កីឡា

មានការសង្ស័យ Nick Taylor អាចចូលព្រះខ័នរាជស្វាយរៀង

បានផុស

៣ years មុន

នៅ

ថ្ងៃចន្ទ ២៣ មករា ២០២៣

ដោយ

កីឡាករបាល់ទាត់ជម្រើសជាតិកម្ពុជាខ្មែរ-អាមេរិក Nick Taylor បានប្រកាសពីការចាកចេញពីក្លឹប Orlando City B នៅសហរដ្ឋអាមេរិកហើយកាលពីយប់មិញ និងបានបង្ហាញពីក្តីរំភើបក្នុងការចាប់ផ្តើមទំព័រជីវិតបាល់ទាត់ថ្មីនៅក្លឹបផ្សេង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Nick បានសរសេរថា ៖«ខ្ញុំសូមអរគុណគ្រប់យ៉ាងចំពោះទីក្រុងដែលបានផ្លាស់ប្តូរជីវិតរបស់ខ្ញុំ។ រំភើបរីករាយសម្រាប់ទំព័រថ្មីនាពេលខាងមុខ»។ បែបនេះក្តី កីឡាករមិនបានបង្ហាញពីសញ្ញាណាមួយពាក់ព័ន្ធនឹងក្លឹបថ្មីដែលរូបគេនឹងចូលរួមឡើយ មិនដឹងថា នៅអាមេរិក ឬប្រទេសផ្សេង។

ទោះបីជាយ៉ាងណា សម្រាប់ការផុសរបស់ Nick Taylor ត្រូវបានគេតាមដានឃើញថា ជីតារបស់ខ្លួនបានផុសពីចៅរបស់លោកចូលរួមជាមួយក្លឹបព្រះខ័នរាជស្វាយរៀង ដែលក្លឹបស្ថិតនៅក្នុងកំណើតរបស់លោក។ យ៉ាងណា ការផុសរបស់ជីតា ត្រូវបានលុបចោលវិញក្នុងរយៈពេលមិនដល់១ម៉ោងក្រោយ។

ការប្រកាសពីសាមីខ្លួន ឬពីនរណាម្នាក់ពាក់ព័ន្ធក្លឹបថ្មីធ្វើទៅបានទាល់តែក្លឹបប្រកាសទើបក្លាយជាព័ត៌មានផ្លូវការ។

កន្លងមក Nick Taylor មានព័ត៌មានពាក់នឹងការចូលរួមជាមួយក្លឹបមួយចំនួននៅក្នុងលីគកំពូលកម្ពុជាដូចជា បឹងកេត និងភ្នំពេញក្រោនជាដើម ប៉ុន្តែមិនទាន់មានក្លឹបនៅកម្ពុជាណាមួយប្រកាសជាផ្លូវការឡើយ។

បើនៅលើគណនី Wikipedia របស់ក្លឹបព្រះខ័នរាជស្វាយរៀង និងសាមីខ្លួនកីឡាករ Nick Taylor ត្រូវបានដាក់បញ្ចូលហើយ ប៉ុន្តែប្រភពនេះមិនអាចយកជាការបានឡើយ។ វាជាគណនីដែលនរណាក៏អាចចូលដាក់បានដែរ។

សូមបញ្ជាក់ថា រដូវកាល២០២២កន្លងទៅនេះ Nick Taylor លេងឲ្យក្លឹប Orlando City B ដោយបង្ហាញខ្លួន២២ប្រកួតរកបាន១គ្រាប់ ហើយក៏ត្រូវបានកោះហៅចូលជម្រើសជាតិកម្ពុជាដែលបង្ហាញខ្លួនបាន៥លើកក្នុងនោះមិត្តភាព២លើក និងក្នុងពានរង្វាន់ AFF Championship ៣លើក រកបាន១គ្រាប់ឲ្យជម្រើសជាតិ៕

អត្ថបទ៖ វីរបុត្រ

Related Topics:Nick Taylor