លំហាត់ហ្វឹកហ្វឺនយោធាកម្ពុជា-អាមេរិក រំពឹងថា អាចនឹងធ្វើឡើងវិញក្នុងឆ្នាំ២០២៦

កម្ពុជា សង្ឃឹមថា លំហាត់ហ្វឹកហ្វឺនយោធាមួយសហរដ្ឋអាមេរិក អាចនឹងត្រូវធ្វើឡើងវិញនៅឆ្នាំក្រោយ ខណៈភាគីទាំងពីរ បានបង្ហាញឆន្ទៈបន្តកសាងទំនុកចិត្តជាមួយគ្នា ក៏ដូចជាការបង្កើនកិច្ចសហប្រតិបត្តិការយោធារវាងកងទ័ពប្រទេសទាំងពីរ ពិសេសការស្វះស្វែងពិនិត្យលទ្ធភាពរៀបចំលំហាត់ហ្វឹកហ្វឺនរួមគ្នា ក្រោយផ្អាកតាំងពីឆ្នាំ២០១៧។

ក្ដីសង្ឃឹមនេះ ត្រូវបានបង្ហាញដោយអគ្គមេបញ្ជាការកងទ័ពកម្ពុជា នាយឧត្តមសេនីយ៍ វង្ស ពិសេន ក្នុងពេលទទួលនាយការិយាល័យអនុព័ន្ធយោធាសហរដ្ឋអាមេរិកប្រចាំកម្ពុជា លោកវរសេនីយ៍ទោ Kyle Saltzman នាព្រឹកថ្ងៃទី២៥ មីនា ឆ្នាំ២០២៥ នៅអគ្គមេបញ្ជាការដ្ឋាននៃកងយោធពលខេមរភូមិន្ទ។

នាយឧត្តមសេនីយ៍ វង្ស ពិសេន សង្ឃឹមថា នៅឆ្នាំ២០២៦ខាងមុខ កងទ័ពនៃប្រទេសទាំងពីរ នឹងបន្តធ្វើលំហាត់ហ្វឹកហ្វឺនរួមគ្នាឡើងវិញ ក៏ដូចជាការផ្លាស់ប្តូរព័ត៌មានទប់ស្កាត់រាល់បទល្មើសឧក្រិដ្ឋកម្មឆ្លងដែន ការប្រឆាំងអំពើភេរវកម្ម និងការបន្តបេសកកម្មរុករកអដ្ឋិធាតុជនជាតិអាមេរិកបាត់ខ្លួននៅកម្ពុជា។

នាយឧត្តមសេនីយ៍ អគ្គមេបញ្ជាការ ដាក់ការសង្ឃឹមដូច្នេះ ដោយកត់សម្គាល់ឃើញថា កិច្ចសហប្រតិបត្តិការរវាងកម្ពុជា និងសហរដ្ឋអាមេរិក មានភាពល្អប្រសើរ ក្នុងរយៈពេលចុងក្រោយនេះ ជាពិសេសក្រោយដំណើរមកកាន់កម្ពុជារបស់អតីតរដ្ឋមន្ត្រីការពារជាតិសហរដ្ឋអាមេរិក លោក ឡយ អូស្ទីន ក៏ដូចជាដំណើរទស្សនកិច្ចមន្ត្រីយោធាជាន់ខ្ពស់ប្រទេសទាំងពីរ ក៏ដូចជាការចូលចតនាវាសហរដ្ឋអាមេរិកនៅកំពង់ផែកម្ពុជា​ជាដើម។

វរសេនីយ៍ទោ Kyle Saltzman នាយការិយាល័យអនុព័ន្ធយោធាសហរដ្ឋអាមេរិក បានអរគុណលោកអគ្គមេបញ្ជាការកងយោធពលខេមរភូមិន្ទ ក្នុងការគាំទ្រដល់អនុព័ន្ធយោធាអាមេរិក ដែលកំពុងធ្វើការដើម្បីពង្រឹងទំនាក់ទំនងប្រទេសទាំងពីរឱ្យប្រសើរឡើងវិញ ហើយកិច្ចការនេះស្តែងឡើងតាមរយៈការទទួលស្វាគមន៍ដល់ដំណើរទស្សនកិច្ចនៅកម្ពុជារបស់មេបញ្ជាការឥណ្ឌូប៉ាស៊ីហ្វិក និងមេបញ្ជាការកងទ័ពជើងគោកសហរដ្ឋអាមេរិកប្រចាំតំបន់ប៉ាស៊ីហ្វិក កាលពីពេលថ្មីៗនេះ។

ជាការរម្លឹក ជំនួបកាលពីខែធ្នូ ឆ្នាំ២០២៤ ក្នុងឱកាសដែលនាយឧត្តមនាវី សាមូអែល ជេ.ប៉ាប៉ារូ (Samuel J.Paparo) មេបញ្ជាការឥណ្ឌូប៉ាស៊ីហ្វិកសហរដ្ឋអាមេរិក ដឹកនាំគណៈប្រតិភូមកបំពេញទស្សនកិច្ចនៅកម្ពុជា, ភាគទាំងពីរ បានជជែកគ្នាលើការជំរុញ និងលើកកម្ពស់កិច្ចសហប្រតិបត្តិការរវាងប្រទេសទាំងពីរជាពិសេសទៅលើកិច្ចសហប្រតិបត្តិការយោធា។

ពេលជួបជាមួយមេបញ្ជាការឥណ្ឌូប៉ាស៊ីហ្វិកសហរដ្ឋអាមេរិក នាយឧត្តមសេនីយ៍ អគ្គមេបញ្ជាការទ័ពកម្ពុជា ចង់ឱ្យភាគីអាមេរិកបង្កើតក្រុមការងារសន្ទនាទ្វេភាគីជាមួយកម្ពុជា ក្នុងគោលបំណងងាយស្រួលប្រាស្រ័យទាក់ទងគ្នា ជាអាទិ៍ ការផ្លាស់ប្តូរទស្សនកិច្ចគ្រប់កម្រិត គ្រប់ប្រភេទទ័ព បង្កើនវគ្គបណ្តុះបណ្តាលដល់កងទ័ពកម្ពុជា ហើយជាពិសេសគឺការពិនិត្យពិភាក្សាលទ្ធភាពធ្វើលំហាត់ហ្វឹកហ្វឺនរួមឡើងវិញ គឺសមយុទ្ធឆ្មាំអង្គរ និងសមយុទ្ធទេវតាប៉ាស៊ីហ្វិក។ ខណៈលោកនាយឧត្តមនាវី សាមូអែល ជេ.ប៉ាប៉ារូ ក៏បានបង្ហាញពីបំណងនៅក្នុងការធ្វើឱ្យប្រសើរឡើងនូវទំនាក់ទំនងកងទ័ពប្រទេសទាំងពីរ ពិសេសក្នុងការធ្វើសមយុទ្ធរួមគ្នាឡើងវិញនេះតែម្ដង៕