ក្រសួងព័ត៌មានគ្រោងបើក «យុទ្ធនាការប្រឆាំងព័ត៌មានក្លែងក្លាយ» ចុងខែនេះ ដើម្បីទប់ស្កាត់ការរាលដាលព័ត៌មានមិនពិត

រដ្ឋមន្ត្រីក្រសួងព័ត៌មាន លោក នេត្រ ភក្ត្រា បានលើកឡើងក្រសួងគ្រោងនឹងបើក «យុទ្ធនាការប្រឆាំងព័ត៌មានក្លែងក្លាយ» នាចុងខែមករា ឆ្នាំ២០២៥នេះ ដើម្បីបញ្ជ្រាបការយល់ដឹងដល់ប្រជាជនចំពោះព័ត៌មានក្លែងក្លាយ និងកុំឱ្យប្រជាជនងាយលង់ជឿជាមួយព័ត៌មានប្រឌិត ដែលមានប្រភពមិនច្បាស់លាស់។ លោកលើកឡើងនេះ នាថ្ងៃទី១៥ ខែមករា ឆ្នាំ២០២៥ ក្នុងពិធីផ្សព្វផ្សាយ «ការលើកកម្ពស់វិស័យទេសចរណ៍ និងការប្រឆាំងព័ត៌មានក្លែងក្លាយ»។

លោក នេត្រ ភក្ត្រា បាននិយាយថា៖ «ទាក់ទងជាមួយនឹងព័ត៌មានក្លែងក្លាយនេះ ដែលថា តើយុទ្ធនាការរបស់យើងធ្វើឡើងនៅពេលណា? យើងនឹងធ្វើឡើងនៅក្នុងខែមករានេះ ហើយប្រហែលជាក្រោយសន្និបាតរបស់ក្រសួងដែលធ្វើចាប់ពីថ្ងៃទី២០ ដល់២២។ ចាប់ពីហ្នឹងយើងនឹងបើកយុទ្ធនាការតែម្តង នូវយុទ្ធនាការប្រឆាំងព័ត៌មានក្លែងក្លាយ ដែលមានគោលបំណងក្នុងការផ្តល់ចំណេះដឹងទៅដល់ប្រជាពលរដ្ឋឱ្យគាត់យល់ ថាតើអ្វីទៅដែលហៅថាព័ត៌មានក្លែងក្លាយ? »។

លោករដ្ឋមន្ត្រីបានបន្តថា យុទ្ធនាប្រឆាំងព័ត៌មានក្លែងក្លាយនេះ ដើម្បីឱ្យពលរដ្ឋបានដឹងពីព័ត៌មានក្លែងក្លាយ ហើយមុននឹងជឿព័ត៌មានអ្វីមួយ តើត្រូវឈរលើមូលដ្ឋានអ្វីខ្លះ? ដូចជាការផ្ទៀងផ្ទាត់ប្រភព ការពិនិត្យមើលថា តើប្រភពត្រឹមត្រូវទេ? បន្ថែមពីនេះ យុទ្ធនាការនេះ ក៏មានបំណង ទប់ស្កាត់ និងបង្ការដើម្បីកុំឱ្យមានការផ្សព្វផ្សាយនូវព័ត៌មានក្លែងក្លាយកាន់តែច្រើន។ ត្រង់ចំណុចនេះ លោកបញ្ជាក់ថា ក្រសួងបានផ្តោតលើសន្តិសុខព័ត៌មាន៣សំខាន់ គឺការធានាសិទ្ធិទទួលបានព័ត៌មានរបស់ពលរដ្ឋ, គុណភាពព័ត៌មាន និងសុវត្ថិភាពព័ត៌មាន ព្រោះបច្ចុប្បន្នលោកថា សម្បូរដោយព័ត៌មានក្លែងក្លាយច្រើន។ លោក បានសង្កត់ធ្ងន់ថា នៅពេលដែលមានព័ត៌មានក្លែងក្លាយកើតឡើង អ្វីដែលត្រូវចាត់វិធានការបន្ទាន់ គឺការឆ្លើយតប ប្រតិកម្ម ច្រានចោលនូវព័ត៌មានមិនពិតនោះ ហើយបកស្រាយព័ត៌មានពិតមកវិញ។

ចំពោះសកម្មភាពនៃយុទ្ធនាការនេះ រដ្ឋមន្ត្រីក្រសួងព័ត៌មាន បានឱ្យដឹងថា ទី១ គឺសកម្មភាពរុញតាមប្រព័ន្ធអនឡាញ។ ទី២ ការធ្វើសកម្មភាពតាមរយៈពាក្យស្លោក ការអប់រំ​ការបណ្តុះបណ្តាល ផ្សព្វផ្សាយ និងការផ្តល់នូវគំនិត និងចំណេះជំនាញដើម្បីឱ្យពលរដ្ឋដឹងកាន់តែច្រើន ដើម្បីងាយស្រួលបែងចែកច្បាស់ថា​តើព័ត៌មានមួយណាពិត និងព័ត៌មានមួយណាក្លែងក្លាយ។ ជាមួយគ្នានេះ ចំពោះបញ្ហាព័ត៌មានក្លែងក្លាយ គឺមិនមែនកើតមានតែនៅកម្ពុជាឡើយ ពោល គឺកើតមានទូទាំងពិភពលោកដែលត្រូវមានវិធានការលើបញ្ហាទាំងនេះ។

សូមជម្រាបថា រដ្ឋមន្រ្តីក្រសួងព័ត៌មាន ក៏បានបញ្ជាក់ក្នុងកម្មវិធីខាងលើដែលថា ក្នុងឆ្នាំ២០២៣ មានព័ត៌មានក្លែងក្លាយចំនួន ៣,២០៨ករណី ដែលត្រូវបានផ្សព្វផ្សាយ ហើយក្នុងឆ្នាំ២០២៤ មានព័ត៌មានក្លែងក្លាយចំនួន ៣,៦៥១ករណី ដែលមានការកើនឡើងចំនួនជាង ៤០០ករណី បើប្រៀបនឹងឆ្នាំ២០២៣ ។ ពោល ក្នុង១ខែ យ៉ាងហោចណាស់មានព័ត៌មានក្លែងក្លាយចំនួន ២០០ ទៅ៣០០ករណី ត្រូវបានផ្សព្វផ្សាយ។ ឆ្លើយតបនឹងបញ្ហានេះ ក្រសួងព័ត៌មាន ក៏បានសហការជាមួយក្រសួងពាក់ព័ន្ធ ដូចជា ក្រសួងមហាផ្ទៃ និងក្រសួងប្រៃសណីយ៍និងទូរគមនាគមន៍ ផងដែរ ក្នុងការបង្ក្រាប ទប់ស្កាត់លើករណីនេះ៕

ដោយ៖ អុន ស្រីមាន