ព័ត៌មានជាតិ

ប.ស.ស បន្តពិភាក្សាជាមួយភាគីពាក់ព័ន្ធអំពី“សុវត្ថិភាពរថយន្តដឹកកម្មករ-និយោជិត”

បានផុស

១ year មុន

នៅ

ថ្ងៃអង្គារ ២៤ ធ្នូ ២០២៤

ដោយ

លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស និងជាប្រធានក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករ-និយោជិត (ស.ផ.ក) តំណាង លោក ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស នៃក្រសួងការងារ និងបណ្ដុះបណ្ដាលវិជ្ជាជីវៈ កាលពីរសៀលថ្ងៃទី ២៣ ខែធ្នូ ឆ្នាំ ២០២៤ បានដឹកនាំក្រុមការងារ ស.ផ.ក បន្តប្រជុំពិភាក្សាជាមួយអគ្គលេខាធិការ នៃគណៈកម្មាធិការជាតិសុវត្ថិភាពចរាចរណ៍ផ្លូវគោកស្ដីពី “សុវត្ថិភាពរថយន្តដឹកកម្មករ-និយោជិត” ដោយមានការចូលរួមពីតំណាងអភិបាល នៃគណៈអភិបាលរាជធានី ខេត្ត និងតំណាងស្នងការនគរបាលរាជធានី ខេត្តទាំង ១៦ រួមមាន រាជធានីភ្នំពេញ ខេត្តកំពង់ស្ពឺ កណ្តាល ស្វាយរៀង កំពង់ឆ្នាំង តាកែវ កំពង់ចាម ព្រះសីហនុ កោះកុង កំពត បន្ទាយមានជ័យ ត្បូងឃ្មុំ ព្រៃវែង ពោធិ៍សាត់ កំពង់ធំ និងខេត្តកែប ប្រមាណជា ៥០ រូប។

កិច្ចប្រជុំពិភាក្សាខាងលើ ធ្វើឡើងនៅទីស្ដីការក្រសួងមហាផ្ទៃ ដែលដឹកនាំដោយ លោកស្រី មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការ នៃគណៈកម្មាធិការជាតិសុវត្ថិភាពចរាចរណ៍ផ្លូវគោក និងលោកនាយឧត្ដមសេនីយ៍ ហ៊ឹម យ៉ាន រដ្ឋលេខាធិការក្រសួងមហាផ្ទៃ និងជាអគ្គលេខាធិការរង នៃគណៈកម្មាធិការជាតិសុវត្ថិភាពចរាចរណ៍ផ្លូវគោក។

នៅក្នុងកិច្ចប្រជុំនាឱកាសនោះដែរ ក្រុមការងារ ស.ផ.ក បានធ្វើបទបង្ហាញស្ដីពីការជំរុញផ្លាស់ប្ដូររថយន្តប្រភេទដឹកទំនិញមកប្រភេទដឹកអ្នកដំណើរ ឬដោយកែច្នៃឱ្យមានកៅអីអង្គុយសមរម្យ ជូនដល់អគ្គលេខាធិការ នៃគណៈកម្មាធិការជាតិសុវត្ថិភាពចរាចរណ៍ផ្លូវគោកផងដែរ៕

អត្ថបទ ៖ សំអឿន