សន្តិសុខសង្គម

ឆេះផ្ទះអ្នកលក់ខោអាវ និងអីវ៉ាន់ចាប់ហួយមួយកន្លែង ក្នុងផ្សារពង្រ ខូចខាតសរុបជាង ២ ម៉ឺនដុល្លារ

បានផុស

៤ years មុន

នៅ

ថ្ងៃចន្ទ ៣១ តុលា ២០២២

ដោយ

អ៊ិន ពិសី

ភ្លើងឆេះផ្ទះអ្នកលក់ខោអាវ និងអីវ៉ាន់ចាប់ហួយ នៅក្នុងផ្សារពង្រ ខូចខាតសរុបអស់ជាង ២ ម៉ឺនដុល្លារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ករណីខាងលើនេះបានកើតឡើងកាលពីវេលាម៉ោង ២០ និង ៣០ នាទី យប់ថ្ងៃទី ៣០ ខែតុលា ឆ្នាំ ២០២២ ស្ថិតក្នុងផ្សារពង្រ ឃុំពង្រ ស្រុករលាប្អៀរ ខេត្តកំពង់ឆ្នាំង។

លោក លុយ ឌីណា ស្នងការរងខេត្តកំពង់ឆ្នាំង ទទួលបន្ទុកផ្នែកអគ្គិភ័យ បានឲ្យដឹងថា ករណីឆេះផ្ទះអ្នកលក់ខោអាវ និងអីវ៉ាន់ចាប់ហួយខាងលើនេះ បណ្ដាលមកពីមានការធ្វេសប្រហែស ដោយម្ចាស់ផ្ទះដោតឌុយទូទឹកកកក្លាស្សេភេសជ្ជៈមិនមានការប្រុងប្រយ័ត្ន ទុកចោលយូរ ទើបឡើងកម្ដៅខ្លាំង។

ខ្សែភ្លើងតូចទប់មិនជាប់នឹងកម្ដៅភ្លើងខ្លាំង ទើបបណ្ដាលឲ្យរលួយខ្សែអ៊ីសូឡង់ នៅសល់តែខ្សែភ្លើងស្រាតប៉ះគ្នា ក៏ទុស្សេ បង្កើតជាអគ្គិភ័យឆាបឆេះតែម្ដង។ ចំពោះអីវ៉ាន់ និងទំនិញ ខូចខាតសរុបប្រមាណជាង ២ ម៉ឺនដុល្លារ។

លោក លុយ ឌីណា បន្តឲ្យដឹងថា ក្នុងកិច្ចប្រតិបត្តិការអន្តរាគមន៍ពន្លត់អគ្គិភ័យខាងលើនេះ ស្នងការនគរបាលខេត្ត បានប្រើប្រាស់រថយន្តពន្លត់អគ្គិភ័យចំនួន ៦ គ្រឿង អស់ទឹក ១២ រថយន្ត បាញ់ពន្លត់រលត់ទាំងស្រុង និងមិនបណ្ដាលឲ្យឆេះរាលដាលទៅដល់ផ្ទះ និងតូបលក់ដូរអ្នកជិតខាងក្នុងផ្សារនេះឡើយ៕

អត្ថបទ ៖ ឈៀង ថារិទ្ធ