ព័ត៌មានជាតិ

ខេត្តកំពង់ចាម រៀបចំមណ្ឌលព្យាបាលអ្នកជំងឺកូវីដកម្រិតស្រាលមួយកន្លែងទៀតនៅស្រុកកំពង់សៀម

បានផុស

៥ years មុន

នៅ

ថ្ងៃពុធ ១៥ កញ្ញា ២០២១

ដោយ

ខេត្តកំពង់ចាម បានរៀបចំមណ្ឌលពិនិត្យព្យាបាលអ្នកជំងឺកូវីដ-១៩ កម្រិតស្រាលមួយកន្លែងទៀតនៅស្រុកកំពង់សៀម ខណៈយកវិទ្យាល័យព្រះសីហនុ ក្រុងកំពង់ចាម ដាក់ឲ្យដំណើរការសិក្សាឡើងវិញ។

នៅព្រឹកថ្ងៃទី១៥ ខែកញ្ញា ឆ្នាំ២០២១ ឯកឧត្តម អ៊ុន ចាន់ដា អភិបាលខេត្តកំពង់ចាម បានអញ្ជើញចុះពិនិត្យឃ្លាំងពាណិជ្ជកម្មមួយកន្លែងស្ថិតនៅចំណុចភូមិត្រពាំងចា ឃុំក្រឡា ស្រុកកំពង់សៀម ដែលត្រៀមធ្វើមណ្ឌលព្យាបាលអ្នកជំងឺកូវីដ-១៩ ខណៈបច្ចុប្បន្នក្រុមការងារកំពុងធ្វើការសម្រុករៀបចំតបណ្តាញភ្លើង ប្រព័ន្ធទឹក បង្គន់អនាម័យ ប្រព័ន្ធបង្ហូរទឹក បន្ទប់ពេទ្យ និងបន្ទប់ព្យាបាលជាដើម។

ឆ្លៀតឱកាសនោះដែរ ឯកឧត្តម អ៊ុន ចាន់ដា អភិបាលខេត្តកំពង់ចាម បានជំរុញដល់ក្រុមការងារធ្វើយ៉ាងពន្លឿនការងារនេះឲ្យរួចមុនថ្ងៃទី២០ ខែកញ្ញា នេះ ដើម្បីបញ្ជូនអ្នកជំងឺកូវីដ-១៩ កម្រិតស្រាលដែលកំពុងសម្រាកពិនិត្យព្យាបាលនៅវិទ្យាល័យព្រះសីហនុ មកធ្វើការពិនិត្យព្យាបាលនៅទីនេះ ហើយដោយឡែក វិទ្យាល័យព្រះសីហនុ ក្រុងកំពង់ចាម ត្រូវប្រគល់ឲ្យទៅសាលាវិញ ក្នុងបើកដំណើរការសិក្សាឡើងវិញ។

សូមជម្រាបជូនថា ឃ្លាំងពាណិជ្ជកម្មនេះ មានចំនួន០៣អគារ ដោយក្នុងមួយអគារ អាចដាក់អ្នកជំងឺកូវីដ-១៩ បានចំនួន២៥០នាក់ សរុបទាំង០៣អគារ អាចដាក់អ្នកជំងឺកូវីដ-១៩ បានចំនួនសរុប ៧៥០នាក់៕

អត្ថបទ៖ ហុង ម៉េងហៀ