អគ្គមេបញ្ជាការ៖ កងទ័ពត្រូវតែម៉ឺងម៉ាត់ចំពោះកិច្ចការពារបូរណភាពទឹកដី

នៅព្រឹកថ្ងៃទី១២ ខែឧសភា ឆ្នាំ២០២៥ អគ្គមេបញ្ជាការនៃកងយោធពលខេមរភូមិន្ទ នាយឧត្ដមសេនីយ៍ វង្ស ពិសេន បានប្រាប់កងទ័ពត្រូវតែម៉ឺងម៉ាត់ចំពោះកិច្ចការពារបូរណភាពទឹកដី ដោយហ៊ានលះបង់អាយុជីវិត ដើម្បីជាតិមាតុភូមិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សាររបស់លោកនាយឧត្តមសេនីយ៍ អគ្គមេបញ្ជាការ បានលើកឡើងនៅក្នុងពេលអញ្ជើញផ្តល់អាវភ្លៀងដល់បណ្តាកងឯកភាពចំណុះអគ្គបញ្ជាការដ្ឋាន ដែលធ្វើឡើងនៅវិទ្យាស្ថាននាយទាហានចម្រុះ។

លោកនាយឧត្តមសេនីយ៍ វង្ស ពិសេន បានរំលឹកឡើងវិញជំហររបស់រាជរដ្ឋាភិបាលកម្ពុជា រាប់តាំងពីការដឹកនាំរបស់សម្តេចតេជោ ហ៊ុន សែន អតីតនាយករដ្ឋមន្ត្រី បច្ចុប្បន្នជាប្រធានព្រឹទ្ធសភា និងកំពុងបន្តដឹកនាំដោយសម្តេចធិបតី ហ៊ុន ម៉ាណែត ដែលតែងប្រកាន់យកជំហរកសាងព្រំដែនជាមួយប្រទេសជិតខាងកម្ពុជា ទៅជាព្រំដែនសុខសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍ។

ក្នុងន័យនេះ លោកនាយឧត្តមសេនីយ៍ អគ្គមេបញ្ជាការ បានប្រាប់ដល់កងទ័ពឱ្យម៉ឺងម៉ាត់ក្នុងកិច្ចការពារបូរណភាពទឹកដី ហើយហ៊ានលះបង់អាយុជីវិតដើម្បីជាតិមាតុភូមិ។ ចំពោះមុខ កងទ័ពមិនអព្យាក្រឹតចំពោះរាជរដ្ឋាភិបាលទេ កងទ័ពត្រូវតែការពារដាច់ខាតរាជរដ្ឋាភិបាលស្របច្បាប់ដែលកើតចេញពីការបោះឆ្នោត៕