កីឡា

កម្ពុជា រំពឹងឈ្នះមេដាយមាសលើប្រភេទកីឡា ៤ ក្នុងព្រឹត្តិការណ៍កីឡាស៊ីហ្គេមនៅវៀតណាមឆ្នាំនេះ

បានផុស

៤ years មុន

នៅ

ថ្ងៃសុក្រ ២២ មេសា ២០២២

ដោយ

ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានគូសបញ្ជាក់ថា កម្ពុជាអាចទទួលបានមេដាយមាស លើប្រភេទកីឡាមួយចំនួន ៤ រួមមាន ប៉េតង់, វ៉ូវីណាម, តេក្វាន់ដូ និងគុនមួយ ពីព្រឹត្តិការណ៍កីឡាអាស៊ីអាគ្នេយ៍ លើកទី ៣១ (SEA Games 31) នៅប្រទេសវៀតណាម នាពេលខាងមុខ។ នេះបើយោងតាមការបញ្ជាក់ដោយឯកឧត្តមផ្ទាល់ទៅកាន់វេបសាយស៊ីហ្គេមផ្លូវការរបស់វៀតណាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម CAMSOC មជ្ឈមណ្ឌលហ្វឹកហ្វឺនកីឡាជាតិ ចំណុះក្រោមក្រសួងអប់រំ យុវជន និងកីឡា បានប្រមូលផ្តុំក្រុមកីឡាករជម្រើសជាតិជាតិ ដើម្បីចូលរួមប្រកួតកីឡាចំនួន ៣៣ប្រភេទ ក្នុងចំណោម ៤០ ប្រភេទកីឡា នៃស៊ីហ្គេម លើកទី ៣១ ហើយកម្ពុជា បានសម្រេចបិទបញ្ជីឈ្មោះប្រតិភូចំនួន ៥៥០ នាក់ (អត្តពលិក ៣៦៣ នាក់) ក្នុងការចូលរួមព្រឹត្តិការណ៍កីឡាដដែលខាងលើនៅឆ្នាំនេះ។

ឯកឧត្តមបានប្រាប់វិបសាយ seagames2021.com ថា ខ្លួនលោកជឿជាក់កម្ពុជាអាចនឹងទទួលបានមេដាយមាស នៅស៊ីហ្គេម លើកទី ៣១ ច្រើនជាងលើកមុន នៅហ្វីលីពីន កាលពីឆ្នាំ ២០១៩។

កាលពី ៣ ឆ្នាំមុន អត្តពលិកកម្ពុជា បាននាំយកមេដាយមកប្រទេសវិញចំនួន ៤៦ មេដាយសរុប ក្នុងនោះរួមមានមាស ៤ គ្រឿង, ប្រាក់ ៦ គ្រឿង និងសំរឹទ្ធ ៣៦ គ្រឿង ហើយឈរនៅលេខរៀងទី ៨ ក្នុងចំណោមប្រទេសចំនួន ១១ ដែលបានចូលរួម។

អត្តពលិកកម្ពុជា នឹងចូលរួមប្រកួតកីឡាក្បាច់គុនផ្សេងៗដើម្បីទទួលបានបទពិសោធន៍ឆ្ពោះទៅរកគោលដៅដែលបានកំណត់សម្រាប់ស៊ីហ្គេម លើកទី ៣២ ដែលគ្រោងធ្វើឡើងនាឆ្នាំ ២០២៣ នៅរាជធានីភ្នំពេញ។ វានឹងជាលើកទី ១ សម្រាប់កម្ពុជា ក្នុងការធ្វើជាម្ចាស់ផ្ទះនៃព្រឹត្តិការណ៍កីឡាប្រចាំតំបន់រយៈពេល ២ ឆ្នាំម្ដងមួយនេះ ចាប់តាំងពីការប្រកួតកីឡាស៊ីហ្គេម លើកដំបូងក្នុងឆ្នាំ ១៩៥៩។

ស៊ីហ្គេម លើកទី ៣១ នឹងប្រព្រឹត្តទៅនៅទីក្រុងហាណូយ និងតំបន់ជិតខាងចំនួន ១១ ខេត្ត ពីថ្ងៃទី ១២ ដល់ថ្ងៃទី ២៣ ខែឧសភា ដោយមានកីឡាចំនួន ៤០ ដែលមាន ៥២៦ វិញ្ញាសា ដាក់ឱ្យប្រកួត៕

អត្ថបទ៖ មន្នីរ័ត្ន

Related Topics:ការប្រកួត