កីឡា

ហោចណាស់ជួបគ្នា ៥ ប្រកួតទៀត! ភ្នំពេញក្រោន កាន់ធ្វើឲ្យភ្ញាក់ផ្អើលត្រៀមប៉ះ ព្រះខ័នរាជស្វាយរៀង

បានផុស

៧ ខែ មុន

នៅ

ថ្ងៃសុក្រ ២៦ ធ្នូ ២០២៥

ដោយ

ភ្នំពេញក្រោន កាន់តែពង្រឹងសមត្ថភាពក្រុមខ្លាំងតាមរយៈការនាំចូលកីឡាករថ្មីបន្ថែមទៀតដើម្បីប្រជែងជើងឯកក្នុងស្រុក និងពានរង្វាន់អន្តរជាតិ AFC Challenge League ដែលត្រូវជួបព្រះខ័នរាជស្វាយរៀង ក្នុងវគ្គ ៨ ក្រុមចុងក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភ្នំពេញក្រោន ជាក្រុមតែមួយគត់ដែលមិនទាន់បរាជ័យឡើយក្នុងលីគបាល់ទាត់កំពូលកម្ពុជា ដោយបានឈ្នះ ៨ ប្រកួត និងស្មើ ៣ ប្រកួត រកបាន ២៧ ពិន្ទុ កំពុងឈរចំណាត់ថ្នាក់លេខ២។ ពួកគេជាក្រុមមានជើងក្រោមរឹងមាំជាងគេ តាមរយៈកីឡាករបរទេសគឺកីឡាករកូរ៉េខាងត្បួង Park Yi-young, កីឡាករហូឡង់ Raul Feher និងកីឡាកររ៉ូមានី Rick Ketting។

នៅតំបន់ប្រយុទ្ធ ពួកគេមានកីឡាករអ៊ុយក្រែន Maksym Prydun, កីឡាករនូវែលសេឡង់ Moses Dyer និងកីឡាករកូឡុំប៊ី Makerlo Tellez។ បន្ថែមលើកីឡាករបរទេសទាំង ៦ នាក់ត្រូវតាមកូតាក្នុងលីគ ភ្នំពេញក្រោន មានកីឡាករកូរ៉េខាងត្បូងម្នាក់ទៀត Kim Seo-In ដែលសម្រាប់ពានរង្វាន់អន្តរជាតិ។

បន្ទាប់ពីចប់ជើងទី១ ភ្នំពេញក្រោន បាននាំចូលកីឡាករកូឡុំប៊ីសញ្ជាតិខ្មែរ Andres Neito ក្នុងនាមជាកីឡាករខ្មែរ ដើម្បីពង្រឹងសមត្ថភាពនៅតំបន់ជួរមុខ។ តាមរយៈការនាំចូលអតីតខ្សែប្រយុទ្ធរបស់ខ្លួនគឺច្បាស់ណាស់តំបន់ជួរមុខរបស់ពួកគេកាន់តែគ្រោះថ្នាក់។ មិនត្រឹមតែប៉ុណ្ណោះចុងក្រោយបំផុត ពួកគេយកបានកីឡាករប្រេស៊ីល Breno Caetano ក្នុងលក្ខខណ្ឌខ្ចីជើងពីក្លិបវិសាខា។

អ្នកគាំទ្រដឹងស្រាប់ហើយកីឡាករ Breno Caetano ត្រូវបានអ្នកគាំទ្រហៅកីឡាករសូតដែកដែលលេងក្នុងតំបន់បម្រើការពារ។ តួនាទីនេះ រូបគេនឹងជួយបង្កើនតំបន់បម្រើរបស់ភ្នំពេញក្រោនឲ្យកាន់តែមានគុណភាពតាមរយៈការចាប់ដៃគូជាមួយកីឡាករខ្មែរឆ្នើមៗដូចជា អ៊ន ចាន់ប៉ូលីន, កើត ពេជ្រ និង ឡុង ភារ៉ាត់។

ការត្រៀមខ្លួនដ៏ភ្ញាក់ផ្អើលនេះ ពួកគេកំពុងប្រជែងជាមួយ ព្រះខ័នរាជស្វាយរៀង ទាំងពានរង្វាន់ក្នុងស្រុក និងអន្តរជាតិ។ ពួកគេជាក្រុមតែមួយគត់ដែលបានធ្វើឲ្យ ព្រះខ័នរាជស្វាយរៀង ស្គាល់បរាជ័យនៅរដូវកាលនេះ ហើយជើងទី ២ ក្នុងលីគ ពួកគេជួបគ្នានៅថ្ងៃទី១៨ ខែមករា ឆ្នាំ ២០២៦។

បន្ទាប់មក ភ្នំពេញក្រោន និង ព្រះខ័នរាជស្វាយរៀង ត្រូវជួបគ្នា ២ ប្រកួតទៀត ក្នុងពានរង្វាន់ AFC Challenge League វគ្គ ៨ ក្រុមចុងក្រោយ គឺជើងទី១ ថ្ងៃទី៥ ខែមីនា និងជើងទី២ ថ្ងៃទី១២ ខែមីនា។

នៅចំពោះមុខ ពួកគេត្រូវជួបគ្នា ៣ ប្រកួតទៀត ប៉ុន្តែនៅមានការជួបគ្នាទៀតក្នុងលីគបាល់ទាត់កំពូលកម្ពុជា បន្ទាប់ពីចប់ជើងទី២ ពីព្រោះក្រុមលំដាប់កំពូលទាំង ៦ ត្រូវប្រកួតវិលជុំសន្សំពិន្ទុ ២ ជុំទៀត។ មានន័យថា ភ្នំពេញក្រោន និង ព្រះខ័នរាជស្វាយរៀង ត្រូវជួបគ្នា ២ លើកទៀតក្នុងវគ្គ ៦ ក្រុមចុងក្រោយ។ ដូច្នេះ ពួកគេ ហោចណាស់ ត្រូវជួបគ្នា ៥ ប្រកួតទៀតនៅក្នុងលីគ ប៉ុន្តែអាចជួបគ្នាទៀតនៅពានរង្វាន់សម្តេចអគ្គមហាសេនាបតីតេជោ ហ៊ុន សែន។