អ៊ុយក្រែន ស្នើសុំកែប្រែផែនការសន្តិភាព ដែលគាំទ្រដោយ អាមេរិក

សហរដ្ឋអាមេរិក និងអ៊ុយក្រែនបានធ្វើកិច្ចចរចាលើផែនការសន្តិភាព ដែលផ្តល់សម្បទានទឹកដីសំខាន់ៗដល់រុស្ស៊ី ដើម្បីបញ្ចប់ការប្រយុទ្ធគ្នា។ ប៉ុន្តែគេជឿថា ទីក្រុងកៀវបានស្នើសុំឲ្យមានការកែប្រែផែនការនេះភ្លាមៗ ដោយសម្របសម្រួលជាមួយបណ្តាប្រទេសនៅអឺរ៉ុប។ នេះបើតាមការចុះផ្សាយពីសារព័ត៌មាន NHK នាថ្ងៃទី២៤ ខែ​វិច្ឆិកា ​ឆ្នាំ​២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចប្រជុំទ្វេភាគីនេះដែរបានធ្វើឡើងនៅឯនៅឯប្រទេសស្វីស ក្នុងទីក្រុងហ្សឺណែវ កាលពីថ្ងៃអាទិត្យ ដោយមានរដ្ឋមន្ត្រីការបរទេស Marco Rubio និងបេសកជនពិសេស Steve Witkoff ស្ថិតក្នុងចំណោមប្រតិភូអាមេរិក។ ចំណែក អ៊ុយក្រែនត្រូវបានតំណាងដោយប្រធានការិយាល័យប្រធានាធិបតីលោក Andriy Yermak និងអ្នកផ្សេងទៀត។

លោក Rubio បានប្រាប់អ្នកយកព័ត៌មានថា ភាគីទាំងពីរទំនងជាមានកិច្ចប្រជុំដែលមានផលិតភាពបំផុត នៅក្នុងដំណើរការទាំងមូលនេះ។ ជាពិសេស ពួកគេកំពុងធ្វើការផ្លាស់ប្តូរ និងការកែតម្រូវមួយចំនួនចំពោះសេចក្តីព្រាងផែនការ ដោយសង្ឃឹមថានឹងបង្រួមភាពខុសគ្នា។ តែយ៉ាងណា លោកបាននិយាយដោយសង្កត់ធ្ងន់ថា ពួកគេនឹងបន្តធ្វើការលើផែនការនេះដដែរទេ។

ទោះជាយ៉ាងណាក៏ដោយ យោងតាមប្រភពមួយផ្សេងទៀត មុនពេលកិច្ចចរចាចាប់ផ្ដើម អ៊ុយក្រែនបានពិភាក្សាអំពីការកែប្រែ នៃផែនការជាមួយមហាអំណាច E3 របស់អឺរ៉ុប រួមមាន ចក្រភពអង់គ្លេស, បារាំង និងអាល្លឺម៉ង់ ដែលគ្រោងរៀបចំដាក់សំណើប្រឆាំងឡើងមក។

ដោយឡែក ទីភ្នាក់ងារសារព័ត៌មានរ៉យទ័រក៏បានរាយការណ៍ដែរថា សំណើនេះរួមមានការបង្កើនទំហំកងទ័ពរបស់យោធាអ៊ុយក្រែនដល់ ៨០០.០០០ នាក់ ក្នុងពេលសន្តិភាពជំនួសឲ្យ ៦០០.០០០ នាក់ ដែលស្នើឡើងដោយសហរដ្ឋអាមេរិក។ វាក៏ត្រូវបានគេរាយការណ៍ផងដែរថា ការចរចាលើការផ្លាស់ប្តូរទឹកដី នឹងចាប់ផ្តើមពីខ្សែទំនាក់ទំនង ជាងការកំណត់ជាមុនថា តំបន់មួយចំនួនគួរតែត្រូវបានទទួលស្គាល់ថាជារបស់រុស្ស៊ី ដូចដែលផែនការរបស់សហរដ្ឋអាមេរិកបានបង្ហាញកន្លងមក៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

កិច្ចប្រជុំ G20 នឹងចេញសេចក្តីថ្លែងការណ៍រួម ទោះមានការជំទាស់ពី អាមេរិក