សម្ដេចម៉ែប្រទានព្រះរាជទ្រព្យនិងស្បៀងដល់កាកបាទក្រហមជួយដល់ជនភៀសសឹក

សម្តេចព្រះមហាក្សត្រី ព្រះវររាជមាតាជាតិខ្មែរ ប្រោសព្រះរាជទានព្រះរាជទ្រព្យ​១៥.០០០​ដុល្លារ (មួយម៉ឺនប្រាំពាន់ដុល្លារអាម៉េរិក) រួមជាមួយស្បៀង​ និងសម្ភារមួយចំនួនទៀត  ចំពោះកាកបាទក្រហមកម្ពុជា​សម្រាប់ជួយដល់ប្រជារាស្ត្រភៀសសឹក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា សម្តេចព្រះមហាក្សត្រី នរោត្តម មុនិនាថ សីហនុ នៅ​ថ្ងៃទី​៤ ខែ​សីហា បានប្រោសព្រះរាជទានព្រះរាជទ្រព្យដ៏ឧត្តុង្គឧត្តមចំនួន ​១៥.០០០​ដុល្លារ (មួយម៉ឺនប្រាំពាន់ដុល្លារអាម៉េរិក) រួមជាមួយស្បៀង​ និងសម្ភារមួយចំនួនទៀត ដូចជាក្រដាសសើមម៉ាក MG ចំនួន ២០កេស ឆៃប៉ូវ ៥០០គីឡូក្រាម និងត្រសក់ចាវ ៣៥០គីឡូក្រាម ចំពោះកាកបាទក្រហមកម្ពុជា​​ សម្រាប់ជួយដល់ប្រជារាស្ត្រភៀសសឹក។

ប្រធានកាកបាទក្រហមកម្ពុជា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បាន​សម្ដែង​នូវ​អំណរព្រះគុណចំពោះព្រះ​មហាក្សត្រីដោយថា សម្តេចព្រះមហាក្សត្រី ព្រះវររាជមាតាជាតិខ្មែរ តែងតែប្រោសព្រះរាជទាននូវភាពកក់ក្តៅដល់កាកបាទក្រហមកម្ពុជា ដើម្បីបម្រើជាតិ មាតុភូមិ និងប្រជារាស្ត្រកម្ពុជា។

ក្រោយ​មាន​ជម្លោះ​ប្រដាប់​អាវុធ​ដែល​ផ្ដើម​ចេញពី​ថៃ បាន​បង្ក​ឱ្យពលរដ្ឋ​ខ្មែរ​ដែល​រស់​នៅ​ក្បែរ​ទីតាំង​ជម្លោះជម្លៀស​ខ្លួន​ទៅ​កាន់​ទី​តាំង​សុវត្ថិភាពដែល​មាន​ប្រមាណ១៧ម៉ឺននាក់​៕

អត្ថបទដោយ ហ៊ុន សិរីវឌ្ឍន៍