ខ្ពស់ការពារជាតិ​ នាយទាហាន​ ពលទាហានមកពី​ប្រទេសឥណ្ឌា​ ម៉ារ៉ុក​ ស្រីលង្កា​ បង់ក្លាដេស​ អារ៉ាប៊ីសាអ៊ូឌីត​ សំប៊ី​ តង់ហ្សានី​ និង​ប្រេស៊ីល​ អមដោយនិស្សិតមកពីមហាវិទ្យាល័យការពារជាតិឥណ្ឌា បានមកបំពេញទស្សនកិច្ចសិក្សាឈ្វេងយល់ពីវិស័យសកម្មភាពមីននៅកម្ពុជា។ ទស្សនកិច្ចនេះ ដឹកនាំដោយ មន្រ្តីជាន់ខ្ពស់ការពារជាតិឥណ្ឌា ឧត្តមសេនីយ៍ទោ Mukesh Aggarwal។

ទស្សនកិច្ចឈ្វេងយល់នេះ ធ្វើឡើងកាលពីរសៀលថ្ងៃទី០៣ ខែកញ្ញា ឆ្នាំ២០២៤ នៅស្នាក់ការអាជ្ញាធរមីន ដោយទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានទទួលជួបសវនាការជាមួយគណៈប្រតិភូនាយទាហានជាន់ខ្ពស់ការពារជាតិ​ នាយទាហាន​ ពលទាហាន។

ក្នុងជំនួបនោះលោក លី ធុជ បានលើកឡើងអំពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា រួមជាមួយប្រទេសជាមិត្ត និងដៃគូអភិវឌ្ឍន៍ ក្នុងការដោះស្រាយបញ្ហាមីន និងសំណល់ជាតិផ្ទុះពីសង្រ្គាម រយៈពេលជាង ៣០ ឆ្នាំ ដោយទទួលបាននូវលទ្ធផលជាផ្លែផ្កា និងទទួលបានការវាយតម្លៃខ្ពស់ពីសហគមន៍អន្តរជាតិ។

ទេសរដ្ឋមន្រ្តី បានគូសបញ្ជាក់ថា ប្រទេសឥណ្ឌា គឺជាប្រទេសមួយដែលបានរួមចំណែកដល់ការងារបោសសម្អាតមីនមនុស្សធម៌ និងគាំពារដល់ជនមានពិការភាពដោយសារមីនតាមរយៈការផ្តល់នូវអវយវៈសិប្បនិមិត្ត ចាប់តាំងពីឆ្នាំ២០២២ អំឡុងពេលដែលវិស័យសកម្មភាពបានទទួលការគាំទ្រយ៉ាងផុសផុលពីគ្រប់មជ្ឈដ្ឋានក្នុងប្រទេសកម្ពុជា ក្រោមការអំពាវនាវរបស់សម្តេចតេជោ ហ៊ុន សែន អតីតនាយករដ្ឋមន្រ្តី។

បើតាមលោក លី ធុជ ស្ថានទូតឥណ្ឌាប្រចាំកម្ពុជា ក្រោមកិច្ចសហការជាមួយអាជ្ញាធរមីន បានជ្រើសយកខេត្តកោះកុងក្នុងការប្រើប្រាស់ជំនួយមនុស្សធម៌របស់រដ្ឋាភិបាលឥណ្ឌាសម្រាប់ការងារបោសសម្អាតមីន។ ក្នុងនោះភូមិចំនួន ៤ ស្ថិតក្នុងស្រុកបុទុមសាគរ បានបោសសម្អាតរួច ក្រោមការគាំទ្រពី “គម្រោងផ្តល់ផលរហ័ស” ដំណាក់កាលទី១ ហើយបច្ចុប្បន្ននេះ ស្ថិតក្នុងដំណាក់កាលទី២ ឥណ្ឌាបានគាំទ្រដល់ការបោសសម្អាតមីនក្នុងស្រុកចំនួន ០៤ បន្ថែមទៀតក្នុងខេត្តកោះកុង រួមមានស្រុកស្រែអំបិល ស្រុកបុទុមសាគរ ស្រុកថ្មបាំង និងស្រុកកោះកុង ដែលគ្រោងប្រកាសជាស្រុកអស់មីនក្នុងឆ្នាំ២០២៥ ខាងមុខ។

តាងនាមសម្តេចធិបតី ហ៊ុន ម៉ាណែត នាយករដ្ឋមន្រ្តី, ទេសរដ្ឋមន្រ្តី លី ធុជ បានថ្លែងអំណរគុណយ៉ាងជ្រាលជ្រៅជូនចំពោះរដ្ឋាភិបាល និងប្រជាជនឥណ្ឌា ដែលជួយឧបត្ថម្ភគាំទ្រដល់វិស័យសកម្មភាពមីនមនុស្សធម៌នៅកម្ពុជា ដោយចាត់ទុកថា ការរួមចំណែករបស់ប្រទេសឥណ្ឌា ពិតជាមានសារៈសំខាន់ឆ្លើយតបនឹងតម្រូវការជាក់ស្តែងរបស់សហគមន៍មូលដ្ឋាន និងជនមានពិការភាព។

គួរជម្រាបថា កម្ពុជាត្រូវបានទទួលស្គាល់ថាជាប្រទេសមួយដែលបានអនុវត្តដោយជោគជ័យនូវសកម្មភាពដោះមីន ការផ្តល់ដីប្រកបដោយសុវត្ថិភាពដល់ប្រជាជន និងរួមចំណែកក្នុងការអភិវឌ្ឍន៍សេដ្ឋកិច្ច។
ជាងនេះទៅទៀត អាជ្ញាធរមីនកម្ពុជាបាននិងកំពុងចែករំលែកយ៉ាងសកម្មនូវជំនាញរបស់ខ្លួនតាមរយៈការបញ្ជូនមន្ត្រីបច្ចេកទេសទៅក្រៅប្រទេសដើម្បីផ្តល់ការបណ្តុះបណ្តាល និងផ្លាស់ប្តូរចំណេះដឹងជាមួយ​ប្រទេស​ផ្សេង​ទៀត៕