ព័ត៌មានជាតិ

ណាហ្គាវើលដ៍បេះដូងសប្បុរស ទទួលបានកិត្តិយសសម្រាប់កម្មវិធីការងារសង្គម ដែលជួយគាំទ្រដល់ការសិក្សារបស់កុមារ

បានផុស

៤ years មុន

នៅ

ថ្ងៃសុក្រ ១៤ មករា ២០២២

ដោយ

ការអប់រំ មានសារសំខាន់ណាស់សម្រាប់ការអភិវឌ្ឍកុមារ។ ការអប់រំមួយដ៏ល្អ ជួយអប់រំ ផ្តល់ព័ត៌មាន និងធ្វើឲ្យកុមារចេះគិតពិចារណាដោយមានហេតុផល។ ដូចទស្សនវិទូបុរាណម្នាក់ បានពោលថា “ប្រសិនបើផែនការរបស់អ្នក សម្រាប់រយៈពេលមួយឆ្នាំ អ្នកត្រូវស្ទូងស្រូវ។ ប្រសិនបើអ្នកផែនការរបស់អ្នក សម្រាប់ដប់ឆ្នាំ អ្នកត្រូវដាំដើមឈើ។ ប្រសិនបើផែនការរបស់អ្នក សម្រាប់ ១០០ ឆ្នាំ អ្នកត្រូវផ្តល់ការអប់រំដល់កុមារ”។

ណាហ្គាវើលដ៍បេះដូងសប្បុរស បានផ្តល់សម្ភារសិក្សាដល់សិស្សានុសិស្សជាង ២២.០០០ នាក់ទូទាំងប្រទេសកម្ពុជាក្នុងឆ្នាំ២០១៩។

ដោយសារការអប់រំ គឺជាមូលដ្ឋានគ្រឹះដ៏សំខាន់ ណាហ្គាវើលដ៍បេះដូងសប្បុរស ដែលជាផ្នែកការងារសង្គមរបស់ក្រុមហ៊ុនណាហ្គាវើលដ៍ បានបន្តគំនិតផ្តួចផ្តើមរបស់ខ្លួនជាងពីរឆ្នាំកន្លងទៅនេះ ដើម្បីជួ យលើកកម្ពស់ការសិក្សារបស់កុមារដោយផ្តល់សម្ភារសិក្សា និងមេរៀនអប់រំជាច្រើននៅតាមសាលារៀនជាច្រើននៅក្នុងប្រទេសកម្ពុជា។

បន្ទាប់មក ក្រសួងអប់រំ យុវជន និងកីឡា បានទទួលស្គាល់ការឧបត្ថម្ភគាំទ្រ និងឥទ្ធិពលវិជ្ជមានរបស់ណាហ្គាវើលដ៍បេះដូងសប្បុរសមកលើវិស័យអប់រំក្នុងប្រទេសកម្ពុជានៅក្នុងពិធីពិសេសមួយដែលបានធ្វើឡើងនៅក្រសួងក្រោមអធិបតីភាពលោកជំទាវ ឃុន រចនា អនុរដ្ឋលេខាធិការក្រសួងអប់រំ យុវជន និងកីឡាដែលបានប្រគល់លិខិតថ្លែងអំណរគុណ និងមេដាយតំណាងឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាដល់នាយកគ្រប់គ្រងណាហ្គាវើលដ៍ លោក Pern Chen និងមន្ត្រីតំណាងក្រុមហ៊ុន។

លិខិតថ្លែងអំណរគុណ និងមេដាយ ត្រូវបានប្រគល់បន្ទាប់ពីណាហ្គាវើលដ៍បេះដូងសប្បុរសបានបំពេញកាតព្វកិច្ចដោយជោគជ័យពាក់ព័ន្ធនឹងអនុស្សរណៈនៃការយោគយល់គ្នា (MoU) ឆ្នាំ២០១៩សម្រាប់កម្មវិធីចែកសម្ភារសិក្សា និងការលើកកម្ពស់ការយល់ដឹងអំពីសុវត្ថិភាពអគ្គិភ័យ។ មានសិស្សានុសិស្សប្រមាណ ២៥.៣៨៥ នាក់ទៅទូទាំង ១១ ខេត្ត បានទទួលប្រយោជន៍ពីសកម្មភាពដែលបានធ្វើឡើងក្នុងឆ្នាំ២០១៩។

លោកស្រី ឃុន រចនា បានមានប្រសាសន៍ថា «តំណាងឲ្យឯកឧត្តមរដ្ឋមន្ត្រីបណ្ឌិតសភាចារ្យ ខ្ញុំសូមថ្លែងអំណរគុណយ៉ាងជ្រាលជ្រៅសម្រាប់ការឧបត្ថម្ភគាំទ្រ និងការសហការយូរអង្វែងរបស់ណាហ្គាវើលដ៍បេះដូងសប្បុរស។ ខ្ញុំសូមវាយតម្លៃខ្ពស់ចំពោះកិច្ចសហការនេះ និងសូមអបអរសាទរដល់ស្នាដៃដែលណាហ្គាវើលដ៍បេះដូងសប្បុរសបានធ្វើ ៣ ឆ្នាំកន្លងទៅនេះជាមួយក្រសួងអប់រំ យុវជន និងកីឡា។ ខ្ញុំក៏សូមថ្លែងអំណរគុណដល់ណាហ្គាវើលដ៍បេះដូងសប្បុរសផងដែរចំពោះការឧបត្ថម្ភម៉ាស់ ជែលលាងដៃ និងអាល់កុលដល់ក្រសួងកាលពីខែមេសា ឆ្នាំ ២០២០ ដើម្បីប្រយុទ្ធនឹងជំងឺកូវីដ-១៩»។

លោកជំទាវ ឃុន រចនា អនុរដ្ឋលេខាធិការក្រសួងអប់រំ យុវជន និងកីឡា ប្រគល់លិខិតថ្លែងអំណរគុណ និងមេដាយតំណាងឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាដល់នាយកគ្រប់គ្រងណាហ្គាវើលដ៍ លោក Pern Chen ។

សូមបញ្ជាក់ផងដែរថា ក្រសួងអប់រំ យុវជន និងកីឡា និងណាហ្គាវើលដ៍បេះដូងសប្បុរស បានបន្តអនុស្សរណៈនៃការយោគយល់គ្នាដែលអនុញ្ញាតឲ្យកម្មវិធីចែកសម្ភារសិក្សាបន្តរហូតដល់ថ្ងៃទី ៣១ ខែតុលា ឆ្នាំ ២០២២។ បុគ្គលិកស្ម័គ្រចិត្តរបស់ណាហ្គាវើលដ៍បេះដូងសប្បុរស នឹងធ្វើដំណើរទៅកាន់សាលាបឋមសិក្សា ៦០ នៅក្នុងខេត្ត ១២ ដើម្បីចែកសម្ភារសិក្សាចាំបាច់ដល់សិស្សានុសិស្សពីថ្នាក់ទី១ ដល់ថ្នាក់ទី៦ ដោយមានបន្ថែមខេត្តពោធិ៍សាត់ទៅក្នុងបញ្ជីផងដែរ។ កម្មវិធីលើកកម្ពស់ការយល់ដឹងអំពីសុវត្ថិភាពអគ្គិភ័យ ក៏ត្រូវបានពង្រីកទៅកាន់សាលារៀននៅក្នុងខេត្ត ៥ ផងដែរដោយមានបន្ថែមខេត្តកំពង់ចាម។

នាយកគ្រប់គ្រងណាហ្គាវើលដ៍ លោក Pern Chen បានឲ្យដឹងថា «ណាហ្គាវើលដ៍ មានកិត្តិយសយ៉ាងខ្លាំងដែលបានបន្តការសហការជាមួយក្រសួងទៅលើគំនិតផ្តួចផ្តើមដើម្បីជួយលើកកម្ពស់វិស័យអប់រំ។ ដូចអ្នកប្រាជ្ញជនជាតិបារាំង Anatole France បានពោលថា “ការលើកទឹកចិត្ត មានសារសំខាន់ណាស់សម្រាប់ការអប់រំ។ ជាមួយនឹងការផ្តល់សម្ភារសិក្សាដល់សិស្សទូទៅ និងកាតាបដល់សិស្សពូកែ មានន័យថា យើងបានលើកទឹកចិត្តពួកគេឲ្យកាន់តែប្រឹងប្រែងរៀនសូត្រ និងទទួលបានលទ្ធផលសិក្សាកាន់តែប្រសើរដែលនឹងផ្តល់ឲ្យពួកគេមានឱកាសទទួលបានអនាគតកាន់តែភ្លឺស្វាង»។

លោក Pern Chen បានធ្វើការកត់សម្គាល់ផងដែរថា កម្មវិធីលើកកម្ពស់ការយល់ដឹងអំពីសុវត្ថិភាពអគ្គិភ័យ បានផ្តល់ចំណេះដឹងសំខាន់ៗស្តីពីវិធីកាត់បន្ថយហានិភ័យអគ្គិភ័យ វិធីបង្ការ និងវិធីដោះស្រាយនៅពេលមានបញ្ហាអគ្គិភ័យនៅក្នុងផ្ទះ និងអគារ។ បំពង់ពន្លត់អគ្គិភ័យចំនួន ៦៣ ត្រូវបានឧបត្ថម្ភដល់សាលារៀន និងសហគមន៍ព្រមទាំងមានការផ្តល់ការបង្ហាញអំពីវិធីប្រើប្រាស់បំពង់ពន្លត់អគ្គិភ័យ និងវិធីពន្លត់អគ្គិភ័យផងដែរ។ លោក Pern Chen បានបន្ថែមថា កម្មវិធីចុះទៅតាមសាលារៀនរបស់យើង គឺជាផ្នែកស្នូលនៃកម្មវិធីលើកកម្ពស់វិស័យអប់រំ ដែលជាសសរស្ដម្ភមួយក្នុងចំណោមសសរស្តម្ភសំខាន់ទាំង ៤ របស់យើងខណៈសសរស្ដម្ភ ៣ ទៀត ផ្តោតទៅលើ ការផ្សារភ្ជាប់ជាមួយសហគមន៍ ការអភិវឌ្ឍវិស័យកីឡា និងការគាំពារបរិស្ថាន។ ចាប់តាំងពីឆ្នាំ២០១៤ មក សកម្មភាពរបស់យើង បានជួយលើកកម្ពស់ជីវិតរស់នៅរបស់ប្រជាជនកម្ពុជាជាង ៤៥៦.០០០ នាក់ជាពិសេសកុមារ។

លោកជំទាវ ឃុន រចនា អនុរដ្ឋលេខាធិការក្រសួងអប់រំ យុវជន និងកីឡា ឯកឧត្តម ពុត សាមិត្ត អគ្គនាយកនៃអគ្គនាយកដ្ឋានអប់រំ ឯកឧត្តម ចាន់ សុភា ប្រធាននាយកដ្ឋានបឋមសិក្សា លោក ចាប សោភ័ណ ប្រធាននាយកដ្ឋានទំនាក់ទំនងវប្បធម៌ និងអាហារូបករណ៍ និងលោក កាន់ ពុទ្ធី អនុប្រធាននាយកដ្ឋានបឋមសិក្សា ចូលរួមពិធីប្រគល់នៅក្រសួងជាមួយនឹងតំណាងក្រុមហ៊ុនណាហ្គាវើលដ៍។

ណាហ្គាវើលដ៍បេះដូងសប្បុរស ត្រូវបានបង្កើតឡើងក្នុងខែមីនា ឆ្នាំ ២០១៤ ដោយបុគ្គលិកដែលមានការគាំទ្រពីក្រុមហ៊ុនដើម្បីលើកកម្ពស់ការធ្វើការស្ម័គ្រចិត្តសម្រាប់សង្គមកម្ពុជាដោយផ្តោតទៅលើសសរស្ដម្ភ ៤ គឺការលើកកម្ពស់វិស័យអប់រំ ការផ្សារភ្ជាប់ជាមួយសហគមន៍ ការអភិវឌ្ឍវិស័យកីឡា និងការគាំពារបរិស្ថាន។ មកដល់បច្ចុប្បន្ន មានកុមារ និងប្រជាជននៅក្នុងសហគមន៍ជាង ៤៥៦.០០០ នាក់បានទទួលប្រយោជន៍ពីកម្មវិធីទាំងនេះ៕

Related Topics:ក្រសួងអប់រំ យុវជន និងកីឡា ណាហ្គាវើលដ៍