អាជ្ញាធរខណ្ឌច្បារអំពៅ ចាប់ផ្ដើមធ្វើចិញ្ចើមផ្លូវមុខផ្សារ​ចាមព្រែកប្រា ដើម្បីទប់ស្កាត់ការលក់ដូររំលោភ​លើដងផ្លូវ

នាសប្តាហ៍ដើមខែតុលានេះ អាជ្ញាធរខណ្ឌច្បារអំពៅ បានរៀបចំក្រាលការ៉ូឡាធ្វើចិញ្ចើមផ្លូវមុខផ្សារខ្មែរ ឥស្លាម (ផ្សារចាម)ដើម្បីទប់ស្កាត់ការដាក់លក់រំលោភលើចិញ្ចើមផ្លូវ។

លោក គុយ គឹមហ៊ាង នាយករងរដ្ឋបាលសាលាខណ្ឌច្បារអំពៅ បានឲ្យដឹងថា ចំពោះការធ្វើចិញ្ចើមផ្លូវមុខផ្សារជនជាតិខ្មែរឥស្លាម(ផ្សារចាម) គឺជាការចំណាយថវិការបស់សាលារាជធានីភ្នំពេញ ដើម្បីអភិវឌ្ឍន៍ក្នុងមូលដ្ឋានប្រចាំឆ្នាំ២០២៥។ចំពោះការស្នើសុំធ្វើចិញ្ចើមផ្លូវខាងលើ ស្ថិតនៅតាមបណ្តោយផ្លូវ៣៦៩ ក្នុងទឹកដីសង្កាត់ព្រែកប្រា ខណ្ឌច្បារអំពៅ ក្នុងគោលបំណងទប់ស្កាត់ការដាក់លក់អីវ៉ាន់លើផ្លូវដែលកន្លងមករងផលប៉ះពាល់ដល់ការធ្វើដំណើរជារៀងរាល់ថ្ងៃ។

លោកនាយករងរដ្ឋបាលសាលាខណ្ឌច្បារអំពៅ បានបញ្ជាក់ថា ចំពោះវិធានការរៀបចំសណ្តាប់លើដងផ្លូវមុខផ្សារចាមនេះ គឺបីដូចវែកចកកណ្តាលបឹង ហើយការធ្វើចិញ្ចើមផ្លូវនេះ អាចទប់ស្កាត់លើផ្លូវបានដោយជោគជ័យ។

ប្រជាពលរដ្ឋ និងអ្នកធ្វើដំណើរឆ្លងកាត់ផ្សារចាមព្រែកប្រា នាំគ្នាសាទរព្រោះរាល់ថ្ងៃនេះលំបាកធ្វើដំណើរដោយសារតែស្ទះចរាចរណ៍ខ្លាំង៕

អត្ថបទ៖ នរា