ម៉ាឡេស៊ីឃាត់ទុកនាវាដឹកប្រេង២គ្រឿង លួចផ្ទេរប្រេងខុសច្បាប់ តម្លៃ​ជាង​១២០លាន​ដុល្លារ

កាល​ពី​ថ្ងៃ​ទី​៣១​ខែ​មករា​ឆ្នាំ​២០២៦ អាជ្ញាធរម៉ាឡេស៊ី ​បាន​ប្រកាស​អំពី​ការ​​ឃាត់ទុកនាវាដឹកប្រេងចំនួនពីរគ្រឿង ពីបទសង្ស័យថាបានធ្វើការផ្ទេរប្រេងឆៅពីនាវាមួយទៅនាវាមួយទៀតដោយគ្មានការអនុញ្ញាត ដែលមានតម្លៃប្រហែល ១២៩លានដុល្លារ។ នេះ​បើ​យោង​តាម​ការ​ចុះ​ផ្សាយ​របស់ AFP។

ទីភ្នាក់ងារអនុវត្តច្បាប់ដែនសមុទ្រម៉ាឡេស៊ី (MMEA) បានស្ទាក់ចាប់នាវាទាំងនោះកាលពីថ្ងៃទី​២៩មករា បន្ទាប់ពីទទួលបានសេចក្តីរាយការណ៍អំពីទីតាំងរបស់ពួក​វា​ ដែលស្ថិតនៅចម្ងាយប្រហែល ២៤ម៉ាយសមុទ្រ ខាងលិចតំបន់ Muka Head នៃកោះ Penang។ ក្រោយការត្រួតពិនិត្យ មន្ត្រីបានរកឃើញនាវាទាំងពីរអែបជាប់គ្នា ដែលជាសញ្ញាបង្ហាញពីការផ្ទេរទំនិញនៅសមុទ្រដោយគ្មានការត្រួតពិនិត្យ ឬច្បាប់អនុញ្ញាតពីរដ្ឋាភិបាល។

លោក Muhammad Suffi Mohd Ramli នាយកដែនសមុទ្រប្រចាំកោះ Penang បានបញ្ជាក់ថា តម្លៃសរុបនៃប្រេងឆៅដែលរឹបអូសបាន រួមទាំងតម្លៃនាវាទាំងពីរគ្រឿង មានចំនួនប្រហែល ១,២៣ប៊ីលានរីងហ្គីត។ សមាជិកនាវិកសរុបចំនួន ៥៣នាក់ ដែលមានសញ្ជាតិ​អ៊ីរ៉ង់ ចិន មីយ៉ាន់ម៉ា ប៉ាគីស្ថាន និងឥណ្ឌា ត្រូវបានរកឃើញនៅលើនាវាទាំងនោះ។ កងនាវាត្រូវបានឃាត់ខ្លួន ខណៈដែលក្រុមអ្នកស៊ើបអង្កេតកំពុងស្រាវជ្រាវរកប្រភពដើមនៃប្រេង និងគោលដៅដែលត្រូវដឹកជញ្ជូនទៅ។ បច្ចុប្បន្ន សំណុំរឿងនេះកំពុងត្រូវបានស៊ើបអង្កេតក្រោមច្បាប់ការដឹកជញ្ជូនតាមសមុទ្រឆ្នាំ ១៩៥២ ពីបទបោះយុថ្កា និងប្រតិបត្តិការដោយគ្មានការអនុញ្ញាតជាមុន។

ការរឹបអូសនេះបានបង្ហាញពីការប្តេជ្ញាចិត្តជាថ្មីរបស់ប្រទេសម៉ាឡេស៊ី ក្នុងការត្រួតពិនិត្យតំបន់ដែនសមុទ្ររបស់ខ្លួន បន្ទាប់ពីមានការតាមដានយ៉ាងដិតដល់ពីអន្តរជាតិពាក់ព័ន្ធនឹងការគេចវេសពីទណ្ឌកម្មនៅក្នុងដែនទឹកអាស៊ីអាគ្នេយ៍។ កាលពីឆ្នាំ២០២៥ រដ្ឋាភិបាលបានសន្យាថានឹងបង្ក្រាបយ៉ាងខ្លាំងក្លាលើប្រតិបត្តិការ «កងនាវាសម្ងាត់» និងសកម្មភាពខុសច្បាប់តាមសមុទ្រនានា។ សកម្មភាពអនុវត្តច្បាប់ចុងក្រោយនេះ បានគូសបញ្ជាក់ពីបញ្ហាប្រឈមដែលកំពុងបន្តក្នុងការគ្រប់គ្រងផ្លូវនាវាចរដ៏មមាញឹកនៃច្រកសមុទ្រម៉ាឡាកា ដែលជារឿយៗត្រូវបានគេប្រើប្រាស់សម្រាប់ការជួញដូរប្រេងខុសច្បាប់ដែលជាប់ទណ្ឌកម្ម៕

ប្រែសម្រួល៖ ឈាង