សន្តិសុខសង្គម

ផ្ទុះអាវុធជាច្រើនគ្រាប់ ក្នុងប្រតិបត្តិការចុះបង្ក្រាបក្រុមចាប់ជំរិត នៅបុរីមួយកន្លែង ឃាត់មនុស្សជិត១០ នាក់

បានផុស

៤ years មុន

នៅ

ថ្ងៃសៅរ៍ ៨ តុលា ២០២២

ដោយ

ស្នូរអាវុធជាច្រើនគ្រាប់ បានបន្លឺឡើងក្នុងរង្វង់ប្រតិបត្តិការរបស់សមត្ថកិច្ចកងរាជអាវុធហត្ថរាជធានីភ្នំពេញ សហការជាមួយកម្លាំងអាវុធហត្ថ ២ ខណ្ឌ គឺខណ្ឌមានជ័យ និងខណ្ឌច្បារអំពៅ បើកការចុះបង្ក្រាបក្រុមចាប់ជំរិតមួយក្រុមធំ ដោយធ្វើឡើងនៅក្នុងបុរីប៉េងហ៊ួតបឹងស្នោ ក្នុងសង្កាត់និរោធ ខណ្ឌច្បារអំពៅ កាលពីវេលាម៉ោង ១៨ និង ៣០ នាទី យប់ថ្ងៃទី ០៧ ខែតុលា ឆ្នាំ ២០២២។

តាមប្រភពព័ត៌មានមន្ត្រីសមត្ថកិច្ចឲ្យដឹងថា ប្រតិបត្តិការនេះធ្វើឡើងដោយកម្លាំងកងរាជអាវុធហត្ថ បានបើកការបង្ក្រាបក្រុមជំរិតមួយក្រុមរួចទៅហើយ នៅមូលដ្ឋានខណ្ឌមានជ័យ ហើយក៏ឈានទៅសហការបន្តជាមួយកម្លាំងកងអាវុធហត្ថខណ្ឌច្បារអំពៅ ដើម្បីបង្ក្រាបបក្សពួករបស់ពួកគេបន្តទៀតតែម្ដងទៅ។

ក្នុងប្រតិបត្តិការខាងលើ កម្លាំងអាវុធហត្ថ បានឃាត់ខ្លួនមនុស្សប្រមាណជិត ១០ នាក់ ក្នុងនោះ មានជនជាតិវៀតណាម និងជនជាតិចិនជាដើម។ បច្ចុប្បន្ន អ្នកពាក់ព័ន្ធទាំងអស់ ត្រូវបានបញ្ជូនទៅកាន់ ទីបញ្ជាការដ្ឋានកងរាជអាវុធហត្ថរាជធានីភ្នំពេញ ដើម្បីសាកសួរបន្តនីតិវិធី។

សូមបញ្ជាក់ថា ជុំវិញការផ្ទុះអាវុធនោះ គេពុំទាន់ដឹងថា ជាការបាញ់របស់សមត្ថកិច្ច ដើម្បីគំរាមចាប់ខ្លួនក្រុមជនល្មើស ឬក៏ជាការបាញ់តបតគ្នានោះឡើយ ដោយគ្រាន់ដឹងថា ការផ្ទុះអាវុធនេះ ពុំបណ្ដាលឲ្យមនុស្សណាម្នាក់រងរបួសឡើយ៕

អត្ថបទ ៖ លីហេង