ក្រុមហ៊ុន ADATA Technology ចង់វិនិយោគលើវិស័យបច្ចេកវិទ្យានៅកម្ពុជា

ជួបសម្តេចមនាយករដ្ឋមន្ត្រីកម្ពុជា នៅព្រឹកថ្ងៃទី៣០ ខែមេសា ឆ្នាំ២០២៥នេះ ប្រធានក្រុមប្រឹក្សាភិបាលនៃក្រុមហ៊ុន ADATA Technology Co., Ltd បានបញ្ជាក់ពីការចាប់អារម្មណ៍របស់ក្រុមហ៊ុនសម្រាប់ការវិនិយោគលើវិស័យបច្ចេកវិទ្យានៅកម្ពុជា។

បើតាមជម្រាបជូនសម្ដេចធិបតី លោក Simon Chen ប្រធានក្រុមប្រឹក្សាភិបាល បានបញ្ជាក់ថា ក្រុមហ៊ុន ADATA Technology Co., Ltd ជាក្រុមហ៊ុនបច្ចេកវិទ្យាដ៏ល្បីមួយមានអាយុកាលជាង៥៣ឆ្នាំ ដែលក្រុមហ៊ុនមានបុត្រសម្ព័ន្ធចំនួន៥ បានចុះបញ្ជីនៅផ្សារភាគហ៊ុននៅកោះតៃវ៉ាន់ និងហុងកុង ព្រមទាំងមានការិយាល័យតំណាងជាង៤០ កំពុងប្រតិបត្តិការអាជីវកម្មនៅបណ្តាប្រទេសនានាជុំវិញពិភពលោក។

ក្រុមហ៊ុន ADATA Technology Co., Ltd. មានជំនាញផ្នែកគ្រឿងអេឡិចត្រូនិក រ៉ូបូត​ កុំព្យូទ័រ​ បច្ចេកវិទ្យាជីវមាត្រ (Biometrics) និងយានយន្ត។ លោកប្រធានក្រុមប្រឹក្សាភិបាលក្រុមហ៊ុន បន្ថែមដូច្នេះ។

លោក Simon Chen បន្តថា នេះជាដំណើរទស្សនកិច្ចលើកទី៤ របស់លោកមកកាន់ប្រទេសកម្ពុជា ហើយក្រុមហ៊ុនមានចំណាប់អារម្មណ៍ខ្លាំងក្នុងការវិនិយោគនៅកម្ពុជា ដោយផ្តោតលើវិស័យបច្ចេកវិទ្យាទំនើប។ ទន្ទឹមនឹងនេះ ក្រុមហ៊ុនក៏ចាប់អារម្មណ៍ពង្រឹងពង្រីកកិច្ចសហប្រតិបត្តិការជាមួយក្រសួងស្ថាប័នកម្ពុជា ដើម្បីបណ្តុះបណ្តាល និងកសាងធនធានមនុស្ស​ផ្នែកបច្ចេកវិទ្យាទំនើប ផងដែរ។

ជាការឆ្លើយតប សម្តេចធិបតី បានការស្វាគមន៍ចំពោះគណៈប្រតិភូរបស់ក្រុមហ៊ុនដែលបានមកបំពេញទស្សនកិច្ច និងចាប់អារម្មណ៍វិនិយោគនៅកម្ពុជា។ សម្តេចធិបតី បានវាយតម្លៃខ្ពស់ចំពោះភាពរីកចម្រើនរបស់ក្រុមហ៊ុន ដែលមានបទពិសោធន៍ និងឈានមុខគេខាងវិស័យបច្ចេកវិទ្យាទំនើប។

សម្តេច​ធិបតី​ បានសង្កត់ធ្ងន់ថា​​ ការអភិវឌ្ឍវិស័យបច្ចេកវិទ្យានៅកម្ពុជា ជាវិស័យអាទិភាពមួយរបស់រាជរដ្ឋាភិបាល ហើយរដ្ឋាភិបាលបានដាក់ចេញគោលនយោបាយ និងយន្តការចាំបាច់នានាដើម្បីគាំទ្រដល់បរិស្ថានវិនិយោគនៅកម្ពុជា រួមមាន៖ ច្បាប់វិនិយោគ ការដាក់ចេញវិធានការចាំបាច់ និងការកែសម្រួលនីតិវិធីពាក់ព័ន្ធនឹងការវិនិយោគ ព្រមទាំងការដាក់ចេញនូវកញ្ចប់វិធានការលើកទឹកចិត្តសម្រាប់វិនិយោគិន ជាពិសេសការវិនិយោគលើខ្សែច្រវាក់ផ្គត់ផ្គង់។

សម្តេចធិបតី បានសម្តែងនូវក្តីរីករាយ និងស្វាគមន៍ចំពោះបំណងរបស់ក្រុមហ៊ុនក្នុងការសហការជាមួយក្រសួងស្ថាប័នពាក់ព័ន្ធកម្ពុជា ក្នុងការអភិវឌ្ឍធនធានមនុស្សក្នុងវិស័យបច្ចេកវិទ្យាទំនើបនៅកម្ពុជា។ សម្ដេច បានលើកទឹកចិត្តឱ្យក្រុមហ៊ុនបន្តភ្ជាប់ទំនាក់ទំនងជាមួយក្រសួងស្ថាប័នពាក់ព័ន្ធបន្ថែមទៀត ដើម្បីចាប់យកកាលានុវត្តភាពក្នុងការវិនិយោគនៅកម្ពុជា៕