ព័ត៌មានជាតិ

ជាង ២ ឆ្នាំ មានគម្រោងហេដ្ឋារចនាសម្ព័ន្ធផ្លូវទឹក ផ្លូវសមុទ្រ និងកំពង់ផែធំៗចំនួន ៤ បានបញ្ចប់ដាក់ឲ្យប្រើប្រាស់បន្តបន្ទាប់

បានផុស

១០ ខែ មុន

នៅ

ថ្ងៃចន្ទ ១៥ កញ្ញា ២០២៥

ដោយ

រយៈពេលពីរឆ្នាំនៃនីតិកាលទី ៧ របស់រដ្ឋាភិបាល ក្រសួងសាធារណការនិងដឹកជញ្ជូន បានសម្រេចសមិទ្ធផលសំខាន់ៗក្នុងវិស័យសាធារណការ និងដឹកជញ្ជួន។ ក្រៅពីហេដ្ឋារចនាសម្ព័ន្ធផ្លូវថ្នល់ មានគម្រោងហេដ្ឋារចនាសម្ព័ន្ធផ្លូវទឹក ផ្លូវសមុទ្រ និងកំពង់ផែធំៗចំនួន ៤ បានបញ្ចប់និងដាក់ឲ្យប្រើប្រាស់ជាបន្តបន្ទាប់។

គម្រោងហេដ្ឋារចនាសម្ព័ន្ធផ្លូវទឹក ផ្លូវសមុទ្រ និងកំពង់ផែធំៗ ដែលបានសម្ពោធដាក់ឲ្យប្រើប្រាស់ជាផ្លូវការទាំងនោះរួមមាន៖

-ការដាក់ឲ្យប្រើប្រាស់គ្រឿងចក្រលើកដាក់ចល័តនៅគែមផែនៅកំពង់ផែស្វយ័តក្រុងព្រះសីហនុ

គ្រឿងចក្រលើកដាក់កុងតឺន័រនៅគែមផែប្រភេទ QC ចំនួន ២ គ្រឿង និងគ្រឿងចក្រលើកដាក់កុងតឺន័រនៅទីលានប្រភេទ RTG ចំនួន ៦ គ្រឿង ត្រូវបានដឹកជញ្ជូនពីរោងចក្រ Oita ប្រទេសជប៉ុន ដើម្បីប្រើប្រាស់នៅចំណតផែកុងតឺន័រថ្មីប្រវែង ២៥៣ ម៉ែត្ររបស់កំពង់ផែស្វយ័តក្រុងព្រះសីហនុ។ ការបំពាក់គ្រឿងចក្រថ្មីៗទាំងនេះ បានបង្កើនសមត្ថភាពឆ្លើយតបទៅនឹងកំណើននៃតម្រូវការ ក្នុងការលើកដាក់ផ្ទេរ-ផ្ទុកកុងតឺន័ររបស់កំពង់ផែស្វយ័តក្រុងព្រះសីហនុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

-កំពង់ផែពហុបំណងកំពត

កំពង់ផែពហុបំណងកំពត ដែលមានតម្លៃប្រមាណ ១៤០លានដុល្លារអាមេរិក បានសម្ពោធដាក់ឲ្យដំណើរការកាលពីថ្ងៃទី០៦ ខែមិថុនា ឆ្នាំ២០២៤ ដែលបានក្លាយជាកំពង់ផែទឹកជ្រៅ និងទំនើបមួយទៀតនៅកម្ពុជា និងដែលបានជួយបំពេញបន្ថែមលើមុខងាររបស់កំពង់ផែស្វយ័តក្រុងព្រះសីហនុ និងកំពង់ផែស្វយ័តភ្នំពេញ។

-ចំណតផែកុងតឺន័រនៅផែស្វយ័តក្រុងព្រះសីហនុប្រវែង ២៥៣ ម៉ែត្រ

ចំណតផែកុងតឺណ័រថ្មីរបស់កំពង់ផែស្វ័យតក្រុងព្រះសីហនុ បានបើកការដ្ឋានសាងសង់កាលពីថ្ងៃ ០១ ខែ ឧសភា ឆ្នាំ ២០២៣ ដោយបានប្រើប្រាស់រយៈពេលសាងសង់ចំនួន ១៨ ខែ និងដែលបានសម្ពោធដាក់ឲ្យប្រើប្រាស់កាលពីខែកញ្ញាឆ្នាំ ២០២៤។

តាមរយៈចំណតផែកុងតឺន័រនៅផែស្វយ័តក្រុងព្រះសីហនុនេះ បានជួយបំពេញបន្ថែមនូវមុខងាររបស់កំពង់ផែស្វយ័តក្រុងព្រះសីហនុ ដែលធ្វើឱ្យសមត្ថភាពផែសរុបកើនឡើងពី ៥៥ ម៉ឺន TEUs/ឆ្នាំ ទៅ ១លាន TEUs/ឆ្នាំ និងអាចអនុញ្ញាតឱ្យនាវាកុងតឺន័រមានជម្រៅទឹក ១០,៤ ម៉ែត្រ ចូលចតបាន។

-កំពង់ផែទេសចរណ៍អន្តរជាតិខេត្តកំពត

កំពង់ផែទេសចរណ៍អន្តរជាតិខេត្តកំពត បានសម្ពោធដាក់ឲ្យប្រើប្រាស់នៅខែមេសាឆ្នាំ ២០២៥ មានទីតាំងស្ថិតនៅក្នុងភូមិជុំគ្រៀល ឃុំជុំគ្រៀល ស្រុកទឹកឈូ ខេត្តកំពត ដែលត្រូវបានសាងសង់ឡើងនៅលើផ្ទៃដីទំហំ ៤,២៥ហិកតា។

កំពង់ផែនេះបានរួមចំណែកលើកកម្ពស់ការតភ្ជាប់ការដឹកជញ្ជូនតាមផ្លូវសមុទ្រ ទៅកាន់គោលដៅទេសចរណ៍ផ្សេងៗ ដូចជា ខេត្តកែប ខេត្តព្រះសីហនុ ខេត្តកោះកុង និងបណ្តាកោះនានាក្នុងព្រះរាជាណាចក្រកម្ពុជា ក៏ដូចជាការតភ្ជាប់ផ្លូវទស្សនាចរសមុទ្ររបស់ប្រទេសកម្ពុជាជាមួយបណ្ដាកំពង់ផែទេសចរណ៍នៅកោះត្រល់របស់ប្រទេសវៀតណាម និងបណ្ដាកំពង់ផែទេសចរណ៍នៅប្រទេសថៃជាដើម ដែលអាចឱ្យនាវាដឹកភ្ញៀវទេសចរចូលចតយ៉ាងងាយស្រួល។

ជាមួយគ្នានេះ ក្រៅពីសមិទ្ធផលខាងលើ ក្រសួងសាធារណការនិងដឹកជញ្ជូនក៏បានបញ្ចប់ដាក់ឲ្យប្រើប្រាស់គម្រោងហេដ្ឋារចនាសម្ព័ន្ធផ្លូវទឹក និងកំពង់ផែចំនួន ៣ គម្រោងផ្សេងទៀតរួមមាន៖

-ឃ្លាំងសន្និធិគយបណ្ដោះអាសន្ននៃចំណតផែកុងតឺន័រ LM17
-ចំណតផែរណបពហុបំណង TS11 UM2 និង LM26
-ឃ្លាំងលើកដាក់ និងស្ដុកទំនិញត្រជាក់របស់ក្រុមហ៊ុនខ្មែរ ខូល ឆេន (Khmer Cold Chain) ក្នុងបរិវេណចំណតផែកុងតឺន័រ LM17 នៃកំពង់ផែស្វយ័តភ្នំពេញ៕

Related Topics:សមិទ្ធផលក្រសួងសាធារណការនិងដឹកជញ្ជូន