រដ្ឋបាលរាជធានី​ និង អាជ្ញាធរជាតិ​ដោះស្រាយវិវាទក្រៅ​ប្រព័ន្ធតុលាការ ចុះ​អនុស្សរណៈ​ស្តី​ពី​កិច្ច​សហប្រតិបត្តិការ​ក្នុង​កិច្ច​សម្រុះសម្រួល​ផ្សះផ្សាវិវាទ

លោកបណ្ឌិត ជិន ម៉ាលីន រដ្ឋមន្ត្រី​ស្តីទីក្រសួងយុត្តិធម៌ និង​ជាអនុប្រធាន​ប្រចាំការ​នៃអាជ្ញាធរជាតិ និង ជាអនុប្រធានប្រចាំការ​តំណាងលោកកើត រិទ្ធ ឧបនាយករដ្ឋមន្ត្រី​ក្រសួងយុត្តិធម៌​និង​លោកកើត ឆែ អភិបាល​រងរាជធានីនិងជាតំណាងលោក ឃួង ស្រេង អភិបាលនៃគណៈ​អភិបាល​រាជធានីភ្នំពេញ បានអញ្ជើញក្នុងពិធីចុះហត្ថលេខាលើអនុស្សរណៈយោគយល់​គ្នា​រវាងអាជ្ញាធរជាតិ ដោះស្រាយវិវាទក្រៅប្រពន្ធ័តុលាការ និងរដ្ឋបាលរាជធានីភ្នំពេញស្ដីពីកិច្ចសហ ប្រតិបត្តិការ​ក្នុង​កិច្ច​សម្រុះសម្រួល​ផ្សះផ្សាវិវាទ​ដែល​បាន​ធ្វើ​ឡើង​នាព្រឹកថ្ងៃទី១៣ ឧសភា២០២៥នេះនៅរដ្ឋបាលរាជធានីភ្នំពេញ។

ក្នុង​ឱកាស​នោះ ​លោក​កើត ឆែ បាន​លើក​ឡើង​ថា ជា​ការ​ពិត រាជ​រដ្ឋាភិបាល​ក្នុង​នីតិកាល​កន្លង​មក​ក្រោម​ការ​ដឹកនាំ​ប្រកប​ដោយ​ភាព​ឈ្លាសវៃ ប៉ិនប្រសព្វ​និងគតិបណ្ឌិត​របស់សម្តេចអគ្គមហាសេនាបតីតេជោហ៊ុន សែន អតីតៈនាយករដ្ឋ មន្ត្រី និងបច្ចុប្បន្នប្រធានព្រឹទ្ធសភា នៃព្រះរាជាណាចក្រកម្ពុជា តែង​បាន​ដាស់តឿន​ក្រើន​រំលឹក​ថ្នាក់​ដឹកនាំ និងមន្ត្រីរាជការគ្រប់លំដាប់ថ្នាក់​ឱ្យយកចិត្តទុកដាក់ក្នុងការដោះស្រាយវិវាទក្នុងដែនសមត្ថកិច្ច គឺ​កុំ​បណ្តោយ​ឱ្យ​កម្ទេច​ភ្លើង អាច​បង្ក​ជា​អគ្គិភ័យ​ដែល​មាន​ន័យ​ប្រៀប​ប្រដូច​ទៅ​នឹង​វិវាទ​តូច​តាច​ក្នុង​មូលដ្ឋាន បើគ្មានការយកចិត្តទុកដាក់។

លោកកើត ឆែ បន្ថែម​ទៀត​ថា ឈរ​លើ​មូលដ្ឋាន​នេះ​សម្តេចតេជោហ៊ុន សែន តែងតែ​បាន​លើក​ទឹកចិត្តនិងបង្កើតឱ្យមាននូវយន្តការ ជាច្រើន​ទាំង​នៅ​ថ្នាក់ជាតិ​ដោយឈរ​លើ​គោលការណ៍​ឈ្នះ ឈ្នះ​ជា​មូលដ្ឋាន​នៃ​ការផ្សះផ្សា ដើម្បីរក្សាបាននូវ​សុខដុមនីយកម្ម​ក្នុង​សង្គម។

លោកកើត ឆែ បានបញ្ជាក់ទៀត​ថា សម្រាប់រាជរដ្ឋាភិបាលនីតិកាលទី៧ នៃរដ្ឋសភា ក្រោមការ​ដឹកនាំប្រកបដោយភាពស្វាហាប់ សមត្ថភាព ថាមពល និងគតិបណ្ឌិត​របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក៏បានដាក់ចេញនូវកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ ដោយផ្តោតលើការកែទម្រង់ ការពង្រឹងអភិបាលកិច្ច និងការធ្វើទំនើបកម្មស្ថាប័នរដ្ឋ ជាស្នូលនៃយុទ្ធសាស្ត្រ ដើម្បីឈានទៅរកបាវចនាទាំង៥ រួមមាន ៖ កំណើន ការងារ សមធម៌ ប្រសិទ្ធភាព និងចីរភាព ក្នុងនោះ «ការពង្រឹង និងលើកកម្ពស់គុណភាព និងប្រសិទ្ធភាពនៃប្រព័ន្ធ យុត្តិធម៌» ត្រូវបានកំណត់ជាអាទិភាពដ៏សំខាន់មួយ ក្នុងចំណោមវិធានការគន្លឹះទាំង៥ និងបានប្រគល់ភារកិច្ចនេះជូនលោកកើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ ដើម្បីរៀបចំផែនការសកម្មភាពជាក់ស្តែង សំដៅ​សម្រេច​ឱ្យ​បាន​នូវការងារជាអាទិភាព គឺការបង្កើតយន្តការដោះស្រាយវិវាទក្រៅប្រព័ន្ធតុលាការ បន្ថែមលើយន្តការដែលមានស្រាប់ ដើម្បីជួយសម្រុះសម្រួលដោះស្រាយវិវាទឱ្យបានឆាប់រហ័ស ជាពិសេសវិវាទរបស់ប្រជាពលរដ្ឋនៅក្នុងមូលដ្ឋាន។

លោកជិន ម៉ាលីន រដ្ឋមន្ត្រីស្តីទីក្រសួងយុត្តិធម៌ និង​ជាអនុប្រធានប្រចាំការ​នៃអាជ្ញាធរជាតិបានគូសបញ្ជាក់​ថា អនុស្សរណៈ​នៃការ​យោគយល់​គ្នា នឹង​រួមគ្នា​ចុះហត្ថលេខានាពេលបន្តិចទៀតនេះ ត្រូវបានធ្វើឡើងក្នុងគោលបំណងដើម្បីពង្រឹង និងពង្រីកកិច្ចសហប្រតិបត្តិការ ក្នុងភាពជាដៃគូ សំដៅរួមគ្នាលើកកម្ពស់គុណភាព ប្រសិទ្ធភាព និងភាពឆាប់រហ័ស នៃការដោះស្រាយវិវាទតាមរយៈការសម្របសម្រួល ដោះស្រាយវិវាទ​ក្រៅប្រព័ន្ធតុលាការ នៅព្រះរាជាណាចក្រកម្ពុជា។

ផ្អែកតាមអនុស្សរណៈនៃការយោគយល់គ្នានេះ អដក និងរដ្ឋបាលរាជធានីភ្នំពេញ និងធ្វើកិច្ចសហប្រតិបត្តិការ ក្នុងការសម្រុះសម្រួលផ្សះផ្សាវិវាទ។

ឆ្លៀតក្នុងឱកាសនេះ លោកជិន ម៉ាលីន ក៏បានធ្វើ​ការ​កោតសរសើរ និង​វាយតម្លៃខ្ពស់ ចំពោះថ្នាក់ដឹកនាំ និងក្រុមការងារបច្ចេកទេស នៃអាជ្ញាធរជាតិដោះស្រាយវិវាទក្រៅប្រព័ន្ធតុលាការ និងរដ្ឋបាលរាជធានីភ្នំពេញ បានខិតខំប្រឹងប្រែង យកអស់កម្លាំងកាយចិត្ត សហការគ្នាយ៉ាង​ជិតស្និទ្ធ ក្នុងការចរចាពិភាក្សា និងរៀបចំឡើងដោយជោគជ័យ នៃ​អនុស្សរណៈ​នៃការយោគយល់គ្នា ស្តីពីកិច្ចសហប្រតិបត្តិការ ក្នុងការសម្របសម្រួលផ្សះផ្សាវិវាទ រហូតឈានដល់ការចុះហត្ថលេខានាឱកាសនេះ។

គួរឱ្យដឹងថា អាជ្ញាធរជាតិ​ដោះស្រាយ​វិវាទ​ក្រៅ​ប្រព័ន្ធ​តុលាការ ដែល​ជា​យន្តការ​ថ្មី​នេះ នឹង​ចូល​រួម​ចំណែក​ក្នុង​ការ​បង្ខិត​សេវា​ដោះស្រាយវិវាទ ឱ្យកាន់តែខិត​កៀក​នឹងប្រជាពលរដ្ឋនៅមូលដ្ឋាន ព្រមទាំងជួយសម្រុះសម្រួលផ្សះផ្សាវិវាទ ជូន​ដល់​គូ​ភាគីវិវាទ​ដោយ​ឆាប់​រហ័ស ដោយ​ផ្អែក​តាម​គោលការណ៍​ឈ្នះឈ្នះ​ទាំងអស់​គ្នា ជួយកាត់បន្ថយការកកស្ទះសំណុំ​រឿង​នៅ​តាម​សាលា​ជម្រះក្តី ព្រម​ទាំងរួមចំណែកជួយលើកកម្ពស់សុខដុមរនាក្នុងសហគមន៍ និងសន្តិភាពរបស់ប្រទេសជាតិផងដែរ៕

ដោយ ៖ ស្រីរ័ត្ន