ព័ត៌មានជាតិ

ខេត្តកំពង់ធំមានពលករត្រលប់ពីថៃ ១៣ ៦៥០ នាក់ ក្នុងនោះពលករ ៧ ២៨៦ នាក់ ទទួលបានការងារថ្មីធ្វើក្នុងស្រុក

បានផុស

៧ ខែ មុន

នៅ

ថ្ងៃអាទិត្យ ៥ តុលា ២០២៥

ដោយ

ខេត្តកំពង់ធំមានពលករដែលត្រលប់មកពីប្រទេសថៃសរុបចំនួន ១៣ ៦៥០ នាក់ ក្នុងនោះពលករចំនួន ៧ ២៨៦ នាក់ ទទួលបានការងារថ្មីនៅក្នុងស្រុក។ នេះបើតាមការគូសបញ្ជាក់ពីលោក វង្សី វិស្សុត ឧបនាយករដ្ឋមន្ត្រីប្រចាំការ ក្នុងពិធីជួបសំណេះសំណាលសាកសួរសុខទុក្ខពលករ ដែលត្រលប់មកពីប្រទេសថៃក្នុងខេត្តកំពង់ធំ។

ក្នុងពិធីជួបសំណេះសំណាលពលករត្រលប់មកពីប្រទេសថៃក្នុងខេត្តកំពង់ធំ ដែលធ្វើឡើងក្រោមអធិបតីភាពលោកឧបនាយករដ្ឋមន្រ្តីប្រចាំការ វង្សី វិស្សុត ក្នុងស្មារតីចែករំលែកអំឡុងពេលដ៏លំបាក ក៏មានការនាំយកនូវអំណោយជាថវិកា រួមទាំងគ្រឿងឧបភោគបរិភោគមួយចំនួនសម្រាប់ចែកជូនដល់ពលករផងដែរ។

គួរបញ្ជាក់ថា នៅក្នុងពិធីជួបសំណេះសំណាលសាកសួរទុក្ខពលករត្រលប់មកពីប្រទេសថៃក្នុងខេត្តកំពង់ធំកាលពីពេលថ្មីៗនេះ ក្រោមអធិបតីភាពលោកឧបនាយករដ្ឋមន្រ្តីប្រចាំការ វង្សី វិស្សុត ក៏មានការចូលរួមពីលោក ហួត ហាក់ រដ្ឋមន្ត្រីក្រសួងទេសចរណ៍ អនុប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកបារាយណ៍ លោក ថោង ខុន ទេសរដ្ឋមន្រ្តីទទួលបន្ទុកបេសកកម្មពិសេសស ជាអនុប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ លោកជំទាវ កុយ ពិសី រដ្ឋមន្ត្រីប្រតិភូអមនាយករដ្ឋមន្ត្រី រួមទាំងលោក នួន ផារ័ត្ន អភិបាលនៃគណៈអភិបាលខេត្តកំពង់ធំ៕