ព័ត៌មានជាតិ

អាជ្ញាធរសង្កាត់គីឡូម៉ែត្រលេខ ៦ បន្តណែនាំពលរដ្ឋរស់នៅបណ្ដោយផ្លូវ 200R ដែលរំលោភចិញ្ចើមផ្លូវ ឲ្យរុះរើចេញ

បានផុស

៨ ខែ មុន

នៅ

ថ្ងៃសុក្រ ២៨ វិច្ឆិកា ២០២៥

ដោយ

កាលពីល្ងាចថ្ងៃទី ២៧ ខែវិច្ឆិកា ឆ្នាំ ២០២៥ រដ្ឋបាលខណ្ឌឫស្សីកែវ បានចុះអនុវត្តតាមការណែនាំរបស់លោក ជិន ប៊ុនធឿន អភិបាលខណ្ឌឫស្សីកែវ ក្នុងការរៀបចំឲ្យមានរបៀបរៀបរយ ដែលមានការលក់ដូរគ្មានសណ្ដាប់ធ្នាប់ ត្រូវរុះរើកាត់សំយាបដំបូលរំលោភលើចិញ្ចើមផ្លូវចេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សកម្មភាពនេះដឹកនាំដោយលោក ឌន ដាវុឌ នាយករងរដ្ឋបាលខណ្ឌឫស្សីកែវ រួមជាមួយលោកចៅសង្កាត់រងគីឡូម៉ែត្រលេខ ៦ និងមេភូមិ បានចុះពិនិត្យណែនាំអាជីវករនានាតាមបណ្ដោយផ្លូវលេខ 200R ភូមិក្រោលគោ សង្កាត់គីឡូម៉ែត្រលេខ ៦ ខណ្ឌឫស្សីកែវ រាជធានីភ្នំពេញ។

រដ្ឋបាលខណ្ឌឫស្សីកែវ បានណែនាំដល់អាជីវករ ត្រូវបញ្ឈប់ការលក់ដូរ ឬប្រកបអាជីវកម្មលើចិញ្ចើមផ្លូវ និងធ្វើការកាត់សំយាបដំបូល ឬរចនាសម្ព័ន្ធផ្សេងៗ ដែលរំលោភលើដែនផ្លូវសាធារណៈ។ ក្នុងនោះ រដ្ឋបាលខណ្ឌ បានកំណត់រយៈពេលអនុវត្តដល់ថ្ងៃទី ៥ ខែធ្នូ ឆ្នាំ ២០២៥។

រដ្ឋបាលខណ្ឌឫស្សីកែវ បានបញ្ជាក់ថា អាជីវករមួយចំនួនត្រូវបានជម្រាបជូនជាបន្តបន្ទាប់ ទាំងផ្ទាល់មាត់ និងជាលាយលក្ខណ៍អក្សរមកពីមុនជាច្រើនដងហើយ តែលើកនេះ ករណីមិនអនុវត្តតាមការណែនាំ រដ្ឋបាលខណ្ឌ នឹងអនុវត្តវិធានការរដ្ឋបាលតាមច្បាប់ ដោយមិនទទួលខុសត្រូវលើការបាត់បង់ផលប្រយោជន៍របស់អាជីវករឡើយ។

រដ្ឋបាលខណ្ឌឫស្សីកែវ មានទំនុកចិត្តថា ប្រជាពលរដ្ឋ និងអាជីវករ តាមបណ្ដោយផ្លូវចូល ២០០R នឹងសហការយ៉ាងសកម្ម ដើម្បីរក្សាសណ្ដាប់ធ្នាប់ សោភ័ណភាព និងបរិស្ថានស្អាតល្អ៕

អត្ថបទ ៖ សំណាង