វត្តមានមេទ័ពម៉ាឡេស៊ីនៅកម្ពុជា គឺពិនិត្យលើការអនុវត្តបទឈប់បាញ់ ធានាសន្តិភាពព្រំដែនឡើងវិញ

វត្តមានរបស់អគ្គមេបញ្ជាការកងទ័ពម៉ាឡេស៊ី នៅកម្ពុជានាពេលនេះ គឺពិនិត្យសភាពការណ៍ជាក់ស្ដែងតាមតំបន់ព្រំដែនកម្ពុជា និងថៃ ក្រោយមានបទឈប់បាញ់ ដោយធ្វើយ៉ាងណាធានាឱ្យដំណើរការអនុវត្តកិច្ចព្រមព្រៀងឈប់បាញ់ឱ្យមានប្រសិទ្ធភាព ដើម្បីឈានទៅទទួលបានសន្តិភាពឡើងវិញជានិរន្តរ។ រដ្ឋមន្ត្រីការពារជាតិកម្ពុជា នាយឧត្តមសេនីយ៍ ទៀ សីហា គូសបញ្ជាក់ដូច្នេះ។

ក្នុងជំនួបកាលពីរសៀលថ្ងៃទី២៩ ខែកក្កដា លោកនាយឧត្តមសេនីយ៍ ទៀ សីហា រដ្ឋមន្ត្រីក្រសួងការពារជាតិកម្ពុជា និងលោកនាយឧត្តមសេនីយ៍ តាន់ស្រ៊ី អេចជេ ម៉ូដ នីហ្សាមប៊ីន អេចជេ ចាហ្វា អគ្គមេញ្ជាការកងទ័ពម៉ាឡេស៊ី បានពិភាក្សាគ្នាពាក់ព័ន្ធនឹងទំនាស់ព្រំដែនកម្ពុជា-ថៃ ព្រមទាំងការអនុវត្តកិច្ចព្រមព្រៀងបទឈប់បាញ់ ដែល​បាន​ឯកភាព​គ្នានៅទីក្រុង​កូឡាឡាំពួរ ក្រោមការជួយសម្របសម្រួលពីនាយករដ្ឋមន្ត្រីម៉ាឡេស៊ី និងមានការគាំទ្រពីអាមេរិក និងចិន កាលពីថ្ងៃទី២៨ ខែកក្កដា។

លោកនាយឧត្តមសេនីយ៍ ទៀ សីហា លើកឡើងថា «វត្តមានរបស់ឯកឧត្តមនាយឧត្តមសេនីយ៍ អគ្គមេញ្ជាការកងទ័ពម៉ាឡេស៊ី នាពេលនេះ បង្ហាញពីឆន្ទៈរបស់ប្រទេសម៉ាឡេស៊ីដែលជាប្រធានប្តូរវេណអាស៊ាន ក្នុងការដោះស្រាយបញ្ហាព្រំដែនកម្ពុជា-ថៃ ដោយចាប់ផ្តើមអនុវត្តបទឈប់បាញ់ឱ្យមានប្រសិទ្ធភាព និងនិរន្តរភាព»។

ជាការកត់សម្គាល់ ក្នុងជំនួបដោយឡែកជាមួយអគ្គមេបញ្ជាការកងយោធពលខេមរភូមិន្ទ នាយឧត្តមសេនីយ៍ វង្ស ពិសេនកាលពីរសៀលម្សិលមិញនេះដែរ នាយឧត្តមសេនីយ៍ តាន់ស្រ៊ី អេចជេ ម៉ូដ នីហ្សាមប៊ីន អេចជេ ចាហ្វា អគ្គមេបញ្ជាការកងទ័ពម៉ាឡេស៊ី បញ្ជាក់ថា នឹងបង្កើតក្រុមសង្កេតការណ៍ចំនួនពីរក្រុម ដែលមួយក្រុមមានអនុព័ន្ធយោធាម៉ាឡេស៊ីប្រចាំកម្ពុជា ជាប្រធាន ហើយមួយក្រុមទៀត គឺអនុព័ន្ធយោធាម៉ាឡេស៊ីប្រចាំប្រទេសថៃ ជាប្រធាន ដើម្បីចេញសង្កេតការណ៍ នៅព្រឹកថ្ងៃទី៣០ ខែកក្កដានេះ ក្នុងការចុះតាមដានសភាពការណ៍ និងសម្របសម្រួលក្រុមសង្កេតការណ៍ ផ្ទៀងផ្ទាត់ និងធានាការអនុវត្តបទឈប់បាញ់ ក្រោយមានការប្រយុទ្ធគ្នាដោយទ័ពកម្ពុជា និងថៃ អស់រយៈពេល៥ថ្ងៃកន្លងមក។

អគ្គមេបញ្ជាការកងទ័ពម៉ាឡេស៊ី បានចុះដល់បន្ទាត់ព្រំដែនកម្ពុជា-ថៃ តាំងពីយប់មិញ ដើម្បីធ្វើការជាមួយអគ្គមេបញ្ជាការកងទ័ពភូមិន្ទថៃ រួមទាំងមេបញ្ជាការយោធភូមិភាគរបស់កម្ពុជា និងថៃ។ ខណៈអនុព័ន្ធយោធា និងអង្គទូតបណ្តាប្រទេសជាសមាជិកអាស៊ាន និងប្រទេសមហាអំណាចមួយចំនួន បានធ្វើដំណើរទៅដល់ព្រំដែនកម្ពុជា-ថៃ នៅព្រឹកថ្ងៃពុធនេះ។ នេះជាការថ្លែងឱ្យដឹងដោយអ្នកនាំពាក្យក្រសួងការពារជាតិកម្ពុជា៕

ដោយ៖ ធឿន វ៉ាន់សុង