ព័ត៌មានអន្ដរជាតិ

លោក Ghalibaf៖ ទីក្រុងតេហេរ៉ង់មិនខ្លាចការគំរាមកំហែងណាមួយរបស់អាមេរិកទេ

បានផុស

៣ ខែ មុន

នៅ

ថ្ងៃចន្ទ ១៣ មេសា ២០២៦

ដោយ

ប្រធានសភាអ៊ីរ៉ង់ លោក Mohammad Bagher Ghalibaf បានដឹកនាំការចរចាសន្តិភាពជាមួយសហរដ្ឋអាមេរិកក្នុងប្រទេសប៉ាគីស្ថាន លើកឡើងកាលពីថ្ងៃអាទិត្យថា ប្រទេសអ៊ីរ៉ង់មិនចុះញ៉មនឹងការគំរាមកំហែងណាមួយនោះទេ បន្ទាប់ពីប្រធានាធិបតីអាមេរិក លោក ដូណាល់ ត្រាំ បញ្ជាឱ្យបិទច្រកសមុទ្រ Hormuz ។ នេះបើយោងតាមសារព័ត៌មាន TRT World ផ្សាយថ្ងៃទី១២ ខែមេសា ឆ្នាំ២០២៦ ។

ប្រធានសភាអ៊ីរ៉ង់ លោក Mohammad Bagher Ghalibaf ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Ghalibaf ប្រាប់អ្នកយកព័ត៌មាន បន្ទាប់ពីត្រឡប់មកពីទីក្រុងអ៊ីស្លាម៉ាបាដវិញថា៖ « ប្រសិនបើពួកគេ[អាមេរិក] ប្រយុទ្ធ យើងនឹងប្រយុទ្ធ ហើយប្រសិនបើពួកគេចេញមកបែបភាសាចំណេះដឹង យើងនឹងដោះស្រាយគ្នាបែបចំណេះដឹង។ យើងនឹងមិនចុះចាញ់នឹងការគំរាមកំហែងណាមួយឡើយ។ ឱ្យពួកគេសាកល្បងឆន្ទៈរបស់យើងម្តងទៀតចុះ ដើម្បីឱ្យយើងអាចបង្រៀនពួកគេនូវមេរៀនដ៏ធំមួយ»។

លោក Ghalibaf បន្តថា៖ «គំនិតផ្តួចផ្តើមដ៏ល្អរបស់ទីក្រុងតេហេរ៉ង់ គឺបង្ហាញពីសុច្ឆន្ទៈនាំឱ្យមានវឌ្ឍនភាពក្នុងការចរចាជាមួយសហរដ្ឋអាមេរិក។ អ៊ីរ៉ង់ក៏បានបង្ហាញសំណើស្ថាបនានៅក្នុងកិច្ចពិភាក្សានៅទីក្រុងអ៊ីស្លាម៉ាបាដ ដែលជួយជំរុញការពិភាក្សាទៅមុខ ទោះបីជាមានការមិនទុកចិត្តគ្នារវាងភាគីទាំងពីរក៏ដោយ»។

ឆ្លើយតបទៅនឹងការព្រមានចុងក្រោយរបស់ លោក ត្រាំ ប្រធានសភាអ៊ីរ៉ង់ លោក Ghalibaf និយាយថា៖ « ការគំរាមកំហែងបែបនេះ មិនមានឥទ្ធិពលលើប្រជាជាតិអ៊ីរ៉ង់ទេ»។

នៅមុននេះបន្តិចកាលពីម្សិលមិញ លោក ត្រាំ បញ្ជាឱ្យបិទច្រកសមុទ្រ Hormuz ដោយកងទ័ពជើងទឹកអាមេរិក ដើម្បីឆ្លើយតបទៅនឹងការបដិសេធ «មិនចុះញ៉ម» របស់អ៊ីរ៉ង់ ដែលមិនបោះបង់ចោលមហិច្ឆតានុយក្លេអ៊ែររបស់ខ្លួន អំឡុងពេលចរចាសន្តិភាពនៅទីក្រុងអ៊ីស្លាម៉ាបាដ៕

ប្រែសម្រួល៖ ណឺ មិនា