លោក ពេជ្រ ស្រស់ ៖ ខ្ញុំមិនជាប់គុក និងស្លាប់ដោ​យ​សាររឿង អបាយមុខនោះឡើយ

ប្រធានគណបក្សយុវជនកម្ពុជាលោក ពេជ្រ ស្រស់​ បានអះអាងថា រូបលោកសុខចិត្តស្លាប់ ដោយសារអត់បាយទទួល ទាន និងសុខចិត្តជាប់ពន្ធនាគារ ដោយសាររឿងជាតិ និងជួយប្រជាពលរដ្ឋ តែថារូបលោក​នឹងមិនជាប់ពន្ធនាគារ ឬស្លាប់ដោយសាររឿងខុសច្បាប់ណាមួយឡើយ។

ទោះបីជាការអះអាងរបស់លោក ពេជ្រ ស្រស់ ប្រធានគណបក្សយុវជនកម្ពុជា  មិនបានបញ្ជាក់ថា ចង់សំដៅទៅលើរឿងអ្វីមួយក៏ដោយ តែគេអាចយល់បានថា ចង់សំដៅទៅលើករណីលោក សុខសុវណ្ណ វឌ្ឍនាសាប៊ុង ហៅ William Guang ប្រធានគណបក្សខ្មែរក្រោក ដែលសង្ស័យ​ជាប់ពាក់ព័ន្ធករណីជា​មួយក្រុមចោរប្លន់ឧកញ៉ា អ៊ាន សៀវម៉ី ហើយត្រូវបានកម្លាំងអាវុធហត្ថរាជធានីភ្នំពេញ ចាប់ខ្លួនកាលពីយប់ថ្ងៃទី ២០ ខែធ្នូ ឆ្នាំ ២០២១។

លោក ពេជ្រ ស្រស់ បានសរសេរនៅលើគណនីហ្វេសប៊ុក របស់លោកថា «ខ្ញុំស៊ូស្លាប់ ដោយសារអត់បាយហូប ខ្ញុំស៊ូជាប់គុកដោយសាររឿងជាតិ និងជួយប្រជាពលរដ្ឋ ក៏ប៉ុន្តែខ្ញុំមិនជាប់គុក និងស្លាប់ដោ​យ​សាររឿងអបាយមុខនោះឡើយ»។

សូមជម្រាបថា ក្រុមចោរប្លន់ផ្ទះឧកញ៉ា អ៊ាន សៀវម៉ី ដែលជាអ្នកលក់អនឡាញល្បីឈ្មោះ ត្រូវបានកម្លាំងអាវុធហត្ថរាជធានីភ្នំពេញ បង្ក្រាបបានហើយ កាលពីយប់មិញ។

ទំព័រហ្វេសប៊ុក របស់កងអាវុធហត្ថរាជធានីភ្នំពេញ បានឲ្យដឹងថា ក្រោមការចង្អុលបង្ហាញពីលោកនាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស នាយប់ថ្ងៃទី ២០ ខែធ្នូ ឆ្នាំ ២០២១នេះ កម្លាំងអាវុធហត្ថរាជធានីភ្នំពេញដឹកនាំដោយលោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស និងមេបញ្ជាការកងរាជអាវុធហត្ថរាជធានីភ្នំពេញ បានសម្រុកចូលសម្បុកក្រុមចោរប្លន់ផ្ទះ ឧកញ៉ា អ៊ាន សៀវម៉ី ប្រមូលបានគ្រឿងពេជ្រត្រឡប់មកវិញ និងដកហូតអាវុធចំនួន ៥ដើម (វែង ១ដើម ខ្លី ៤ដើម)។

ក្នុងចំណោមនោះ ក៏មានលោក សុខសុវណ្ណ វឌ្ឍនាសាប៊ុង ហៅ William Guang ប្រធានគណបក្សខ្មែរក្រោក ដែលសង្ស័យ​ជាប់ពាក់ព័ន្ធករណី ជាមួយក្រុមចោរប្លន់ឧកញ៉ា អ៊ាន សៀវម៉ី ផងដែរ។ កម្លាំងអាវុធហត្ថភ្នំពេញ កំពុងបន្តនិតិវិធីលើមនុស្សពាក់ព័ន្ធ ក្នុងចំណោមមនុស្សដែលឃាត់ខ្លូនចំនួន ១២នាក់(ប្រុស ៩នាក់ ស្រី ៣នាក់)៕

អត្ថបទ៖ ឃួន សុភ័ក្រ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត