មន្ទីរពេទ្យបង្អែកខេត្តមណ្ឌលគិរី អំពាវនាវដល់ប្រជាពលរដ្ឋ ចូលរួមបរិច្ចាគឈាមស្របពេលថ្ងៃ ១៤កុម្ភៈ

លោកវេជ្ជបណ្ឌិត ទុយ ស្រស់ ប្រធានមន្ទីរពេទ្យបង្អែកខេត្តមណ្ឌលគិរី បានប្រាប់សាព័ត៌មាន «កម្ពុជាថ្មី» នៅទី១១ ខែកុម្ភៈ ឆ្នាំ២០២៥ ថា មន្ទីរពេទ្យបង្អែកខេត្ត ធ្លាប់បានអំពាវនាវដល់សប្បុរសជន ឱ្យចូលរួមបរិច្ចាគឈាម ដើម្បីជួយសង្គ្រោះអ្នកជំងឺដែលកំពុងសម្រាកនៅមន្ទីរពេទ្យ។​ យ៉ាងណាមិញ ស្របពេលទិវានៃក្តីស្រលាញ់ដែលនឹងឈានជិតមកដល់នាពេលខាងមុខនេះដែរ ក្នុងនាមមន្ទីរពេទ្យបង្អែកខេត្ត បានអំពាវនាវបន្ថែមទៀតដល់សប្បុរសជន ដែលស្ម័គ្រចិត្តចូលរួមបរិច្ចាគឈាមទាំងអស់គ្នា ដើម្បីបង្ហាញទឹកចិត្ត និងក្តីស្រលាញ់ចំពេលថ្ងៃបុណ្យទិវានៃក្ដីស្រឡាញ់នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត បានបញ្ជាក់ថា អ្នកដែលអាចចូលរួមបរិច្ចាគផ្តល់ឈាមបាន ត្រូវមានអាយុចាប់១៨ ដល់ ៦០ឆ្នាំ និងមានសុខភាពល្អ។ បើមនុស្សប្រុសអាចផ្តល់ឈាមចន្លោះពី ៣ខែម្តង រីឯមនុស្សស្រីចន្លោះពី ៤ខែម្តង។ ការផ្តល់ឈាមនេះ មានអត្ថប្រយោជន៍ច្រើនសម្រាប់រាងកាយមនុស្ស ជួយឱ្យយើងដឹងពីជំងឺផ្សេងៗ ដូចជា រលាកថ្លើមប្រភេទ A B C ជំងឺអេដស៍ កាត់បន្ថយការឡើងទម្ងន់ ជួយឱ្យដំណើរការបេះដូងល្អ កាត់បន្ថយជាតិខ្លាញ់នៅក្នុងឈាម កាត់បន្ថយភាពតានតឹង កាត់បន្ថយជាតិដែកដែលធ្វើឱ្យប៉ះពាល់ដល់លំពែង និងថ្លើម ជួយឱ្យមានគ្រាប់ឈាមល្អ។

លោកវេជ្ជបណ្ឌិតរូបនេះ បានបន្ថែមថា «គ្រាប់ឈាមក្នុងរាងកាយមនុស្សយើងមានអាយុត្រឹមតែ ១២០ថ្ងៃ ប៉ុណ្ណោះ ហើយបើយើងបានបរិច្ចាគផ្តល់ឈាមចាស់ នឹងផ្លាស់មកកោសិកាគ្រាប់ឈាមថ្មីមកវិញ ជាពិសេស គឺធ្វើឱ្យយើងមានអារម្មណ៍ល្អសប្បាយចិត្តពេលបាន បរិច្ចាគឈាមជួយសង្គ្រោះអ្នកជំងឺ នឹងអំពើល្អក្នុងសង្គម»។

ការអំពានាវចំថ្ងៃបុណ្យទិវានៃក្ដីស្រឡាញ់នេះ គឺចង់ឱ្យប្រជាពលរដ្ឋ ក៏ដូចជាសប្បុរសជន បរិច្ចាគឈាមហើយនឹកដល់ថ្ងៃ ១៤កុម្ភៈ ជាថ្ងៃដែលខ្លួនបានធ្វើអំពើល្អ ហើយបានសង្គ្រោះមនុស្សដែលទន្ទឹងរងចាំការឧបត្ថម្ភឈាម ដើម្បីសង្រ្គោះជីវិតផងដែរ៕

អត្ថបទ៖រៀម សុខហេង