ថៃ ថា ក្រុមបំផ្ទុះគ្រាប់បែកស្ថានីយប្រេងឥន្ធនៈ គឺជាបណ្តាញតែមួយជាមួយចោរប្លន់មាស កាលពីខែតុលា

ជាមួយនឹងការប្រកាសតាមចាប់ខ្លួន ជនល្មើសនៅពីក្រោយការបំផ្ទុះគ្រាប់បែកកម្ទេចស្ថានីយប្រេងឥន្ធនៈ១១កន្លែងនៅភាគខាងត្បូងកាលពីថ្ងៃទី១១ខែមករាឆ្នាំ២០២៦ អាជ្ញាធរថៃក៏អះអាងដែរថា ពួកគេគឺជាបណ្តាញតែមួយជាមួយក្រុមចោរប្លន់មាសនៅខេត្ត Narathiwat កាលពីខែតុលាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន The Star បានដកស្រង់សម្តីមេយុទ្ធភូមិភាគ៤ថៃ Norathip Poinok ដែលនិយាយថា៖ «ក្រោយការពិនិត្យព័ស្តុតាង យើងអាចសន្និដ្ឋានបានថា ក្រុមដែលវាយប្រហារស្ថានីយប្រេងឥន្ធនៈ១១កន្លែងនៅខេត្តចំនួន៣នាភាគខាងត្បូង គឺជាបណ្តាញតែមួយជាមួយក្រុមចោរប្លន់នៅហាងមាស Yaowarat»។

លោកបន្តថា អាជ្ញាធរមិនទាន់ទាត់ចោលនូវមូលហេតុណាមួយឡើយ រួមទាំងកត្តាពាក់ព័ន្ធនឹងសន្តិសុខ និងសក្ដានុពលនយោបាយក្នុងតំបន់ ព្រោះហេតុការណ៍ទាំងនេះ កើតឡើងក្នុងអំឡុងពេលនៃដំណើរការបោះឆ្នោតជ្រើសរើសក្រុមប្រឹក្សាឃុំ-សង្កាត់។

ជុំវិញហេតុការណ៍នេះដែរ មេបញ្ជាការកងទ័ពជើងគោកថៃ Phana Klaewplodthuk បានចេញបញ្ជារួចហើយ ឲ្យតាមប្រមាញ់ក្រុមជនដៃដល់ និងនាំខ្លួនមកផ្ដន្ទាទោសតាមផ្លូវច្បាប់ឲ្យបានឆាប់បំផុត។

ទន្ទឹមនោះ កងទ័ពថៃកំពុងធ្វើការត្រួតពិនិត្យយ៉ាងដិតដល់នូវរាល់ផែខុសច្បាប់ទាំងអស់នៅតាមដងទន្លេ Golok ក្នុងខេត្ត Narathiwat ជាមួយផែនការគ្រប់គ្រងលើប្រតិបត្តិការរបស់ពួកគេ ដោយជឿជាក់ថាទីតាំងទាំងនោះត្រូវបានក្រុមឧទ្ទាមប្រើប្រាស់សម្រាប់ធ្វើដំណើរចូលមកនិងរត់គេចចេញពីប្រទេសថៃ។

អាជ្ញាធរថៃបានរកឃើញ ផែខុសច្បាប់ប្រហែល២០០កន្លែង និងទូកគ្មានការចុះបញ្ជីចំនួន៩០០គ្រឿង ដែលកំពុងធ្វើប្រតិបត្តិការលើទន្លេ Golok។ ចំណែកខាងអាជ្ញាធរម៉ាឡេស៊ី ក៏រកឃើញផែខុសច្បាប់ប្រហាក់ប្រហែលគ្នានេះដែរ នៅត្រើយម្ខាង។

កងទ័ពក៏នឹងបង្កើនចំនួនកម្លាំងទាហានល្បាតតាមព្រំដែនម៉ាឡេស៊ីក្នុងខេត្ត Narathiwat ដល់ទ្វេដងផងដែរ ពោលគឺបង្កើនពី ៣ កងអនុសេនាធំ ទៅ ៦ កងអនុសេនាធំ៕

អត្ថបទ៖ សុខ សុវណ្ណ