អ្នកលក់បន្លែត្រីសាច់ក្នុងផ្សារច្បារអំពៅថា លក់មិនសូវដាច់ ព្រោះមានអ្នកលក់លើផ្លូវបែបអនាធិបតេយ្យ​ច្រើន

ក្រុមអាជីវករលក់ដូរនៅផ្សារបន្លែច្បារអំពៅ(ផ្សារក្រោម)បាននាំគ្នារអ៊ូរទាំសឹងគ្រប់ៗគ្នាដោយសារតែអាជ្ញាធរ​បណ្តែត​បណ្តោយឲ្យអ្នកលក់បន្លែមួយចំនួនដែលពុំស្តាប់តាមការណែនាំនៅបន្តលក់លើផ្លូវយ៉ាងអនាធិបតេយ្យថែមបង្កឲ្យកកស្ទះចរាចរណ៍រាល់ថ្ងៃទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្តែងនៅព្រឹកថ្ងៃទី៣១ ខែតុលានេះ គេសង្កេតឃើញភាពអនាធិបតេយ្យរបស់ក្រុមអ្នកយកបន្លែមកលក់លើចិញ្ចើមផ្លូវ៣៦៩ ស្ថិតនៅចន្លោះផ្សារច្បារអំពៅ(លើ និងក្រោម)ក្នុងភូមិកណ្តាល សង្កាត់ច្បារអំពៅទី២ ខណ្ឌច្បារអំពៅ យ៉ាងរំភើយគ្មានខ្លាចក្រែងអាជ្ញាធរបន្តិចឡើយ ដែលទង្វើនេះធ្វើឲ្យអ្នកលក់ដូរនៅផ្សារទាំងពីរនាំគ្នារអ៊ូរទាំព្រោះម្នាក់ៗលក់អត់ដាច់ដោយសារអ្នកទិញ ទៅទិញតែអ្នកលក់ក្រៅផ្សារបែបអនាធិបតេយ្យខាងលើនេះ។

លោក សាន់ ប៊ុនណា ប្រធានផ្សារបន្លែ(ផ្សារបន្លែក្រោម)បានបញ្ជាក់ប្រាប់ កម្ពុជាថ្មី ថា អ្នកលក់លើចិញ្ចើមផ្លូវខាងលើគឺជាកន្លែងគ្រប់គ្រងដោយអាជ្ញាធរសង្កាត់ច្បារអំពៅទី២ ដែលកន្លងមកអាជ្ញាធរបានណែនាំច្រើនដងដែរប៉ុន្តែអ្នកលក់មិនស្តាប់ហើយអាជ្ញាធរក៏ស្ងាត់ទៅ។

ក្រុមអាជីវករសំណូមពរដល់អាជ្ញាធរសូមជួយទប់ស្កាត់អ្នកលក់បន្លែខាងលើផងព្រោះបង្កភាពអនាធិបតេយ្យខ្លាំងណាស់ពិសេសបញ្ហាកកស្ទះចរាចរណ៍តែម្តង៕

អត្ថបទ៖ នរា