ព័ត៌មានជាតិ

ទិន្នផលផលិតកម្មអាស៊ាន ធ្លាក់ចុះជាលើកដំបូងក្នុងរយៈពេល៣ឆ្នាំ

បានផុស

១ year មុន

នៅ

ថ្ងៃពុធ ៣០ តុលា ២០២៤

ដោយ

ទិន្នន័យស្ទង់មតិលើសន្ទស្សន៍អ្នកគ្រប់គ្រងការបញ្ជាទិញ（PMI）របស់ក្រុមហ៊ុនទីផ្សារមូលធន S&P Global បានបង្ហាញថា ទិន្នផលផលិតកម្មនៅអាស៊ានបានធ្លាក់ចុះក្នុងខែកញ្ញា ដែលវាជាការធ្លាក់ចុះជាលើកដំបូងក្នុងរយៈពេល៣ឆ្នាំ។ នេះបើតាមការចុះផ្សាយរបស់ទស្សនាវដ្តីពាណិជ្ជកម្ម Manufacturing Asia កាលពីថ្ងៃអង្គារ។

ទិន្នន័យបង្ហាញថា PMI របស់អាស៊ាន បានធ្លាក់ចុះដល់ ៥០,០ ពិន្ទុ នៅខែកញ្ញា ពី ៥១,១ នៅខែសីហា។ ទោះបីសន្ទស្សន៍នេះត្រូវបានកត់ត្រាលើសពីចំណុចមធ្យម ៥០,០ ពិន្ទុ ក្នុងរយៈពេល៩ខែជាប់ៗគ្នា ក៏ដោយ ទិន្នន័យចុងក្រោយបំផុតបានបង្ហាញថា ស្ថានភាពផលិតកម្មអាស៊ានមានភាពប្រសើរឡើងតិចតួច ហើយខ្សោយបំផុតរាប់ចាប់តាំងពីខែកុម្ភៈ។

ការធ្លាក់ចុះនេះ រួមចំណែកមួយភាគធំដោយការចុះខ្សោយនៃនិន្នាការតម្រូវការ ខណៈកំណើននៃការបញ្ជាទិញថ្មីក៏បានថមថយ។

អ្នកស្រី Maryam Baluch សេដ្ឋវិទូនៅក្រុមហ៊ុន S&P Global Market Intelligence បានថ្លែងថា៖ «ទិន្នន័យ PMI សម្រាប់អាស៊ាន បានបង្ហាញពីការថមថយជិតដល់កម្រិតខ្សោយក្នុងខែកញ្ញា។ ទិន្នផលបានធ្លាក់ចុះ ខណៈការធ្លាក់ចុះខ្លាំងនៃទំហំពាណិជ្ជកម្មដាក់បន្ទុកលើតម្រូវការរួម ដែលមានកំណើនតិចតួច»។

យ៉ាងណាមិញ អ្នកស្រីបានថ្លែងបន្តថា៖ «អត្រាមានការងារធ្វើបានកើនឡើង ហើយទំនុកចិត្តក៏មានភាពប្រសើរឡើង ដែលបង្ហាញថា បណ្ដាក្រុមហ៊ុននៅតែរំពឹងពីទិន្នផលផលិតកម្មខ្ពស់ក្នុងរយៈពេល ១២ ខែខាងមុខនេះ»។ ក្នុងកំណត់សម្គាល់ជាវិជ្ជមាន អ្នកស្រីបានបន្ថែមថា សម្ពាធអតិផរណាក៏បានថយចុះនៅក្នុងខែកញ្ញា៕