កម្លាំងសំខាន់២រូបរបស់ Barca និង Real Madrid ជាពីរបួសទាន់ពេល មុនវគ្គផ្តាច់ព្រ័ត្រ Copa del Rey

អ្នកចាំទី Marc-Andre ter Stegen និង Kylian Mbappe បាន​ជាសះ​ស្បើយ​ពីរបួសទាន់ពេល មុនការប្រកួតវគ្គផ្តាច់ព្រ័ត្រពាន Copa del Rey រវាងក្រុមអ្នកមានបុណ្យ FC Barcelona និង Real Madrid នៅថ្ងៃ អាទិត្យ ទី ២៧ សប្តាហ៍នេះ។

អ្នកចាំទី​របស់ Barcelona កីឡាករ Stegen បានសម្រាកនៅក្រៅទីលានអស់រយៈពេលជិតមួយរដូវកាលមកហើយ ពោលគឺតាំងពី ខែកញ្ញា ឆ្នាំ ២០២៤ មកម្ល៉េះ ដោយសាររបួសដាច់សរសៃជង្គង់ ACL ដែលពេលនោះនៅក្នុងការប្រកួតក្រុមអ្នកមានបុណ្យយកឈ្នះលើក្រុម Villarreal ក្នុងលទ្ធផល ៥-១។

ដោយឡែកខ្សែប្រយុទ្ធរបស់ Real Madrid គឺ​កីឡាករ Kylian Mbappe បានរងរបួសកជើងខាងស្តាំអំឡុងការប្រកួតជើងទី ២ វគ្គ ៨ ក្រុមចុងក្រោយពាន Champions League ដែល Real Madrid បរាជ័យក្រោមថ្វីជើងក្រុម Arsenal ២-១ កាលពីថ្ងៃទី ១៧ ខែ មេសា កន្លងទៅ។ របួសនេះ បានធ្វើឱ្យខ្សែប្រយុទ្ធសញ្ជាតិ បារាំង វ័យ ២៦ ឆ្នាំ អវត្តមាន ២ ប្រកួតមកហើយ គឺការប្រកួតទល់នឹង Athletic Club និង Getafe កាលពីយប់មិញ។

ទោះបីជាយ៉ាងណាក៏ដោយ អ្នកកាសែត អ៉ីតាលី លោក Fabrizio Romano បានអះអាងថា កីឡាករទាំង ២ ខាងលើសុទ្ធតែបានចូលហ្វឹកហាត់វិញហើយ ហើយពួកគេនឹងមានឈ្មោះប្រកួតនៅក្នុងការប្រកួតវគ្គផ្តាច់ព្រ័ត្រពាន Copa del Rey នាថ្ងៃអាទិត្យ ចុងសប្តាហ៍នេះ៕

ប្រែសម្រួលអត្ថបទ៖ សេម កុសល
ប្រភព៖ Fabrizio Romano