ព័ត៌មានអន្ដរជាតិ

អតីតនាយករដ្ឋមន្រីកូរ៉េខាងត្បូងបានស្លាប់ បន្ទាប់ពីព្យាបាលនៅវៀតណាម

បានផុស

៣ ខែ មុន

នៅ

ថ្ងៃចន្ទ ២៦ មករា ២០២៦

ដោយ

អតីតនាយករដ្ឋមន្រីកូរ៉េខាងត្បូង លោក Lee Hae-chan ស្លាប់នៅវៀតណាម ដោយសារជំងឺ បន្ទាប់ពីលោកសម្រាកព្យាបាលនៅទីក្រុងហូជីមិញ។ នេះបើតាមក្រសួងការបរទេសវៀតណាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៌មាន VN Express, អ្នកនាំពាក្យក្រសួងការបរទេសវៀតណាម លោកស្រី Pham Thu Hang បាននិយាយថា អាជ្ញាធរវៀតណាម បានធ្វើការយ៉ាងជិតស្និទ្ធក្នុងរយៈពេលប៉ុន្មានថ្ងៃថ្មីៗនេះ ដើម្បីធានាថា លោក Lee ទទួលបានការថែទាំសុខភាពយ៉ាងដិតដល់និងប្រកបដោយប្រសិទ្ធភាព ប៉ុន្តែនៅទីបំផុត លោកបានស្លាប់ដោយសារជំងឺផ្ទាល់ខ្លួន។

លោកស្រី បានបន្ថែមថា នាយករដ្ឋមន្ត្រីវៀតណាម លោក ផាម មិញជិញ (Pham Minh Chinh) និងថ្នាក់ដឹកនាំវៀតណាមផ្សេងទៀត បានផ្ញើសាររំលែកទុក្ខដល់រដ្ឋាភិបាលកូរ៉េខាងត្បូង និងក្រុមគ្រួសាររបស់លោក Lee ផងដែរ។

ចំណែក ទីភ្នាក់ងារសារព័ត៌មាន Yonhap News Agency របស់កូរ៉េខាងត្បូង បានដកស្រង់សម្តីមន្ត្រីម្នាក់ដូចនិយាយថា៖«លោក Lee មានអាយុ ៧៣ឆ្នាំ លោកមានរោគសញ្ញាដូចជំងឺផ្តាសាយ មុនពេលចាកចេញទៅប្រទេសវៀតណាមនៅថ្ងៃទី ២២ខែមករា។ ស្ថានភាពជំងឺរបស់លោកកាន់តែអាក្រក់ឡើង ខណៈលោកត្រៀមត្រឡប់ទៅកូរ៉េខាងត្បូងវិញនៅថ្ងៃបន្ទាប់»។

បើត្រឡប់ទៅក្រោយបន្តិច លោក Lee ជាអ្នកនយោបាយជើងចាស់ម្នាក់ កើតចេញពីចលនាគាំទ្រលទ្ធិប្រជាធិបតេយ្យរបស់កូរ៉េខាងត្បូង អំឡុងពេលនៃការគ្រប់គ្រងដោយយោធា និងបានប្រឡូកក្នុងនយោបាយតាមរយៈសកម្មភាពនិស្សិត និងសកម្មភាពប្រឆាំងនានា។

លោកបានជាប់ឆ្នោតជាសមាជិកសភាជាតិលើកដំបូងក្នុងឆ្នាំ ១៩៨៨ ហើយបានបន្តកាន់តំណែងជាសមាជិកសភាចំនួន ៧អាណត្តិ។

មិនតែប៉ុណ្ណោះ លោក Lee ក៏បានបម្រើការជារដ្ឋមន្ត្រីក្រសួងអប់រំផងដែរ ដែលលោកបានដឹកនាំកំណែទម្រង់ដ៏ធំទូលាយ ត្រូវបានគេស្គាល់ថាជា «ជំនាន់ Lee Hae-chan»។ ក្រោយមកលោកបានបម្រើការងារជានាយករដ្ឋមន្ត្រីកូរ៉េខាងត្បូងពីឆ្នាំ២០០៤ ដល់ឆ្នាំ ២០០៦ ក្រោមការដឹកនាំរបស់អតីតប្រធានាធិបតី លោក Roh Moo-hyun ។

គួរឱ្យដឹងផងដែរថា លោក Lee Hae-chan ជាអតីតនាយករដ្ឋមន្ត្រីទី៣៦ នៃប្រទេសកូរ៉េខាងត្បូង និងជាអនុប្រធានជាន់ខ្ពស់នៃក្រុមប្រឹក្សាបង្រួបបង្រួមសន្តិភាព (PUAC) ផងដែរ៕

ប្រែសម្រួល៖ ណឺ មិនា