ផ្លូវមួយខ្សែពីមុខលោកតាដំបងក្រញូងពោរពេញដោយជង្ហុក កំពុងអ៊ុតកៅស៊ូ​ថ្មីឡើងវិញ

ផ្លូវមួយខ្សែចាប់ពីមុខរូបសំណាកលោកតាដំបងក្រញូង ទៅទល់នឹងរង្វង់មូលព្រាបស ដែលពោរពេញទៅដោយជង្ហុកបង្កការលំបាកដល់ការធ្វើដំណើររបស់ប្រជាពលរដ្ឋ បច្ចុប្បន្នកំពុង​ជួសជុលនិងក្រាលកៅស៊ូឡើងវិញ។

ជាងមួយសប្តាហ៍​នេះ ក្រុមការងារ​សាធារណការ បានដាក់គ្រឿង​ចក្រគាស់​កកាយ​ទៅលើកំណាត់​ផ្លូវដែល​ខ្ទេចខ្ទី​ដោយ​សារ​ការ​ដាក់​បង្កប់​ប្រព័ន្ធលូក្រោមដី ដែល​ផ្លូវនេះ​ស្ថិតក្នុងភូមិ ១៣ មករា សង្កាត់​ព្រែកព្រះស្ដេច ក្រុងបាត់ដំបង ទល់​មុខ​ព្រលាន​យន្តហោះ​បែកចាន ដើម្បី​អ៊ុតកៅស៊ូថ្មីឡើងវិញ បង្កការងាយ​ស្រួលដល់ការ​ធ្វើដំណើរ​របស់​ប្រជាពលរដ្ឋ។

សកម្មភាព​ដែល​គ្រឿង​ចក្រ​​កំពុង​ធ្វើការ នៅ​លើ​កំណត់​​ផ្លូវកណ្ដាល​ក្រុង​បាត់ដំបង គឺជាសកម្មភាព​មួយ​រស់រវើក និង​បន្ទាន់ជាទីបំផុត ព្រោះផ្លូវមួយខ្សែនេះ គឺជាផ្លូវភ្លោះដើម្បី​បញ្ចៀស​នូវការ​ប៉ះទង្គិច ឬគ្រោះថ្នាក់ចរាចរណ៍​ជាដើម។ ប៉ុន្តែ ពេល​ក្រុមការងារកំពុងធ្វើការយ៉ាងសកម្មនេះ គឺការបើកបរ និងការធ្វើចរាចរណ៍ ត្រូវ​បញ្ចៀស​ចូលរួមទៅលើកំណាត់ផ្លូវតែមួយខ្សែ ដូច្នេះវា​អាចបង្ក​ឲ្យមាន​ការ​កកស្ទះ​ជាដើម។

អត្ថបទ : សោ និយមរ័ត្ន