ក្លិប Win Streak បង្ហោះសារចាត់ទុក វឿន វាសនា ជាកីឡាករសំខាន់ រហូតបន្តកុងត្រា​ថ្មី

នៅថ្ងៃសុក្រ ទី ២៧ ខែ មិថុនា ឆ្នាំ ២០២៥ ក្លិបបាល់ទះ Win Streak នៃលីគ​បាល់ទះកំពូល​តៃវ៉ាន់ បានប្រកាសជាផ្លូវការអំពីការបន្តកិច្ចសន្យាថ្មីជាមួយកីឡាករកម្ពុជា វឿន វាសនា រយៈពេល ១ រដូវកាលទៀត។

ទាក់ទងនឹងការបន្តកិច្ចសន្យាថ្មីនេះ ក្លិប Win Streak បានប្រកាសនៅលើ IG ផ្លូវការរបស់ក្លិប​យ៉ាងដូច្នេះថា ៖ «កីឡាករបរទេសមកពីប្រទេស កម្ពុជា គឺ វឿន វាសនា បានបន្តកិច្ចសន្យាជាផ្លូវការ។ គាត់នឹងបន្តពាក់ឯកសណ្ឋានរបស់ Win Streak ក្នុងរដូវកាលថ្មីបន្តទៀត។ វាសនា បាន​ចាប់​ផ្តើម​ជា​កីឡាករ​អាជីព​តាំងពីអាយុ ១៩ ឆ្នាំ ហើយគាត់មានបទពិសោធយ៉ាងច្រើនលើឆាកអន្តរជាតិ។ អំឡុងពេល Bryan មានបញ្ហារបួស គាត់បានដើរតួយ៉ាងសំខាន់ជាអ្នកវាយផ្តាច់របស់ក្រុម ហើយនៅចុងបញ្ចប់រដូវ​កាល គាត់បានឈ្នះពានកីឡាករល្អបំផុតប្រចាំព្រឹត្តិការណ៍ក្នុងគម្រប់ខួបលើកទី ២០ នៃការកកើតលីគ»។

ចំពោះការបន្តកិច្ចសន្យាថ្មីនេះ គឺមិនទាន់មានព័ត៌មានលម្អិតណាមួយបញ្ជាក់អំពីតម្លៃពលកម្មថ្មីរបស់អ្នកលេងបាល់ទះជម្រើសជាតិ កម្ពុជា រូបនេះនៅឡើយទេ ប៉ុន្តែបើក្រឡេកទៅមើលអំពីតម្លៃនៃកិច្ចសន្យាចាស់ លោក អាំង សិរីពិសិដ្ឋ អគ្គលេខាធិការ និង​ជា​អនុប្រធាន​សហព័ន្ធ​កីឡា​បាល់ទះ​កម្ពុជា ធ្លាប់បានបង្ហើបថា វាសនា ទទួលបានថ្លៃនឿយហត់នៅទីនោះជិត ២០ ម៉ឺនដុល្លារអាមេរិកក្នុងមួយឆ្នាំ។

វឿន វាសនា បាន​ចូល​រួម​ជា​មួយ​ក្លិប Win Sreak កាល​ពី​ចុង​ឆ្នាំ​២០២៣ បន្ទាប់​ពី​ចប់​ព្រឹត្តិការណ៍​កីឡា​ទ្វីប​អាស៊ី Asain Games នៅ​​​ប្រទេស​ចិន។ រហូត​មកដល់​ពេល​នេះ​រូប​គេ​បាន​បន្តលេង​ឲ្យ​ក្លិប​តៃវ៉ាន់​ចូល​រដូវ​កាល​ទី​ ៣ ​ហើយ គិតត្រឹមរដូវកាល ២០២៦-២០២៧ ខាងមុខ។ ​

ក្នុងការលេងនៅ តៃវ៉ាន់ ២ រដូវកាលមកនេះ ជាពិសេសរដូវកាលមុន ២០២៤-២០២៥ វឿន វាសនា ពិតជា​បង្ហាញសមត្ថភាពលេចធ្លោមែនទែន ដោយបានជួយឱ្យក្រុម Win Streak ឈ្នះពានលីគតៃវ៉ាន់​ ២ រដូវកាលជាប់គ្នា។ មិនត្រឹមតែប៉ុណ្ណោះ កីឡាករមានដើមកំណើតមកពីខេត្តបាត់ដំបង វ័យ ២៤ ឆ្នាំបានឈ្នះពានឯត្តជន ៣ ម្នាក់ឯង ដូចពាន​កីឡាករ​ល្អ​បំផុត​ប្រចាំ​ព្រឹត្តិការណ៍, ពាន​រង្វាន់​កីឡាករ​រក​បាន​ពិន្ទុ​ច្រើន​ជាង​គេ និង ពាន​រង្វាន់កីឡាករ​វាយ​ផ្តាច់​ល្អ​​បំផុត។

អត្ថបទ៖ សេម កុសល