បារាំង ត្រៀមបញ្ជូន “រូបសំណាកសេរីភាព” ទី ២ ទៅ អាមេរិក ក្នុងរយៈពេល ១៣៥ ឆ្នាំ

យោងតាមកាសែតបារាំង Journal Du Dimanche បានឲ្យដឹងថា ប្រទេសបារាំងនឹងបញ្ជូនរូបសំណាកនៃសេរីភាព ទី ២ ទៅកាន់សហរដ្ឋអាមេរិក ពោលរយៈពេល ១៣៥ ឆ្នាំ បន្ទាប់ពីរូបទីមួយ ហើយវាក៏ជាសញ្ញានៃការប្តេជ្ញាចិត្ត ពង្រឹងទំនាក់ទំនងបារាំង-អាមេរិក ។

ឯកអគ្គរដ្ឋទូតបារាំង ប្រចាំនៅសហរដ្ឋអាមេរិក លោក Philippe Etienne បានប្រាប់ថា “រូបសំណាកនេះ គឺជានិមិត្តរូបនៃសេរីភាពទ្វេរដង ប៉ុន្តែក៏ជាបដិសណ្ឋារកិច្ចផងដែរ” ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមកាសែតបារាំង បានឲ្យដឹងថា រូបសំណាកនេះនឹងត្រូវបញ្ជូនទៅសហរដ្ឋអាមេរិក នៅថ្ងៃទី ៧ ខែមិថុនា ហើយនឹងមកដល់ទាន់ពេលវេលា សម្រាប់ថ្ងៃបុណ្យឯករាជ្យរបស់សហរដ្ឋអាមេរិក ៤ កក្កដា ខណៈរូបសំណាកមួយនេះ នឹងនៅសហរដ្ឋអាមេរិក រយៈពេល ១០ ឆ្នាំ ។

រូបសំណាកថ្មីនេះ មានទំហំតូចជាងរូបសំណាកដើម មានកម្ពស់ត្រឹមតែ ២.៨៣ ម៉ែត្រប៉ុណ្ណោះ ហើយនឹងត្រូវធ្វើដំណើរទៅសហរដ្ឋអាមេរិក តាមនាវាដែលមានទង់ជាតិបារាំង នៅក្នុងកុងតឺន័រដែលបំពាក់ដោយឧបករណ៍ ចាប់សញ្ញាពិសេស ។ វានឹងទៅដល់ទីក្រុងញូវយ៉ក ហើយនឹងត្រូវបានតំឡើងនៅលើកោះ Ellis Island ហើយវាក៏បានមើលឃើញដល់ រូបសំណាកដំបូងបង្អស់ ដែលឈរនៅលើកោះ Liberty Island ផងដែរ ។ បន្ទាប់មកវានឹងត្រូវដឹកទៅកាន់គេហដ្ឋាន របស់ឯកអគ្គរដ្ឋទូតបារាំងប្រចាំនៅទីក្រុងវ៉ាស៊ីនតោន ។

លោកបានបន្ថែមទៀតថា “រូបសំណាកទី ២ នេះ គឺជាការឧទ្ទិសដល់អ្នក ដែលនៅសងខាងសមុទ្រអាត្លង់ទិច ដែលបានអនុញ្ញាតឲ្យសាងសង់រូបសំណាកសេរីភាព និងអ្នកដែលបានប្រយុទ្ធ ដើម្បីអ្វីដែលជានិមិត្តរូបនៅជុំវិញពិភពលោក” ។

គួររំឭកថា រូបសំណាកដើមមានប្រវែង ៩៣ ម៉ែត្រ ត្រូវបានបរិច្ចាគទៅឲ្យសហរដ្ឋអាមេរិក ដោយប្រទេសបារាំងនៅឆ្នាំ ១៨៨៦ ។ កាលបរិច្ឆេទនៃការអនុម័តសេចក្តីប្រកាសឯករាជ្យ របស់សហរដ្ឋអាមេរិក ៤ កក្កដា ១៧៧៦ ត្រូវបានឆ្លាក់នៅខាងមុខរូបសំណាក ខណៈនៅឆ្នាំ ១៩៨៤ បូជនីយដ្ឋាននេះ ត្រូវបានដាក់បញ្ចូលក្នុងបញ្ជីបេតិកភណ្ឌពិភពលោក របស់អង្គការយូណេស្កូ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ប្រវត្តិអនុរដ្ឋមន្ត្រីការបរទេសអាមេរិក លោកស្រី Wendy R. Sherman ដែលធ្វើទស្សនកិច្ចនៅ កម្ពុជា

ចុចអាន ៖ លោក បៃដិន នឹងសង្កត់ធ្ងន់លើបញ្ហានេះដាក់ ពូទីន នៅឯកិច្ចប្រជុំកំពូលទល់មុខគ្នាខែក្រោយ