កីឡា

Miura គ្រោងបញ្ឈប់ Basto ដែលធ្លាប់ផ្តួល សុវណ្ណារី ដើម្បីឱកាសខ្សែក្រវាត់

បានផុស

៥ years មុន

នៅ

ថ្ងៃពុធ ១២ ឧសភា ២០២១

ដោយ

នារីគុនចម្រុះជប៉ុន Ayaka Miura សម្លឹងឃើញឱកាសបោះជំហានទៅប្រកួតដណ្តើមខ្សែក្រវាត់ពិភពលោក នៅពេលនាងត្រូវប្រកួតជាមួយកីឡាការិនី Rayane Bastos នៅព្រឹត្តិការណ៍ ONE: DANGAL ថ្ងៃសៅរ៍ ទី១៥ ខែឧសភានេះ។

អ្នកលេងគុនចម្រុះជប៉ុនបានចាត់ទុកការប្រកួតជាមួយកីឡាការិនីប្រេស៊ីលដើម្បីជាការទម្លាយទ្វារឆ្ពោះទៅរកឱកាសប្រកួតខ្សែក្រវាត់ពិភពលោក។

នាង Miura បាននិយាយថា «តាមពិតទៅ ខ្ញុំនឹងកំដ Bastos ដោយក្បាច់ក្រោម ហើយឃ្លេឲ្យនាងចុះចាញ់។ នេះជាអ្វីដែលកើតមានក្នុងគំនិតខ្ញុំយូរហើយ»។

នេះជាការឡើងសង្វៀន ONE លើកទី៥របស់កីឡាការិនីជប៉ុនរូបនេះ បន្ទាប់ពីការប្រកួត៤លើកកន្លងមកឈ្នះ៣ដងជាប់គ្នា និងលើកទី៤បានចាញ់។ សម្រាប់ជ័យជម្នះ៣លើកជាប់គ្នាគឺនាងប្រើជំនាញឃ្លេឲ្យដៃគូចុះចាញ់ទាំងពីរនាក់ ប៉ុន្តែការប្រកួតចុងក្រោយនាងបានចាញ់កីឡាការិនីសិង្ហបុរី Tiffany Teo ក្នុងទឹកទី៣។

Miura បាននិយាយថា បន្ទាប់បរាជ័យចុងក្រោយ នាងបានខិតខំហ្វឹកហាត់មយ៉ាងខ្លាំង និងបានសិក្សាស្វែងយល់យ៉ាងស៊ីជម្រៅពីចំណុចខ្សោយរបស់ខ្លួនឯង ដូច្នេះការឡើងសង្វៀនលើកនេះនាងដឹងថា អ្វីដែលត្រូវធ្វើ និងអ្វីដែលប្រុងប្រយ័ត្នហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមជាមួយគ្នានេះ Miura បានសិក្សាស្វែងយល់យ៉ាងម៉ត់ចត់ពីដៃគូ Bastos និងជឿជាក់ថា ដៃគូម្នាក់នេះមានជំនាញ និងសមត្ថភាពវ៉ៃបានគ្រប់ក្បាច់ទាំងអស់។

កីឡាការិនីអាយុ៣០ឆ្នាំមកពីទីក្រុងតូក្យូបាននិយាយថា «Bastos ពូកែវ៉ៃកណ្តាប់ដៃ ដូច្នេះជាផ្នែកគ្រោះដែលខ្ញុំត្រូវប្រយ័ត្នមែនទែន។ មើលវីដេអូប្រកួត នាងក៏បានបញ្ឈប់ដៃគូដោយក្បាច់ឃ្លេដែរ។ ខ្ញុំអាចនិយាយបានថា ក្បាច់ក្រោមគាត់ក៏ល្អ ក្បាច់លើក៏ល្អ ប៉ុន្តែក្នុងចិត្តខ្ញុំគឺលេងក្បាច់ក្រោមហើយ»។

«បើខ្ញុំមិនអាចឃ្លេ Bastos ឲ្យចុះចាញ់ទេ ដូច្នេះខ្ញុំគ្មានផ្លូវឈ្នះទេ តែខ្ញុំជឿជាក់លើជំនាញក្រោមរបស់ខ្ញុំអាចធ្វើបាន»។

វាជាការប្រកួតមិត្តភាព តែកីឡាការិនីជប៉ុនដែលមានបទពិសោធប្រកួត១៣ដង (ឈ្នះ១០ និងចាញ់៣)បានចាត់ទុកជារឿងដ៏សំខាន់សម្រាប់នាងបើកផ្លូវសម្រាប់ផែនការធំរបស់ខ្លួន។

នាងបញ្ជាក់ថា «ខ្ញុំចាប់អារម្មណ៍ប្រកួតនរណាក៏បាននៅក្នុងប្រភេទទម្ងន់២យ៉ាង។ ខ្ញុំចង់ប្រកួតជាមួយ Teo សាថ្មី ជាពិសេសចង់ប្រកួតដណ្តើមខ្សែក្រវាត់ពិភពលោក»។ នាងជឿថា នាងអាចទៅដណ្តើមខ្សែក្រវាត់ជាមួយរាជនីសង្វៀនគុនចម្រុះ Angela Lee និងរាជនីសង្វៀនពូកែកណ្តាប់ Xiong Jing Nan។

Miura បញ្ជាក់ថា «នរណាក៏រវាង Angela ឬ Xiong ខ្ញុំនឹងដើរលើផ្លូវនេះដល់ពួកគេ ដូច្នេះពួកគេមិនអាចរត់គេចចេញពីផ្លូវរបស់ខ្ញុំបានឡើយ»៕