សម្តេចតេជោ ស្នើឱ្យពិនិត្យឡើងវិញករណីពលរដ្ឋក្រីក្រពិតប្រាកដមិនទទួលបានបណ្ណគាំពារសង្គម ខណៈអ្នកមានជីវភាពធូរធារទទួលបាន

សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានសមាជរដ្ឋសភា និងព្រឹទ្ធសភា បានផ្តល់អនុសាសន៍ជូនរដ្ឋាភិបាល ពិនិត្យឡើងវិញឱ្យបានម៉ត់ចត់ទៅលើការអនុវត្តកម្មវិធីផ្តល់បណ្ណក្រីក្រជូនពលរដ្ឋ ដើម្បីចៀសវាងបញ្ហាច្រំដែល ពោលអ្នកក្រពិតប្រាកដពុំទទួលបានបណ្ណ រីឯងអ្នកមានជីវភាពធូរធារបែរជាទទួលបណ្ណក្រីក្រទៅវិញ។

ការផ្តល់អនុសាសន៍ ត្រូវបានលើកឡើងនៅក្នុងសមាជរដ្ឋសភា-ព្រឹទ្ធសភាជាលើក​ទី១នៅ​កម្ពុជា​ កាលពីថ្ងៃទី ២ ខែឧសភា ឆ្នាំ ២០២៥ ដើម្បីពិភាក្សាលើរបៀបវារៈចំនួនបីរួមមាន ប្រព័ន្ធការពារសង្គម សេដ្ឋកិច្ចក្រៅប្រព័ន្ធ និងវិស័យកសិកម្មជាដើម។ ការរៀបចំសមាជនេះ បានផ្តល់ឱកាសដល់សមាជិករដ្ឋាភិបាល លើកជាយោបល់ និងបញ្ហាប្រឈម ដើម្បីដោះស្រាយរួមគ្នា សំដៅលើកកម្ពស់សុខមាលភាពសង្គម និងសេដ្ឋកិច្ចគ្រួសារ ជាដើម។

ក្នុងនោះ លោក គង់ មូនីកា សមាជិកព្រឹទ្ធសភាមកពីគណបក្សឆន្ទៈខ្មែរ បានឡើងថ្លែងកោតសរសើរគោលនយោបាយ និងការអនុវត្តរបស់រដ្ឋាភិបាលមានភាពល្អប្រសើរ មានវឌ្ឍនភាពទៅមុខ ពាក់ព័ន្ធប្រព័ន្ធការពារសង្គម ដូចជាការផ្តល់បណ្ណក្រីក្រជាដើម។ ប៉ុន្តែទន្ទឹមនឹងនេះ លោកសង្កេតឃើញបញ្ហាមួយចំនួនដែលមិនទាន់មានតម្លាភាព គឺការផ្តល់បណ្ណក្រីក្រដោយមានភាពលម្អៀង។ លោកថ្លែងថា៖«ការកំណត់នូវអត្តសញ្ញាណកម្មជនក្រីក្រនៅមានបញ្ហាប្រឈមច្រើននៅឡើយ ព្រោះអ្នកក្រីក្រពិតប្រាកដគាត់មិនបានទទួលការគាំពារ ទៅជាអ្នកមិនសូវចូលទៅក្នុងគោលការណ៍វិនិច្ឆ័យបែរជាទទួលបានការគាំពារ»។

លោកទទួលស្គាល់ថា រាជរដ្ឋាភិបាល ខិតខំកាត់បន្ថយភាពមិនប្រក្រតីទាំងអស់នេះ ប៉ុន្តែបញ្ហានៅតែបន្តកើតមាននៅតាមចំណុចមូលដ្ឋានមួយចំនួន ខណៈស្នើឱ្យរាជរដ្ឋាភិបាលទទួលយកចំណុចនេះពិនិត្យពិចារណាឡើងវិញ ជំរុញកាត់បន្ថយបញ្ហាដែលកើតមាន។

ជាការឆ្លើយតប សម្តេចតេជោ ផ្តល់អនុសាសន៍ជូននាយករដ្ឋមន្រ្តី ដោយសង្ឃឹមថារដ្ឋាភិបាល នឹងទទួលយកមតិនេះ សម្រាប់ការអនុវត្តជាបន្ត ព្រោះវាជាការដែលត្រូវពិចារណាបំផុត អំពីលក្ខខណ្ឌដែលពលរដ្ឋត្រូវបានទទួល។ សម្តេចបន្តថា៖« មានកន្លែងជាច្រើនហើយដែលទទួលបានស្របទៅតាមលក្ខខណ្ឌ ប៉ុន្តែបើយោងទៅលើអ្វីដែលជាការសិក្សាក៏មានលក្ខខណ្ឌដែលមិនស្រប គឺអ្នកមិនត្រូវទទួល បែរជាទទួលបាន។ អ្នកដែលត្រូវទទួល អត់បានទទួល រឿងនេះជារឿងពិត កើតមានពិតដោយកន្លែង អ្នកមានម៉ូតូជិះទៅជាបានទទួលបណ្ណក្រីក្រ ស្មើនឹងយើងជួយចាក់សាំងឱ្យគេជិះម៉ូតូ មិនបានជួយសម្រាប់ទៅអ្នកក្រីក្រដើម្បីទិញអង្ករ» ។

«ដោយសារមានការផ្សាយបន្តផ្ទាល់គ្រប់ទីកន្លែងបានជាខ្ញុំត្រូវលើករឿងនេះថែម ហើយភរិយាខ្ញុំគាត់តាមដាន ក្នុងឋានៈជាប្រធានសមាគមកាកបាទក្រហម។ ចឹងគាត់តាមដានលើកិច្ចការងារនេះច្រើន គាត់តែងតែរអ៊ូរទាំ កុំថាឯកឧត្តម គង់ មូនីកា សូម្បីប្រពន្ធខ្ញុំក៏ត្អូញត្អែរលើរឿងនេះដែរ។ ព្រោះមានអ្នកខ្លះ មានម៉ូតូជិះ ទទួលបានបណ្ណក្រីក្រ ដល់អ្នកអត់បាយស៊ីអត់ទទួលបាន រឿងនេះសូមឱ្យយកចិត្តទុកដាក់ទៅលើចំណុចនេះជាពិសេស ក្នុងការអនុវត្តនាពេលខាងមុខ»។ នេះជាការលើកឡើងបន្ថែមរបស់សម្តេចតេជោ ហ៊ុន សែន។

គួរជម្រាបថា គ្រួសារដែលមានបណ្ណសមធម៌ដែលជាគ្រួសារក្រីក្ត នឹងទទួលបានអត្ថប្រយោជន៍មួយចំនួនដូចជា សេវាថែទាំ និងព្យាបាលជំងឺដោយឥតគិតថ្លៃ នៅតាមមូលដ្ឋានសុខាភិបាលសាធារណៈ ទទួលបានប្រាក់ឧបត្ថម្ភក្រោមក្របខណ្ឌកម្មវិធីជាតិជំនួយសង្គមក្នុងកញ្ចប់គ្រួសារ និងអន្តរាគមន៍មួយចំនួនទៀត៕