សម្តេចធិបតីយល់ព្រមឱ្យរដ្ឋមន្រ្តីមហាផ្ទៃដកចោលក្បាលម៉ាស៊ីនដឹកនាំពន្ធនាគារព្រៃស

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានយល់ព្រមឱ្យរដ្ឋមន្ត្រីក្រសួងមហាផ្ទៃ ពិនិត្យដោះដូរក្បាលម៉ាស៊ីនដឹកនាំពន្ធនាគារព្រៃស ឬមណ្ឌលអប់រំកែប្រែទី១ ដើម្បីដោះស្រាយបញ្ហាអសកម្មនានាដែលបាននិងកំពុងកើតឡើងនាពេលបច្ចុប្បន្ន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងពិធីអបអរសាទរខួបទី៣០ នៃការបង្កើតកងពលតូចលេខ៧០ នាព្រឹកថ្ងៃទី១៥ ខែតុលា​ ឆ្នាំ២០២៤ សម្ដេចធិបតីនាយឧត្ដមសេនីយ៍ បញ្ជាដូច្នេះ៖«ម្សិលមិញឯកឧត្ដម ស​ សុខា បានរាយការណ៍មក ខ្ញុំឯកភាព ទី១គឺពង្រឹងម១នេះ(មណ្ឌលអប់រំកែប្រែទី១ ឬហៅថាពន្ធនាគារព្រៃស) តាមរយៈការផ្លាស់ប្ដូរក្បាលម៉ាស៊ីនដឹកនាំតែម្ដង! ដើម្បីពង្រឹងស្ថាប័ននេះ។ ចឹងក៏បានត្រៀម ហើយយើងត្រូវធ្វើយ៉ាងណា ធានានូវការពង្រឹងសន្តិសុខ(ក្នុងពន្ធនាគារ) គ្រប់ទិដ្ឋភាពទាំងអស់ត្រូវតែធ្វើ។»។

សម្ដេចធិបតី ហ៊ុន ម៉ាណែត យល់ព្រមឱ្យដកក្បាលម៉ាស៊ីនដឹកនាំពន្ធនាគារព្រៃសដូច្នេះ បន្ទាប់ពីសម្ដេចបានឃើញនូវវីដេអូ ជនជាតិចិន និងជនជាតិខ្មែរ ដែលកំពុងជាប់ឃុំ ធ្វើពិធីជប់លៀង រាំលេង ដែលអ្នកចែកចាយវីដេអូអះអាងថានៅក្នុងមណ្ឌលអប់រំកែប្រែទី១​ឬហៅថាពន្ធនាគារព្រៃស ដែលគេប​ង្ហោះលើបណ្ដាញសង្គមហ្វេសប៊ុក។ ភ្លាមៗបន្ទាប់ពីសម្ដេចឃើញវីដេអូនេះ សម្ដេចធិបតី បានបញ្ជាឱ្យឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ពិនិត្យ ស្រាវជ្រាវលើបញ្ហានេះ ហើយកែទម្រង់ ពង្រឹងពន្ធនាគារនៅទូទាំងប្រទេស។

គួររម្លឹកថា បន្ទាប់ពីលេចឡើងនូវវីដេអូជនជាតិចិន និងជនជាតិខ្មែរ ដែលកំពុងជាប់ឃុំ ធ្វើពិធីជប់លៀង រាំលេង ក្នុងមណ្ឌលអប់រំកែប្រែរួចមក អគ្គនាយកដ្ឋានពន្ធនាគារ នៃក្រសួងមហាផ្ទៃ បានចាត់មន្ត្រីជំនាញចុះធ្វើអធិការកិច្ចស្រាវជ្រាវពី ឫសគល់នៃហេតុការណ៍ លើអ្នកពាក់ព័ន្ធ ទាំងជនជាប់ឃុំ និងមន្ត្រីពន្ធនាគារ នៅមណ្ឌលអប់រំកែប្រែទី១ តាំងពីថ្ងៃអាទិត្យ ទី១៣ ខែតុលា ឆ្នាំ២០២៤ និងបន្តការងារដល់ថ្ងៃទី១៤ ខែតុលា ឆ្នាំ២០២៤  ដើម្បីធានាបាននូវសុក្រិតភាព តម្លាភាព ស្របតាមច្បាប់ស្តីពីពន្ធនាគារ បទបញ្ជាផ្ទៃក្នុង និងនីតិវិធីពន្ធនាគារ ។

អគ្គនាយកដ្ឋានពន្ធនាគារ បានអះអាងថា ធ្វើការបំភ្លឺជាសាធារណៈនូវលទ្ធផលស្តីពីការធ្វើអធិការកិច្ច និងស្រាវជ្រាវរបស់ក្រុមការងារជំនាញក្រោយកិច្ចការនេះត្រូវបានបិទបញ្ចប់ដោយជោគជ័យ។

ជាមួយគ្នានេះ នៅល្ងាចថ្ងៃទី១៤ ខែតុលា លោកអភិសន្តិបណ្ឌិត ស សុខា រដ្ឋមន្ត្រីក្រសួងមហាផ្ទៃ បានបើកកិច្ចប្រជុំបន្ទាន់មួយ ត្រួតពិនិត្យការងារតាមបណ្តាមណ្ឌលពន្ធនាគារ នៃអគ្គនាយកដ្ឋានពន្ធនាគារ ក្រសួងមហាផ្ទៃ នៅសាលប្រជុំទីស្តីការក្រសួងមហាផ្ទៃ៕

ដោយ៖ ង៉ិល ណារ៉ាត់