​លោក កែ​ គឹមយ៉ាន​ ណែនាំ​ឱ្យ​អាជ្ញាធរ​មូលដ្ឋាន​ជាប់ព្រំដែន​ទប់ស្កាត់​ការដាំកញ្ឆា​

ថ្លែងក្នុងទិវាអន្តរជាតិប្រយុទ្ធប្រឆាំងគ្រឿងញៀន​ នៅថ្ងៃទី២៩ កក្កដានេះ នៅខេត្តបន្ទាយមានជ័យ លោក កែ​ គឹមយ៉ាន​ ប្រធានអាជ្ញាធរជាតិប្រយុទ្ធប្រឆាំងគ្រឿងញៀន​ ណែនាំដល់អាជ្ញាធរនៅតាមស្រុកជាប់ព្រំ ដែនទាំងអស់ ត្រូវតែទប់ស្កាត់ការដាំកញ្ឆា ឲ្យមានប្រសិទ្ធភាព។ ជាមួយគ្នានេះ ត្រូវអប់រំពលរដ្ឋកុំឲ្យដាំ កញ្ឆា ព្រោះជាអំពើខុសច្បាប់។  

ក្នុងឱកាសនោះ​ លោក កែ​ គឹមយ៉ាន​ លើកឡើងថា​ បើទោះបីជាមមាញឹកក្នុងកិច្ចការប្រយុទ្ធនឹងជំងឺកូវីដ-១៩​ យ៉ាងណាក្ដី ប៉ុន្តែការងារប្រយុទ្ធប្រឆាំងគ្រឿងញៀន គឺមិនត្រូវបានបន្ធូរដៃឡើយ ទាំងការងារផ្សព្វ ផ្សាយអប់រំ​ ព្យាបាល​ ស្តារនីតិសម្បទា និងការអនុវត្តច្បាប់លើបទល្មើសគ្រឿងញៀន​។

លោក ស្នើឲ្យមជ្ឈមណ្ឌលជីវិតថ្មីភ្នំបាក់ ត្រូវចលនាប្រជាពលរដ្ឋ​ និងអាណាព្យាបាលចូលរួមការងារ ប្រយុទ្ធប្រឆាំងគ្រឿងញៀននៅក្រុមគ្រួសារ ក៏ដូចជាសហគមន៍។

ទន្ទឹមគ្នានេះ គឺក្រុមប្រឹក្សា​ឃុំ-សង្កាត់ ត្រូវដោះស្រាយបញ្ហាគ្រឿងញៀននៅក្នុងមូលដ្ឋានឲ្យមានប្រសិទ្ធភាពខ្ពស់ តាមរយ:ការកសាងភូមិ-ឃុំ-សង្កាត់មានសុវត្ថិភាព​ និងភូមិ-ឃុំ​-សង្កាត់ ​«ស​ គ្មានគ្រឿងញៀន​» រួមទាំងប្រកាន់ខ្ជាប់ទិសស្លោក បីកុំ​ មួយរាយការណ៍​។

ជាមួយគ្នានេះ​លោកជំរុញឲ្យមន្ទីរ​ អង្គភាព​ អាជ្ញាធរ​មានសមត្ថកិច្ចទាំងអស់ត្រូវទប់ស្កាត់ និងបង្រ្កាបការ ប្រើប្រាស់បារី​អេឡិចត្រូនិក​ និងបន្តអនុវត្តយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៧ របស់ រាជរដ្ឋាភិបាលកម្ពុជា​ ផងដែរ៕

អត្ថបទ ៖ វ៉ាន់ ណាង