ព័ត៌មានជាតិ

អ្នកឧកញ៉ា គិត ម៉េង អំពាវនាវសភាពាណិជ្ជកម្មខេត្តជាប់ព្រំដែនថៃ ចុះជួយរកទីផ្សារកសិផលដល់កសិករ

បានផុស

១២ នាទីutes មុន

នៅ

ថ្ងៃពុធ ២ កក្កដា ២០២៥

ដោយ

ថ្លែងនៅក្នុងវេទិកាធុរកិច្ច និងនវានុវត្តន៍នៅរសៀលនេះ អ្នកឧកញ៉ា គិត ម៉េង បានអំពាវនាវដល់សភាពាណិជ្ជកម្មខេត្តជាប់ព្រំដែនថៃ ត្រូវជួយសម្របសម្រួលស្វែងរកទីផ្សារកសិផលដល់កសិករ ដែលកំពុងរាំងស្ទះដោយសារការបិទព្រំដែនដោយឯកតោភាគីពីភាគីថៃ។

អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជាបានថ្លែងថា សភាពាណិជ្ជកម្មខេត្តជាប់ព្រំដែនថែដែលមានខេត្តបាត់ដំបង ខេត្តឧត្តរមានជ័យជាដើម ត្រូវយកចិត្តទុកដាក់ជួយកសិករ ដែលកំពុងទទួលរងផលប៉ះពាល់ពីការបិទព្រំដែនពីប្រទេសថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

«ជាក់ស្ដែងនៅអំឡុងខែនេះផលពោតរបស់កសិករ អាចប្រឈមវិបត្តិទីផ្សារដោយសារត្រូវពឹងផ្អែកការនាំចេញទៅទីផ្សារប្រទេសថៃ»។

បើតាមអ្នកឧកញ៉ា តាមរយៈការជួយគាំទ្រពីសភាពាណិជ្ជកម្ម នឹងចូលរួមកាត់បន្ថយផលប៉ះពាល់ដល់កសិករលើការនាំចេញផលកសិកម្ម ដែលកំពុងរងគ្រោះពីជម្លោះព្រំដែនរវាងប្រទេសកម្ពុជានិងថៃ។

អ្នកឧកញ៉ា ម៉ុង ឫទ្ធី ប្រធានក្រុមហ៊ុន ម៉ុង ឫទ្ធី គ្រុបបានបញ្ជាក់ថា ប្រទេសកម្ពុជាសំបូរផលកសិកម្ម ប៉ុន្តែខ្វះខាតការកែច្នៃ។ លោកលើកឡើងផលដំណាំ ដូចជា ពោត ដំឡូងមី ត្រូវបាននាំចេញទៅក្រៅប្រទេស ប៉ុន្តែបែរជាត្រូវបានកែច្នៃជាផលិតផលរួមទាំងជីកសិកម្មនាំចូលមកលក់ក្នុងប្រទេសវិញក្នុងតម្លៃមួយដ៏ខ្ពស់។

នៅចំពោះមុខក្រុមអ្នកជំនួញដែលចូលរួមនៅក្នុងវេទិកាធុរកិច្ច និងនវានុវត្តន៍ ក៏ដូចជាតំណាងសភាពាណិជ្ជកម្មមកពីទូទាំងប្រទេស អ្នកឧកញ៉ា ម៉ុង ឫទ្ធី ជំរុញលើកទឹកចិត្តដល់លោកអ្នកឧកញ៉ា អ្នកឧកញ៉ា ឧកញ៉ា ចាប់យកឱកាសក្នុងការវិនិយោគលើវិស័យកសិកម្មដែលលោកមើលឃើញថា វិស័យកសិកម្មអាចបង្កើតការងារបានយ៉ាងច្រើនដល់ពលរដ្ឋ ដែលជាប្រភពចំណូល និងអាចចូលរួមកាត់បន្ថយការចំណាកស្រុករបស់ពលរដ្ឋទៅក្រៅប្រទេស៕