លោកជំទាវបណ្ឌិត ពេជ ចន្ទមុន្នី ទទួលថវិកា ៧០ម៉ឺនដុល្លារ ពីក្រុមយុវជនបូជាការពារយុត្តិធម៌

នៅរសៀលថ្ងៃទី៥ ខែមិថុនា ឆ្នាំ២០២៥នេះ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រធានកិត្តិយសនៃមូលនិធិគន្ធបុប្ផាកម្ពុជាបានអញ្ជើញជួបសវនការ និងទទួលថវិកាចំនួន ៧០ម៉ឺនដុល្លារអាមេរិក ក្នុងឱកាសយុទ្ធនាការ «១ម៉ឺនរៀល ១ម៉ឺននាក់» ដើម្បីធានានិរន្តរភាពមន្ទីរពេទ្យគន្ធបុប្ផា ក្នុងការពិនិត្យពិគ្រោះ និងព្យាបាលកុមារកម្ពុជា ដោយឥតគិតថ្លៃ និងប្រកបដោយគុណភាព ដែលពិធីនេះធ្វើឡើងនៅសណ្ឋាគាររ៉ាហ្វលឡឺរ៉ូយ៉ាល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឱកាសជួបសំណេះសំណាលជាមួយនឹងក្រុមយុវជនបូជាការពារយុត្តិធម៌ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានពាំនាំនូវប្រសាសន៍ផ្តាំផ្ញើសួរសុខទុក្ខពីសំណាក់សម្តេចអធិបតី ហ៊ុន ម៉ាណែត ជូនចំពោះសមាជិកសមាជិកា ដែលបានចូលរួមជាពិសេស អ្នកឧកញ៉ា ឡេង ណាវ៉ាត់ត្រា ដែលបានដឹកនាំក្រុមការងារចូលរួមបរិច្ចាគថវិកាជូនមូលនិធិគន្ធបុប្ផាកម្ពុជានាឱកាសនេះ។

ជាមួយគ្នានេះលោកជំទាវប្រធានកិត្តិយសនៃមូលនិធិគន្ធបុប្ផាកម្ពុជា ក៏សូមកោតសសើរដល់ក្រុមយុវជនបូជាការពារយុត្តិធម៌ទាំងអស់ដែលបានចូលរួមបរិច្ចាគថវិកាដ៏ច្រើនដល់កិច្ចដំណើរការរបស់មន្ទីរពេទ្យគន្ធបុប្ផា តាមរយៈមូលនិធិគន្ធបុប្ផាកម្ពុជាក្នុងឱកាស យុទ្ធនាការ «១ម៉ឺនរៀល ១ម៉ឺននាក់» ក្នុងការស្វែងរកថវិកាជួយមន្ទីរពេទ្យគន្ធបុប្ផា ដែលមានរយៈពេល១ខែពេញ ចាប់ពីថ្ងៃទី១ ខែមិថុនា ដល់ថ្ងៃទី៣០ ខែមិថុនា ឆ្នាំ២០២៥។

លោកជំទាវបណ្ឌិត សូមអរគុណអស់ពីដួងចិត្តដល់ក្រុមយុវជនបូជាការពារយុត្តិធម៌ ព្រមទាំងជួយឧបត្ថមគាំទ្រដល់កងទ័ពជួរមុខដែលកំពុងការពារទឹកដី តាមបន្ទាត់ព្រំដែនប្រកបដោយស្មារតីសាមគ្គីភាពរឹងមាំ របស់ប្រជាជាតិខ្មែរទាំងមូល។

ឆ្លៀតក្នុងឱកាសនោះដែរ លោកជំទាវបណ្ឌិតក៏បានស្នើសុំទៅដល់អ្នកដែលបង្កើតមាតិកា ដែលមានប្រជាប្រិយភាពនៅតាមបណ្ដាញសង្គមនានា សូមជួយជំរុញចូលរួមផ្សព្វផ្សាយយុទ្ធនាការកៀងគររកមូលនិធិ ជួយមន្ទីរពេទ្យគន្ធបុប្ផាបន្ថែមទៀត ដើម្បីឱ្យមានការផុលផុស នឹងមានការចូលរួមពីសប្បុរសជននានា ជួយដល់កុមារកម្ពុជារាប់ម៉ឺននាក់ដែលកំពុងត្រូវការឱ្យជួយ។

ជាការឆ្លើយតបអ្នកឧកញ៉ា ឡេង ណាវ៉ាត់ត្រាប្រធានក្រុមយុវជនបូជាការពារយុត្តិធម៌ក៏សូមគោរពថ្លែងអំណរគុណដល់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រធានកិត្តិយសនៃមូលនិធិគន្ធបុប្ផាកម្ពុជា ដែលបានផ្តល់ឱកាសឲ្យក្រុមការងារបានចូលរួមចែករំលែកនូវធនធាន ដើម្បីជួយទ្រទ្រង់ដល់មូនិធិកុមារកម្ពុជា និងសូមអរគុណដល់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានបង្កើតឲ្យមានមូលនិធិនេះ។ អ្នកកឧកញ៉ា ឡេង ណាវ៉ាត្រា និងក្រុមការងារក៏សូមប្ដេជ្ញាជួយដល់មូលនិធិកុមារកម្ពុជា និងជួយដល់កិច្ចការសង្គមជាបន្តបន្ទាប់ទៀតដើម្បីជាតិ ដើម្បីសង្គម ក្នុងន័យស្មារតីខ្មែរជួយខ្មែរ។

សូមជម្រាបថាមន្ទីរពេទ្យគន្ធបុប្ផា ចាប់ផ្តើមដំណើរការឡើងវិញនៅឆ្នាំ១៩៩២ មន្ទីរពេទ្យនេះបានទទួលការពិនិត្យ និងព្យាបាលនៅផ្នែកពិគ្រោះជំងឺក្រៅ កុមារ និងស្រ្តីមានផ្ទៃពោះចំនួនប្រមាណ ២៣លានករណី បានទទួលកុមារមកសម្រាកព្យាបាលធ្ងន់ធ្ងរប្រមាណ ២,៨ លាននាក់ និងសម្រាលកូនជូនស្រ្តីមានផ្ទៃពោះ ចំនួនប្រមាណ ៤១ម៉ឺននាក់។

មន្ទីរពេទ្យគន្ធបុប្ផាទាំងនៅភ្នំពេញ និងនៅខេត្តសៀមរាប ត្រូវចំណាយថវិកាជាង ១២ម៉ឺនដុល្លារក្នុង១ថ្ងៃ ឬក៏៤៣លានដុល្លារអាមេរិកក្នុង១ឆ្នាំ ដើម្បីធានារក្សានិរន្តភាពមន្ទីរពេទ្យ ក្នុងការជួយព្យាបាលជំងឺជូនកុមារ និងពិនិត្យលើស្ត្រីមានផ្ទៃពោះដោយឥតគិតថ្លៃ ប្រកបដោយស្មើភាព និងគ្មានការរើសអើង៕