ព័ត៌មានជាតិ

អភិបាលខណ្ឌឫស្សីកែវ ដឹកនាំកិច្ចប្រជុំ បន្តពង្រឹងសន្តិសុខ និងប្រយុទ្ធប្រឆាំងការឆបោកតាមបច្ចេកវិទ្យា ក្នុងមូលដ្ឋាន

បានផុស

១ ថ្ងៃ មុន

នៅ

ថ្ងៃព្រហស្បតិ៍ ១៧ កក្កដា ២០២៥

ដោយ

កាលពីល្ងាចថ្ងៃទី ១៦ ខែកក្កដា ឆ្នាំ ២០២៥ លោក ជិន ប៊ុនធឿន អភិបាលខណ្ឌឫស្សីកែវ និងជាប្រធានគណៈបញ្ជាការឯកភាពរដ្ឋបាលខណ្ឌ បានដឹកនាំកិច្ចប្រជុំស្តីពីការពង្រឹងការងារសន្តិសុខ និងជាពិសេសស្តីពីការអនុវត្តយុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យា (Online Scams) ដែលកំពុងបង្កគ្រោះថ្នាក់ដល់សង្គម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចប្រជុំពិសេសនេះមានវត្តមានចូលរួមពីតំណាងអធិការនគរបាលខណ្ឌ តំណាងមេបញ្ជាការកងរាជអាវុធហត្ថខណ្ឌ គណៈអភិបាលខណ្ឌ គណៈនាយក ប្រធានការិយាល័យទាំង ១១ ចៅសង្កាត់ទាំង ៧ មេប៉ុស្តិ៍សង្កាត់ និងអង្គភាពពាក់ព័ន្ធទាំងអស់។

នាឱកាសនោះ លោកអភិបាលខណ្ឌ បានបង្ហាញពីបំណងច្បាស់លាស់ក្នុងការពង្រឹងការសហការរវាងអាជ្ញាធរមូលដ្ឋាន ដើម្បីចាប់ប្រមែប្រមូលជនអនាថារួចបញ្ជូនទៅមណ្ឌលកែប្រែ តាមដាន បង្ក្រាបក្រុមក្មេងទំនើង និងទប់ស្កាត់សកម្មភាពចម្លែកៗ ដែលប៉ះពាល់ដល់សន្តិសុខសង្គម។

លោកក៏បានរំលឹក និងបញ្ជាក់អំពីការអនុវត្តនូវបទបញ្ជាដ៏ម៉ឺងមាត់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលផ្ដោតទៅលើការបង្ការ និងប្រយុទ្ធប្រឆាំងការឆបោកតាមបច្ចេកវិទ្យា ជាបញ្ហាសំខាន់ក្តៅត្រូវអនុវត្ត។ “យុទ្ធនាការបោសសម្អាតការឆបោកតាមបច្ចេកវិទ្យា គឺជាការចូលរួមដ៏សកម្មក្នុងការទប់ស្កាត់អំពើឧក្រិដ្ឋភាពផ្នែកឌីជីថល និងថែរក្សាសុវត្ថិភាពសាធារណៈសម្រាប់ប្រជាពលរដ្ឋ និងសង្គមទាំងមូល”៕

អត្ថបទ ៖ សំណាង