ឃាត់ខ្លួនជនដៃដល់ដែលបាញ់ប្រហារស្រ្តីម្នាក់នៅខេត្តសៀម​រាប

ខ្មាន់កាំភ្លើងជាជនដៃដល់ម្នាក់ ត្រូវបានសមត្ថកិច្ចឃាត់ខ្លួន នៅខេត្តបាត់ដំបង បន្ទាប់ពីបានធ្វើសកម្មភាពបាញ់ប្រហារ​លើ​ស្រ្តីម្នាក់ បណ្ដាលឲ្យរងរបួសធ្ងន់ កាលពីវេលាម៉ោង ២.៥០នាទី ថ្ងៃទី២២ ខែតុលា ឆ្នាំ២០២០ នៅចំណុចមុខសាលា​បឋមសិក្សាសាមគ្គី(ផ្លូវជាតិលេខ៦)ឃុំស្រណាល ស្រុកក្រឡាញ់ ខេត្តសៀមរាប។

យោងតាមសមត្ថកិច្ច បានឲ្យដឹងថា ខ្មាន់កាំភ្លើង ត្រូវបានសមត្ថកិច្ចឃាត់ខ្លួន នៅខេត្តបាត់ដំបង និងកំពុងនាំខ្លួនឆ្ពោះទៅកាន់ខេត្តសៀមរាប ដើម្បីបន្តនីតិវិធី។

សូមបញ្ជាក់ថា ជនបង្កមានឈ្មោះ ចាន់ ផល ហៅពៅ អាយុប្រហែល៥០ឆ្នាំ ទីលំនៅភូមិស្វាយធំ ខេត្តសៀមរាប បានប្រើប្រាស់អាវុធម៉ាក K៥៤ លេខ៣៧៦៣ បាញ់ប្រហារលើស្រ្តីម្នាក់ ឈ្មោះ សំអុល សុខដានី អាយុ២៧ឆ្នាំ ទីលំនៅភូមិសាមគ្គី សង្កាត់ឫស្សីកែវ ភ្នំពេញ រងរបួសធ្ងន់ចំដើមទ្រូងខាងឆ្វេង១គ្រាប់(បៀមគ្រាប់) និងកំពុងសង្គ្រោះនៅមន្ទីរពេទ្យបង្អែកខេត្តសៀមរាប។
ការបាញ់ប្រហារនេះ ត្រូវបានគេសង្ស័យថា អាចដោយសារទំនាស់ពាក្យសម្តី (ប្រច័ណ្ឌ)៕