អាជីវកម្ម​ថៃជំរុញឱ្យ អានុទីន ពិនិត្យច្បាប់​ហាមឃាត់ការផឹកស្រាថ្មី ដោយ​ព្រមានពីផលប៉ះពាល់​ទេសចរណ៍

តំណាងអាជីវកម្មថៃ​មកពីវិស័យទេសចរណ៍ និងសេវាកម្ម បានជួបប្រជុំគ្នានៅវិមានរដ្ឋាភិបាល​កាលពីថ្ងៃពុធ (១២ វិច្ឆិកា) ដើម្បីដាក់ញត្តិទៅលោក​នាយករដ្ឋមន្ត្រី អានុទីន ឆាន់វីរៈគុន ឱ្យពិនិត្យឡើងវិញលើច្បាប់ស្ដីពីការគ្រប់គ្រងគ្រឿងស្រវឹងថ្មី ​ដោយពួកគេព្រមានថា វាអាចប៉ះពាល់ដល់វិស័យទេសចរណ៍។ នេះបើតាមការចុះផ្សាយរបស់កាសែត The Nation។ ​

ច្បាប់ថ្មី បានចូលជាធ​រមានកាលពីថ្ងៃសោរ៍ (៨ វិច្ឆិកា) ដោយហាមឃាត់ការផឹកស្រាចចន្លោះពីពាក់កណ្ដាលយប់ ដល់ម៉ោង ១១ ព្រឹក និងចន្លោះពីម៉ោង ២ រសៀល​ ដល់ ៥ ល្ងាច។ អ្នកល្មើសច្បាប់ នឹង​រងការផាកពិន័យជាប្រាក់ ១០​ ០០០ បាត (៣០៨ ដុល្លារអាមេរិក)។

ក្រុមអ្នកតំណាង​អាជីវកម្មថៃ ដឹកនាំដោយ​លោក Sanga Ruangwattanakul ​ប្រធានសមាគមអាជីវកម្មផ្លូវ Khaosan រួមមានសមាជិកមកពីក្លឹបអាជីវកម្មភោជនីយដ្ឋាន សមាគមអាជីវកម្មសិប្បកម្មស្រាបៀរ សមាគមអ្នកលក់រាយថៃ និងក្រុមទេសចរណ៍មកពីប៉ាតាយ៉ា និងខាវយ៉ៃ។

ពួកគេបានអំពាវនាវឱ្យរដ្ឋាភិបាលលុបចោល​ត្រង់ចំណុច ដែលហាមឃាត់មនុស្ស មិនឱ្យផឹកស្រានៅខាងក្រៅម៉ោងដែលត្រូវបានអនុញ្ញាត ទោះបីជាគេទិញស្រាមុនម៉ោងហាមឃាត់ផឹកក៏ដោយ។ ម្ចាស់អាជីវកម្មបាននិយាយថា ច្បាប់មិនច្បាស់លាស់នេះធ្វើឱ្យមានការភ័ន្តច្រឡំសម្រាប់ទាំងអតិថិជន និងប្រតិបត្តិករ ជាពិសេសនៅពេលដែលមនុស្សបន្តផឹកស្រាបន្ទាប់ពីម៉ោងលក់។

លោក Sanga បានស្នើឱ្យ​រដ្ឋាភិបាល​លុបការហាមឃាត់​ម៉ោង ២ រសៀល ដល់ ៥ល្ងាច និង​បន្ថែមម៉ោងដែលអាចផឹកបានដល់ម៉ោង ១ ព្រឹក។ ​បែបនេះ នឹងគាំទ្រដល់ការកម្សាន្តពេលយប់ និងវិស័យ​ទេសចរណ៍ថៃ ក្នុងរដូវទេសចរណ៍នាពេលខាងមុខ ឱ្យ​កាន់តែប្រសើរឡើង​។ ​

ចំណែកឯ លោក Sorathep Rojpotjanaruch ប្រធានក្លឹបអាជីវកម្មភោជនីយដ្ឋាន វិញ បានបន្ថែមថា ច្បាប់ថ្មីអាចធ្វើឱ្យខូចរូបភាពរបស់ប្រទេសថៃក្នុងចំណោមភ្ញៀវទេសចរបរទេស ជាពិសេសជនជាតិអឺរ៉ុបដែលចូលចិត្តផឹកគ្រឿងស្រវឹងនាពេលរសៀល និងពេលល្ងាច។ លោកបានកត់សម្គាល់ថា ប្រព័ន្ធផ្សព្វផ្សាយបរទេសមួយចំនួនបានរាយការណ៍រួចហើយអំពីការហាមឃាត់នេះ ដែលអាចធ្វើឱ្យភ្ញៀវទេសចរមិនហ៊ានមកដើរលេងនៅថៃ។

ស្រដៀងគ្នាដែរ លោក Nattachai Ungsriwong ប្រធានសមាគមអាជីវកម្មសិប្បកម្មស្រាបៀរ បានជំរុញឱ្យរដ្ឋាភិបាលស្វែងរកដំណោះស្រាយ​មុនថ្ងៃឈប់សម្រាកឆ្នាំថ្មី ដោយណែនាំថា គោលនយោបាយគ្រឿងស្រវឹងគួរតែលើកកម្ពស់សេដ្ឋកិច្ច ខណៈ​រក្សាការទទួលខុសត្រូវសង្គម។

ជុំវិញបញ្ហានេះ អ្នកនាំពាក្យរដ្ឋាភិបាលថៃ បាននិយាយថា ​លោក អានុទីន បានបញ្ជាឱ្យគណៈកម្មាធិការត្រួតពិនិត្យគ្រឿងស្រវឹងស្នើដំណោះស្រាយបន្ទាន់។ ជម្រើសដែលកំពុងពិចារណារួមមាន ការដកចេញនូវការហាមឃាត់ការលក់ស្រា​នៅពេលថ្ងៃ និងអនុញ្ញាតឱ្យផឹកស្រា​ក្រោយពាក់កណ្ដាលយប់ នៅតាមតំបន់មួយចំនួន៕